Biblia Todo Logo
Bìoball air-loidhne

- Sanasan -

2 Veigauna 32 - Vakavakadewa Makawa


Sa kabai Jerusalemi ko Senakaripi na tui Asiria, a sa yavita na nonai valu e dua na agilose, 1-23. Sa vakabulai ko Esekaia mai na nona tauvi mate; sa vutuniyau sara; ia sa cala ni vakaraitaka vei ira mai Papiloni, 24-33.

1 Ni sa oti na veika oqo, kei na kena vakataudeitaki, sa lako mai ko Senakaripi na tui Asiria, a sa curu ki na nodra vanua na Juta, ka sa tiko vakaivalu ki na veikoro e vakabai, a sa nanuma me rawa me nona.

2 Ia ni sa raica ko Esekaia ni sa lako mai ko Senakaripi, ka sa nakita me kabai Jerusalemi,

3 sa bose ko koya kei ira na nona tamata turaga, kei ira na nona tamata qaqa, me bonota na wai ni veimata-ni-wai vure ka tu e taudaku ni koro: a ra sa vukei koya.

4 Sa qai soqoni vata e lewe vuqa na tamata, a ra sa vakasosoga na mata-ni-wai vure kecega, ka bonota na soniwai sa drodro e loma ni vanua, a ra sa kaya, A cava so me lako mai kina ko ira na tui Asiria ka kunea na wai levu.

5 Sa vakaukauwataki koya talega, ka viria na tiki ni bai kecega sa kabasu, ka sa vakaceceretaka me yacova na vale ni vakatawa, ka viria e dua tale na bai e taudaku, a sa vakavinakataki Milo e na koro i Tevita, ka cakava na moto kei nai sasabai na ka levu.

6 Ka sa lesia eso na kapiteni ni valu me lewai ira na tamata, ka sa vakasoqoni ira vata vua e na sala ni matamata ni koro, a sa vosataka vei ira na vosa ni veivakacegui, ka kaya,

7 Ni kaukauwa ka yalodoudou, kakua ni rere se domobula e ne vuku i tui Asiria, se e na vukudra na lewe vuqa sa tiko vata kaya: ni ra sa lewe vuqa ka tiko vata kei keda ka lewe lailai sa tiko vata kei koya:

8 sa tiko vei koya na liga ni tamata ga; ka sa tiko vei keda ko Jiova na noda Kalou me vukei keda, ka me vala e na vukuda. A ra sa vakararavi ko ira na tamata ki na vosa i Esekaia na tui Juta.

9 Sa oti na ka oqo, sa qai talai ira na nona tamata ko Senakaripi ki Jerusalemi, (ia sa kabai Lakisi tiko ko koya, ka sa tiko vata kaya na nonai valu kecega,) kivei Esekaia na tui Juta, vei ira kece talega na Juta era tiko mai Jerusalemi, ka kaya,

10 Sa kaya vakaoqo ko Senakaripi na tui Asiria, A cava dou sa vakararavi kina, ni dou sa tiko ga ni sa kabai tiko ko Jerusalemi?

11 Sa sega li ni cikevi kemudou ko Esekaia, mo dou soli kemudou mo dou mate e na viakana kei na viagunu, ni sa kaya, Ena vakabulai keda ko Jiova na noda Kalou mai na ligana na tui Asiria?

12 Sa sega ni kauta tani li ko Esekaia oqo na nona veiyasana cecere kei na nonai cabocabo-ni-soro, ka vakarota kivei Juta kei Jerusalemi, ka vaka, Mo ni soro ga e na mata ni cabocabo-ni-soro e dua bauga, ka vakama kina na ka boi vinaka?

13 Ko ni sa sega ni kila na ka keirau sa cakava kei tamaqu vei ira kecega na lewe ni veivanua? sa kaukauwa li na nodra kalou na veimatanitu ni veivanua ko ya, me vakabula vakalailai na nodra vanua mai na ligaqu?

14 O cei vei ira kecega na kalou ni veimatanitu ka vakawabokotaka sara ko tamaqu, me sa vakabulai ira rawa na nona tamata mai na ligaqu, me rawarawa kina vua na nomuni Kalou me vakabulai kemuni mai na ligaqu?

15 Ia oqo, me kakua ni vakaisini kemuni ko Esekaia, se cikevi kemuni vakaoqo, ni kakua talega ni vakadinati koya: ni sa sega e dua na kalou ni dua na vanua, se dua na matanitu, sa kaukauwa me vakabulai ira na nona tamata mai na ligaqu, se mai na ligadra na noqu qase: ena qai rawarawa vakacava vua na nomuni Kalou me vakabulai kemuni mai na ligaqu?

