2 Veigauna 6 - Vakavakadewa Makawa

Sa vosavakalougatataki ira na tamata ko Solomoni, 1-11. A nona masu, 12-42.

¹ Sa qai kaya ko Solomoni, Sa kaya ko Jiova ni na tiko ko koya e na butobuto loaloa.

² Ia ka'u sa tara e dua na vale mo ni tiko kina, io, e dua na tikina mo ni tiko kina ka tawa mudu.

³ A sa vakanamata na tui vei ira na nodra i soqosoqo na Isireli ka vosavakalougatataki ira kecega: a ra sa wavu tu nai soqosoqo taucoko ni Isireli.

⁴ A sa kaya ko koya, Me vakarokorokotaki ko Jiova na Kalou ni Isireli, o koya ka vosa e na gusuna vei Tevita na tamaqu, a sa vakayacora e na ligana, ka vaka,

⁵ Mai na siga ka'u a kauti ira tani kina na noqu tamata mai na vanua ko Ijipita, au a sega ni digitaka e dua na koro e na nodra veimataqali kecega na Isireli me tara kina e dua na vale, me tiko kina na yacaqu; ka'u a sega talega ni digitaka e dua na tamata me turaga vei ira na noqu tamata na Isireli:

⁶ ia ka'u sa digitaki Jerusalemi me tu kina na yacaqu; ia ka'u sa digitaki Tevita me turaga vei ira na noqu tamata na Isireli.

⁷ Ka sa tu e na loma i Tevita na tamaqu me tara e dua na vale ki na yaca i Jiova na Kalou ni Isireli.

⁸ Ia sa kaya vei Tevita na tamaqu ko Jiova, E na vuku ni sa tu e lomamu mo tara e dua na vale ki na yacaqu, sa vinaka vei iko ni sa tu e lomamu:

⁹ ia ko na sega ga ni tara na vale; ia na luvemu, o koya sa na lako mai na tolomu, ena tara ko koya na vale ki na yacaqu.

¹⁰ A sa vakataudeitaka ko Jiova na nona vosa ka vosataka ko koya; ni'u sa tubu cake mei sosomi kei Tevita na tamaqu, ia ka'u sa tiko e nai tikotiko vakaturaga e Isireli, me vaka ka yalataka ko Jiova, ia ka'u sa tara oti na vale ki na yaca i Jiova na Kalou ni Isireli.

¹¹ Ia ka'u sa vakacuruma kina na kato, sa tu kina na veiyalayalati i Jiova, ka cakava ko koya kei ira na Isireli.

¹² A sa tu ko koya e na mata ni cabocabo-ni-soro i Jiova e matadra nai soqosoqo taucoko ni Isireli, a sa dodoka yani na ligana ruarua:

¹³ (ni sa cakava oti ko Solomoni e dua nai tutu parasa, sa lima na kiupiti na kena balavu, ka lima na kiupiti na kena raraba, ka tolu na kiupiti na kena cecere, a sa vakatikora e loma ni rara vakabai: a sa tu mada ko koya e delana, ka qai vakatekiduru sobu e na matadra nai soqosoqo taucoko ni Isireli, a sa dodoka yani na ligana ruarua vaka ki lomalagi:)

¹⁴ a sa kaya, Kemuni Jiova na Kalou ni Isireli, sa sega na Kalou me tautauvata kei kemuni, mai lomalagi, se e na dela i vuravura, ni kemuni sa vakabauta tiko na veiyalayalati kei na loloma vei ira na nomuni tamata era lako voli e matamuni mai na vu ni yalodra taucoko:

¹⁵ o ni sa vakabauta na ka ko ni a yalataka vua na nomuni tamata ko Tevita na tamaqu: ia ko ni a vosa e na gusumuni, ka sa vakayacora e na ligamuni, me vaka e na siga oqo.

