3 Joni 1 - Vakavakadewa Makawa

Sa tukuni Keo ko Joni, kei Tiotirifi, kei Timitirio, 1-14.

¹ Oi au na qase vua na daulomani ko Keo, o koya kau sa lomana vakaidina.

² Kemuni na lomani, sa dua bau na ka kau sa gadreva vakalevu, mo kalougata ka bula vinaka, me vaka sa bula vinaka sara na yalomu.

³ Niu sa reki vakalevu, ni ra sa lako mai na veiwekani ka tukuna na dina sa tu vei iko, me vaka ni ko sa daumuria na dina.

⁴ Sa ka levu na noqu reki e na vuku ni ka e dua bauga oqo, niu sa rogoca era muria na dina ko ira na luvequ.

⁵ Kemuni na lomani, ko sa kitaka vakadodonu na ka kecega ko sa kitaka vei ira na veiwekani, vei ira talega na vulagi;

⁶ ko ira era sa tukuna na nomu loloma e na matadra nai soqosoqo lewe ni lotu; ia kevaka ko sa vukei ira e na nodra lako mai me vaka sa vinaka vua na Kalou, o na cakava na ka vinaka:

⁷ ni ra a lako yani e na vuku ni Yacana, a sa sega e dua na ka era taura maivei ira sa tawa-lotu.

⁸ O koya sa dodonu kina me da vakacegui ira era sa vakakina, me da veivuke kina e na dina.

⁹ Au a vola vei ira nai soqosoqo lewe ni lotu: ia ko Tiotirifi, o koya sa viavialiu vei ira, sa sega ni vakacegui keitou.

¹⁰ O koya oqo kau na nanuma kina na nonai valavala sa kitaka ko koya, niu na lako yani, ni sa dau vosavakacacataki keitou e na vosa ca: a sa sega ni kitaka walega oqo, sa bese talega ni vakacegui ira na veiwekani, a sa tarovi ira era via kitaka, a sa vakasivoi ira mai nai soqosoqo lewe ni lotu.

¹¹ Kemuni na lomani, kakua ni muria na ka ca, muria ga na ka vinaka. O koya sa caka vinaka sa luve ni Kalou: ia ko koya sa caka ca sa sega ni raica na Kalou.

¹² Sa rogo vinaka ko Timitirio maivei ira kecega, mai na dina talega; io, keitou sa tukuna vakakina; ka dou sa kila sa dina na neitou i tukutuku.

¹³ Sa vuqa na ka vei au meu vola, ia kau na sega ni vola vei iko e na wai ni volavola kei na peni:

¹⁴ ia kau sa nakita me raici iko kusarawa, me daru veivosaki e na matanavotu.

¹⁵ Me tu vei iko na vakacegu. Sa loloma yani vei iko ko ira na veiwekani. Au sa loloma yani vei ira yadua na veiwekani.