2 Veigauna 34 - Vakavakadewa MakawaSa tui Juta ko Josaia; a sa gumatua ni tarova na vakacaboi soro ki na veikalou ko koya, ka sa vakavinakataka na vale ni soro, 1-13. Sa kunea ko Ilikaia na bete nai vola ni vunau, 14-21; sa tukuna ko Ulita ni na ca emuri ko Jerusalemi, 22-28; a sa wili nai vola ni veiyalayalati, 29-33. 1 Sa yabaki walu ko Josaia ni sa buli me tui, ka sa lewa mai Jerusalemi ka yabaki tolusagavulu ka dua. 2 A sa caka dodonu ko koya e na mata i Jiova, ka muria nai valavala i Tevita na tamana, ka sega ni gole ki nai matau se ki nai mawi. 3 A sa vakatekivu ko koya me vakasaqara na Kalou i Tevita na tamana, e nai kawalu ni yabaki ni nona lewa, ni sa gone tiko: ia e na kenai katinikarua ni yabaki, sa vakatekivu me vakasavasavataki Juta kei Jerusalemi mai na veiyasana cecere, kei na kalouyalewa ni veikau, kei na matakau ceuceu, kei na matakau sa vakawaicalataki. 4 A ra sa basuraka sobu e matana na nodra i cabocabo-ni-soro na Peali, ka sa taya sobu ko koya na matakau ka toka e cake e deladra; ka sa vurumemeataka na kalouyalewa ni veikau, kei na matakau ceuceu, kei na matakau sa vakawaicalataki, ka cakava me kuvu-ni-soso, ka vakamiraka e dela ni nodra i bulubulu era vakacaboi soro kivei ira. 5 A sa vakama na suidra na bete e dela ni nodra i cabocabo-ni-soro, ka vakasavasavataki Juta kei Jerusalemi. 6 Ka sa kitaka vakakina e na nodra veikoro na Manasa, kei Ifireimi, kei Simioni, ka yaco ki Nafitalai, io, e na kena veitikina sa rusa. 7 Ia ni sa oti na nona basuraka sobu na veicabocabo-ni-soro kei na kalouyalewa ni veikau, ka tukilaka oti na matakau ceuceu me vaka na nuku, ka taya sobu oti na matakau kecega e na veiyasana kecega ni nodra vanua na Isireli, sa qai lesu ko koya ki Jerusalemi. 8 Ia e na kenai katinikawalu ni yabaki ni nona lewa, ni sa vakasavasavataka oti na vanua, kei na vale ni soro, sa talai Safani na luve i Asalaia, kei Meesea na turaga ni koro, kei Joa na luve i Joasi o koya ka dauvola na ka ni matanitu, me ratou vakavinakataka na vale i Jiova na nona Kalou. 9 Ia ni ra sa lako mai vei Ilikaia na bete levu, era sa solia nai lavo ka kau ki na vale ni Kalou, era a kumuna vata ko ira na Livai nai vakatawa ni katuba, maivei ira na Manasa kei Ifireimi, maivei ira kece talega na kedra vo na Isireli, maivei ira kece talega na Juta kei Penijamini; era sa qai lesu ki Jerusalemi. 10 Ka ra solia kivei ira na tamata cakacaka sa nodra i tavi me vakaraica na vale i Jiova, ia ko ira oqo era solia kivei ira na tamata cakacaka era sa cakacaka e na vale i Jiova, me vakavinakataka na vale: 11 io, sa soli kivei ira na matai kei ira era sa tara vale, me ra volia na veivatu sa ta, kei na kau ni veisema, kei na soka ni veivale sa vakacataka ko ira na tui Juta. 12 A sa cakava vakadodonu na cakacaka ko ira na tamata: ka sa vakaraici ira ko Jeaci kei Opetaia, oi rau na Livai, maivei ira na luve i Mirari; kei Sakaraia, kei Mesulame, maivei ira na luvedra tagane na Koaca; me ratou kusata: ka so tale vei ira na Livai, ko ira kecega sa vuku e na ka ni sere e domo vinaka. 13 Era sa vakaraica talega na tamata era sa daucolacola, era sa vakaraici ira kece talega ka cakava na cakacaka kecega sa caka: ka maivei ira na Livai sa lesi eso na vunivola, kei ira na turaga, kei ira nai vakatawa ni matamata-ni-koro. 14 Ia ni ra sa kauta mai ki tautuba nai lavo sa kau ki na vale i Jiova, sa kunea ko Ilikaia na bete nai vola ni vunau i Jiova ka solia ko Mosese. 15 A sa tukuna ko Ilikaia, vei Safani na vunivola, ka kaya au sa kunea nai vola ni vunau e na vale i Jiova. Ka sa solia nai vola ko Ilikaia vei Safani. 