¹⁶ Ia oqo, kemuni Jiova na Kalou ni Isireli, mo ni vakabauta mada vua na nomuni tamata ko Tevita na tamaqu na ka ko ni a yalataka vua, ni kemuni a kaya, Ena sega ni mudu vei iko na tamata me tiko e mataqu e nai tikotiko vakaturaga e Isireli; kevaka era sa lewa vakavinaka na nodra i valavala o ira na luvemu, me lako voli e na noqu i vakaro me vaka ni ko a lako voli e mataqu.

¹⁷ Ia oqo, Kemuni Jiova na Kalou ni Isireli, me vakadinadinataki mada na nomuni vosa, ko ni a vosataka vei Tevita na nomuni tamata.

¹⁸ Ia ena tiko vata vakaidina li na Kalou kei ira na tamata e vuravura? raica, ko lomalagi, kei lomalagi e cake sara, ko ni sa sega ni yalani rawa kina; ka na segai vakaidina sara na vale oqo ka'u sa qai tara.

¹⁹ Ia mo ni goleva ga, kemuni Jiova na noqu Kalou, na vakamamasu ni nomuni tamata, kei na noqu kerekere, mo ni rogoca kina na tagi kei na vakamamasu, sa masu kina e matamuni na nomuni tamata:

²⁰ me yadra tu na matamuni ki na vale oqo e na bogi kei na siga, io ki na tikina ko ni a kaya kina, Ena tiko maikea na yacaqu; mo ni rogoca kina na masumasu sa ia na nomuni tamata e na tikina oqo.

²¹ Ia mo ni rogoca na kerekere ni nomuni tamata, kei na nodra kerekere na nomuni tamata na Isireli, ni ra na masu e na tikina oqo: mo ni rogoca mai lomalagi, na yasana ko ni sa tiko kina: ia ni kemuni sa rogoca, mo ni kakua ni cudru.

²² Kevaka sa caka cala e dua na tamata vua na kai nona, a sa vakabubuluitaki, a sa lako mai ka bubului ki na mata ni nomuni cabocabo-ni-soro e na vale oqo:

²³ mo ni qai rogoca mai lomalagi, ka cakava, ka lewai ira na nomuni tamata, ni kemuni sa saumi koya na caka cala, ka tauca ki na uluna na nonai valavala; ka vakadonui koya sa caka dodonu, ka solia vua me vaka na nonai valavala dodonu.

²⁴ Ia ni ra sa moku na nomuni tamata na Isireli e na matadra na meca, e na vuku ni nodra i valavala ca vei kemuni; a ra sa lesu mai, ka vakatusa na yacamuni, ka vakamamasu ka kerekere vei kemuni e na vale oqo;

²⁵ mo ni qai rogoca mai lomalagi, ka mo ni bokoca na nodra i valavala ca na nomuni tamata na Isireli, ka mo ni vakalesui ira tale ki na vanua ko ni a solia kivei ira kei ira na nodra qase.

²⁶ Ni sa sogo ko lomalagi, ka sega kina ni tau na uca, e na vuku ni nodra i valavala ca vei kemuni; kevaka era na vakamamasu ni ra rai vaka ki na tikina oqo, ka vakatusa na yacamuni, ka saumaki mai na nodra i valavala ca, ni kemuni sa vakararawataki ira;

²⁷ mo ni qai rogoca mai lomalagi, ka mo ni bokoca na nodra i valavala ca na nomuni tamata, io, na nomuni tamata na Isireli, ni kemuni sa vakavulici ira e na sala vinaka me ra lako kina; ka vakatauca na uca ki na nomuni vanua, ko ni sa solia vei ira na nomuni tamata me nodra i votavota.