16 Ka levu tale na vosa ca ka vosataka ko ira na nona tamata vei Jiova na Kalou, vei Esekaia talega na nona tamata.

17 Sa vola talega ko koya nai vola eso, me vakasewasewani Jiova na nodra Kalou na Isireli, ka vosavakacacataki koya, ka sa kaya, Ni sa sega ni vakabula na nodra tamata mai na ligaqu ko ira na kalou ni veimatanitu ni veivanua, ena sega talega ni vakabula na nona tamata na Kalou i Esekaia mai na ligaqu.

18 Era sa qai kaci vakadomoilevu e na vosa vaka-Juta kivei ira na kai Jerusalemi era sa tiko e dela ni bai, me vakarerei ira, ka vakataqayataki ira; ka me ra rawa kina na koro.

19 A ra sa vosavakacacataka na Kalou ni Jerusalemi, me vaka ki na nodra kalou na tamata ni vuravura, ko ira era sa cakacaka ni liga ni tamata.

20 Ia e na vuku ni ka oqo, sa masu ka tagi ki lomalagi ko Esekaia na tui, kei Aisea na parofita, na luve i Emosi.

21 Ka sa tala e dua na agilose ko Jiova, o koya sa vakamatea na tamata qaqa kecega, kei ira sa kenai liuliu kei ira sa kapiteni ni valu e na nonai valu na tui Asiria. A sa lesu kina ko koya ki na nona vanua, ka sa mata madua ga. Ia ni sa curu ko koya ki na bure ni nona kalou, eratou sa vakamatei koya e nai seleiwau e na tikina ko ya ko iratou eratou sa luvena dina.

22 Ka sa vakabulai Esekaia kei ira na kai Jerusalemi ko Jiova, mai na liga i Senakaripi na tui Asiria, mai na ligadra kece talega na tani, ka sa tuberi ira e na veiyasana kecega.

23 A ra sa lewe vuqa era sa kauta mai nai solisoli vei Jiova ki Jerusalemi, kei na ka-ni-loloma talei kivei Esekaia na tui Juta; ka sa vakalagilagitaki kina ko koya mai na gauna ko ya e matadra na matanitu kecega.

24 E na gauna ko ya sa tauvi mate ko Esekaia ka sa voleka ni mate, ka sa masu vei Jiova: a sa vosa vua ko koya, ka sa solia vua e dua nai vakatakilakila.

25 Ia sa sega ni caka vinaka tale ko Esekaia me vaka na ka vinaka sa caka vei koya; ni sa viavialevu na yalona: ka sa yaco kina vei koya na cudru, kivei ira talega na Juta, kei Jerusalemi.

26 Ia sa vakamalumalumutaki koya ko Esekaia e na vuku ni viavialevu ni yalona, ko koya, kei ira na kai Jerusalemi, ka sa sega ni yaco kina kivei ira na cudru i Jiova e na gauna i Esekaia.

27 A sa ka levu nai yau kei na vakarokoroko vei Esekaia: ka sa tara ko koya eso na nona vale ni yau, me tu kina na siliva, kei na koula, kei na vatu talei, kei na kau boi vinaka, kei nai sasabai, kei nai yaya kecega e dautaleitaki;

28 na lololo talega me tu kina na sila, kei na waini, kei na waiwai; kei na bai ni manumanu sa duidui, kei na bai ni sipi.

29 Sa vakarautaka talega na nona veikoro, ka sa taukena na qele ni sipi kei na qele ni manumanu, e dua na ka levu: ni sa solia vua ko koya na Kalou e levu sara nai yau.

30 Ka sa bonota na uciwai i Kaioni e cake ko Esekaia oqo, ka sa vakauta vakadodonu sobu ki na yasa ni koro i Tevita sa donuya na ra. Ka sa yaco ko Esekaia e na nona cakacaka kecega.

31 Ia e na ka ni nodra mata na turaga ni Papiloni, o ira ka talaki vei koya me taroga e na vuku ni cakacaka mana e na vanua, sa laivi koya na Kalou, me vakatovolei koya, me kila na ka kecega ka tiko e lomana.

32 Ia na kena vo ni cakacaka i Esekaia, kei na nonai valavala vinaka, raica, sa volai e nai vola ni raivotu i Aisea na parofita, na luve i Emosi, e na kedrai vola na tui Juta kei Isireli.

33 A sa moce vata ko Esekaia kei ira na nona qase, a ra sa buluti koya e na nodra i bulubulu talei na luve i Tevita: ka ra sa vakarokorokotaki koya e na nona mate ko ira kecega na Juta kei ira na kai Jerusalemi. Ka sa lewa ko Manasa na luvena, me kenai sosomi.

Vakavakadewa Makawa (Fijian Old Version) © Bible Society of the South Pacific

Bible Society of the South Pacific
Lean sinn:



Sanasan