2 Veigauna 5 - Vakavakadewa Makawa

A so levu ni vakacuru vale ni soro.

¹ A sa caka oti na cakacaka kecega ka cakava ko Solomoni ki na vale i Jiova. Ka sa kauta ki loma ko Solomoni na veika ka vakatabuya ko Tevita na tamana me nei Jiova: io na siliva, kei na koula, kei nai yaya kecega, sa viritu vata kei nai yau ni vale ni Kalou.

² Sa qai vakasoqoni ira vata na nodra qase na Isireli ko Solomoni, kei ira kecega na turaga ni veimataqali, ko ira sa liu vei ira na nodra qase na Isireli, ki Jerusalemi, me ra kauta cake na kato ni veiyalayalati i Jiova mai na koro i Tevita, ko ya ko Saioni.

³ A ra sa soqoni vata vua na tui ko ira kecega na Isireli, ki na so levu sa ia e nai kavitu ni vula.

⁴ A ra sa lako kece mai na nodra qase na Isireli; a ra sa laveta cake na kato ko ira na Livai.

⁵ A ra sa kauta cake na kato, kei na vale ni veitavaki, kei nai yaya tabu kecega ka tu e na Vale tabu, a ra sa kauta cake ko ira na bete, kei ira na Livai.

⁶ Ia ko Solomoni na tui, kei na nodra i soqosoqo taucoko na Isireli era soqoni vata vua, e na mata ni kato, era sa vakacabora tiko na sipi kei na pulumokau, sa sega ni tukuni rawa se wili, e na vuku ni kena levu.

⁷ A sa kauta ko ira na bete na kato ni veiyalayalati i Jiova ki na kena tikina, ki na loqi ni Vosa e na Vale, ki na tikina tabu sara, ki ruku ni tabadrau na jerupi.

⁸ Ni sa vakatetaba koi rau na jerupi e na tikina sa tu kina na kato; a rau sa vakaruruga maicake na kato kei na kenai vua ruarua koi rau na jerupi.

⁹ A ra sa ucuna nai vua me raici rawa na mua ni vua, mai na kato e na mata ni loqi ni Vosa, a sa sega ni raici mai tautuba: ka sa toka maikea ka yacova na siga oqo.

¹⁰ Sa sega na ka eloma ni kato, na vatu raraba ruarua ga ka tugana kina ko Mosese mai Orepi, ni sa veiyalayalati ko Jiova kei ira na Isireli, ni ra sa lako tani mai na vanua ko Ijipita.

¹¹ Ia ni ra sa curu yani na bete mai na tikina tabu, (ni sa vakasavasavataki ko ira kecega na bete era sa tiko maikea; ko ira era sa sega ni cakacaka vakamata;

¹² ko ira talega na Livai, era dausere, ko ira kecega ko Esafa, kei Imani, kei Jitucuni, kei na nodra gonetagane, kei na wekadra, era sa vakaisulu e na lineni matailalai, a ra sa taura na sibali, kei na soliteri, kei na api, era sa tu e na yasa ni cabocabo-ni-soro sa donuya na tu-i-cake, ka tiko vata kei ira e le dua na drau ka ruasagavulu na bete era sa uvu davui tiko:)

¹³ ia ni sa vaka sa le dua ga ko ira sa uvu davui kei ira na dausere, me ra domo vata ga, ka rogo vata e na sere, kei na vakavinavinaka vei Jiova; ia ni ra sa tabalaka cake vata na domodra kei na davui, kei na sibali kei na veika domo vinaka, ka sa vakavinavinaka vei Jiova, ka vaka, Sa vinaka ko koya, ni sa tawa mudu na nona loloma; sa qai sinai na vale e na o, io na vale i Jiova,

¹⁴ a ra sa sega ni tiko rawa kina na bete me ia na cakacaka, e na vuku ni o; ni sa vakasinaita na vale ni Kalou na serau i Jiova.