²⁸ Kevaka sa dausiga na vanua, kevaka sa dua na mate levu, kevaka sa kania nai teitei na cagi todra, se dua na malai levu, se na vodre, se na nuve; kevaka sa buku druadrua ko ira na meca e na veikoro ni nodra vanua; kevaka sa dua na rarawa levu, se dua na mate;

²⁹ ka sa masu ka kerekere vei kemuni e dua na tamata, se ko ira kecega na nomuni tamata na Isireli, ni sa kila na tamata yadua na kena ca ni lomana, kei na nona rarawa a sa dodoka yani na ligana vaka ki na vale oqo;

³⁰ mo ni qai rogoca mai lomalagi, na yasana ko ni sa tiko kina, ia mo ni bokoca, ka mo ni solia vua na tamata yadua me vaka na nonai valavala kecega, ni kemuni sa kila na lomana; (ni kemuni sa kila, koi kemuni duaduaga na lomadra kecega na luve ni tamata;)

³¹ me ra rerevaki kemuni, ka lako e nomuni sala, e na gauna kecega era na bula tiko kina e na vanua ko ni a solia vei ira na neimami qase eliu.

³² Ia e na vuku ni kai tani, era sa sega ni kai vata kei ira na nomuni tamata na Isireli, a sa lako mai na vanua vakayawa e na vuku ni yacamuni sa rogo, kei na ligamuni kaukauwa, kei na ligamuni sa dodo tu; kevaka era na lako mai ka masu e na vale oqo;

³³ mo ni qai rogoca mai lomalagi, na yasana ko ni sa tiko kina, ka mo ni cakava me vaka na ka kecega sa tagi kina vei kemuni ko ira na kai tani: me ra kila na yacamuni ko ira kecega na kai vuravura, me rerevaki kemuni, me vakataki ira na nomuni tamata na Isireli; ia me ra kila ni sa vakatokai e na yacamuni na vale oqo ka'u sa tara.

³⁴ Kevaka era sa lako yani ko ira na nomuni tamata me ra vala kei ira na nodra meca, e na sala kecega ko ni na talai ira kina, ka ra sa masu vei kemuni, ni rairai vaka ki na koro oqo ko ni a digitaka, kei na vale ka'u sa tara oti ki na yacamuni;

³⁵ mo ni qai rogoca mai lomalagi na nodra masumasu, kei na nodra kerekere, ka cakava na ka e dodonu vei ira.

³⁶ Kevaka era sai valavala ca vei kemuni, (ni sa sega na tamata e sega ni valavala ca,) ia ko ni sa cudruvi ira, ka soli ira ki na meca, me ra kauti ira vakabobula ki na dua na vanua sa yawa se voleka;

³⁷ ia kevaka era sa vakanananu e na vanua era a kau vakabobula kina, ka veivutuni, ka masuti kemuni e na vanua era a kau vakabobula kina, ka kaya, Keimami sai valavala ca, keimami sai valavala vakatani, ka caka cala;

³⁸ a ra sa lesu vei kemuni e na lomadra taucoko, kei na vu ni yalodra taucoko, e na vanua era sa tiko vakabobula kina, ka masu ni ra rai vaka ki na nodra vanua ko ni a solia vei ira na nodra qase, na koro ko ni sa digitaka, kei na vale ka'u sa tara oti ki na yacamuni;

³⁹ mo ni qai rogoca mai lomalagi, na yasana ko ni sa tiko kina, na nodra masumasu, kei na nodra kerekere, ka cakava na ka e dodonu vei ira, ia mo ni bokoca na nodra ca na nomuni tamata era sai valavala ca vei kemuni.

⁴⁰ Ia, kemuni na noqu Kalou, me yadra tu na matamuni, ka me gole tu na daligamuni ki na masu sa ia e na tikina oqo.

⁴¹ Ia oqo, mo ni cabe cake ki na nomuni vakavakacegu, kemuni Jiova na Kalou, koi kemuni, kei na kato ni nomuni kaukauwa: me ra vakaisulu e na bula ko ira na nomuni bete, kemuni Jiova na Kalou, ka me ra rekitaka na loloma ko ira na nomuni tamata yalododonu.

⁴² Kemuni Jiova na Kalou, mo ni kakua ni vagolea tani na matamuni mai vua na nomuni lumuti; mo ni nanuma tiko na loloma kivei Tevita na nomuni tamata.