16 A sa kauta nai vola ko Safani vei koya na tui, ka sa kaya talega vua na tui, Na ka kecega sa vakaroti vei ira na nomuni tamata, era sa cakava tiko. 17 A ra sa kumuna vata nai lavo sa kune e na vale i Jiova, a ra sa solia oti ki na ligadra era sa vakaraici ira, kei na ligadra na tamata cakacaka. 18 Sa qai tukuna vua na tui ko Safani na vunivola, ka kaya, Sa solia kivei au ko Ilikaia na bete e dua nai vola. A sa wilika ko Safani vua na tui. 19 Ia ni sa rogoca na vosa ni vunau ko koya na tui, sa dresulaka na nonai sulu. 20 Sa qai vakarota na tui kivei Ilikaia, kei Eaikami na luve i Safani, kei Apitoni na luve i Maika, kei Safani na vunivola, kei Asaia e dua na nona tamata na tui, ka kaya, 21 Dou lako, dou tarogi Jiova e na vukuqu, e na vukudra talega era sa vo tu e Isireli kei Juta, se sa vakaevei na vosa ni vola sa kune: ni sa levu na cudru i Jiova sa sovaraki mai vei keda, ni ra sa sega ni vakabauta na vosa i Jiova ko ira na noda qase, me ra cakava na ka kecega sa volai e nai vola oqo. 22 A sa lako ko Ilikaia, kei ira mai vua na tui, kivei Ulita na parofita yalewa na wati i Salumi, na luve i Tikiva ka tagane, na luve i Asira ka tagane, ai vakatawa ni sulu: (sa tiko na yalewa oqo mai Jerusalemi e nai karua ni yasana;) a ra sa vosa vei koya me vakakina. 23 A sa kaya vei iratou ko koya, Sa kaya vakaoqo ko Jiova na nodra Kalou na Isireli, Dou tukuna vua na tamata ka talai kemudou kivei au, 24 Sa kaya vakaoqo ko Jiova, Raica, au na vakayacora na ca ki na koro oqo, kivei ira talega na lewe ni koro oqo, io, na vosa ni veivakarusai kecega sa volai e nai vola era sa wilika vua na tui Juta: 25 ni ra sa biuti au, ka vakama na ka boi vinaka vei ira na kalou tani, me ra vakacudrui au e na cakacaka kecega ni ligadra; e na vuku ni ka oqo, ena sovaraki kina na noqu cudru ki na koro oqo, ka na sega ni bokoci. 26 Ia e na vukuna na tui Juta, o koya ka talai kemudou me tarogi Jiova, dou kaya vakaoqo vua, Sa kaya vakaoqo ko Jiova na Kalou ni Isireli e na vuku ni vosa ko sa rogoca oti: 27 Ni sa malumalumu na lomamu, ia ko a vakamalumalumutaki iko e na mata ni Kalou, ni ko a rogoca na nona vosa ka baleta na koro oqo, kei ira na lewena, ka sa vakamalumalumutaki iko e mataqu, ka dresulaka na nomu i sulu, ka tagi e mataqu; au sa qai rogoci iko talega, sa kaya ko Jiova. 28 Raica, au na vakauti iko vei ira na nomu qase, ia ko na kau ki na nomu i bulubulu e na vakacegu, ka na sega ni raica na matamu na ka ca kecega au na vakayacora ki na yasana oqo, kivei ira talega na lewena. A ra sa kauta na vosa vua na tui. 29 Sa qai talaki na tui, ka vakasoqoni ira vata na qase kecega ni Juta kei Jerusalemi. 30 A sa cabe cake na tui ki na vale i Jiova, kei ira vata kaya na nodra tagane kecega na Juta, kei ira na kai Jerusalemi, kei ira na bete, kei ira na Livai, kei ira kecega na tamata, ko ira na lelevu kei ira na lalai: a sa wilika ko koya e na daligadra na vosa kecega ni vola ni veiyalayalati sa kune e na vale i Jiova. 31 A sa tu na tui e na nonai tutu, ka cakava na veiyalayalati e na mata i Jiova, ka me muri Jiova ga, ka vakabauta na nona vunau, kei na nonai vakaro, kei na nonai lesilesi, e na lomana taucoko, kei na yalona taucoko, me vakaca na vosa ni veiyalayalati sa volai e nai vola oqo: 32 a sa vakauqeti ira kecega era sa tiko e Jerusalemi kei Penijamini me ra vakabauta. A ra sa cakava ko ira na kai Jerusalemi, me vaka na veiyalayalati ni Kalou, na Kalou ni nodra qase. 33 A sa kauta tani ko Josaia na ka vakasisila kecega mai na nodra vanua kecega na Isireli, ka vakauqeti ira kecega era sa tiko e Isireli me ra qarava, io, me ra qaravi Jiova na nodra Kalou. Ka ra sa sega ni lako tani me ra kakua ni muri Jiova, na Kalou ni nodra qase, e na nona gauna kecega. |
Vakavakadewa Makawa (Fijian Old Version) © Bible Society of the South Pacific
Bible Society of the South Pacific