2 Veigauna 3 - Vakavakadewa Makawa

Sa tara na vale i Jiova ko Solomoni.

¹ Sa qai vakatekivu ko Solomoni me tara na vale i Jiova mai Jerusalemi e na ulu-ni-vanua ko Moraia, a yasana ka rairai kina ko Jiova kivei Tevita na tamana, e na tikina sa vakarautaka oti ko Tevita, e na rara ni buturaki sila nei Orinani na Jepusaiti.

² A sa vakatekivu me tara e nai karua ni siga e nai karua ni vula, e na kenai kava ni yabaki ni nona lewa.

³ Ia oqo na yavu sa tara kina ko Solomoni na vale ni Kalou: Na kena balavu e na kiupiti me vaka nai vakarau eliu, sa onosagavulu na kiupiti, ia na kena raraba e ruasagavulu na kiupiti.

⁴ Ia na kena balavu ni varada e mata ni vale, sa tautauvata kei na raraba ni vale, sa ruasagavulu na kiupiti, ia na kena cecere sa dua na drau ka ruasagavulu. A sa botana ko koya eloma e na koula talei.

⁵ A sa botana na vale levu e na damanu, a sa botana oqori e na koula dina, a sa ceuta kina na vu ni balabala kei na sinucodo.

⁶ A sa vakaiukuukutaka na vale e na veivatu talei ka matavinaka: ia na kena koula na koula ni Parivaimi.

⁷ A sa ubia talega na vale, kei na kena soka, kei na kenai lago, kei na kena lalaga, kei na kenai sogo ni katuba, e na koula; ka sa ceuta na jerupi eso ki na lalaga.

⁸ A sa cakava ko koya na vale tabu sara, na kena balavu sa tautauvata kei na raraba ni vale, e ruasagavulu na kiupiti, kei na kena raraba sa ruasagavulu na kiupiti: a sa botana e na koula dina, sa ono na drau na taledi.

⁹ Ia na kena bibi ni vako sa limasagavulu na sikeli koula. A sa botana ko koya nai taba loma-ni-vale e cake e na koula.

¹⁰ A sa cakava e na vale tabu sara e rua na jerupi, sa ceuti, ka sa botana ruarua e na koula.

¹¹ Ia na kena balavu ni tabadrau na jerupi sa ruasagavulu na kiupiti; sa lima na kiupiti e dua na tabana, a sa yaco ki na lalaga ni vale: kei na tabana kadua sa lima na kiupiti, a sa yacova na taba ni jerupi kadua.

¹² A sa lima na kiupiti na taba ni jerupi kadua; a sa yaco ki na lalaga ni vale: a sa lima na kiupiti na tabana kadua, a sa veiuturi vata kei na tabana na jerupi kadua.

¹³ Sa vakatetaba tu na tabadrau na jerupi oqo ka ruasagavulu na kiupiti; a rau sa wavu tu, a sa qara ki loma na matadrau.

¹⁴ A sa cakava ko koya nai lati e na wa pelu, ka lokaloka, ka damuvakula, kei na lineni matailalai, a sa cakava kina na jerupi eso.

¹⁵ A sa cakava ko koya e rua na duru e na mata ni vale, na kedrau cecere sa tolusagavulu ka lima na kiupiti, ia na domodomo sa tu e deladrau sa tauyalima na kiupiti.

¹⁶ A sa cakava eso na sinucodo ki na loqi ni Vosa, ka vakarubeca e na ulu ni duru ruarua: a sa cakava e dua na drau nai ukuuku e vaka na pomekaraneti, a sa vakarubeca e na sinucodo.

¹⁷ A sa vakaduria cake na duru ruarua e na mata ni vale, e dua e nai matau kei na kenai karua e nai mawi; a sa vakatoka na yacana sa tu e nai matau, ko Jakini, kei na yacana sa tu e nai mawi, ko Poasa.