2 Veigauna 25 - Vakavakadewa Makawa

Sa tui Juta ko Amasaia, a sa soro ko koya ki na nodra kalou na Itomi.

¹ Sa ruasagavulu ka lima na yabaki i Amasaia ni sa buli me tui, ka sa lewa e Jerusalemi ka yabaki ruasagavulu ka ciwa. Ia na yaca i tinana ko Jioatani mai Jerusalemi.

² A sa cakava na ka dodonu ko koya e na mata i Jiova, ia sa sega ni vinaka taucoko na yalona.

³ Ia ni sa vakataudeitaki vua na matanitu, sa qai vakamatei rau na tamata erau a vakamatea na tamana na tui ko koya.

⁴ Ia sa sega ni vakamatei iratou na luvedrau, sa muria ga na ka sa volai e na vunau i Mosese, e na tikina sa vosa kina ko Jiova, ka kaya, Ena sega ni mate ko ira na qase e na vukudra na gone, ena sega ni mate talega ko ira na gone e na vukudra na qase, ia ena mate ga na tamata yadua e na vuku ni nonai valavala ca.

⁵ A sa vakasoqoni ira vata na Juta ko Amasaia, ka sa lesi ira me ra turaga ni yayaudolu, kei na turaga ni yayadrau, me vaka na nodra veivuvale na mataqali ni qase e Juta kei Penijamini taucoko: ka sa wiliki ira sa ruasagavulu na nodra yabaki kei ira sa toro cake, ka sa kunea ni sa le oba vakatolusagavulu na tamata bula, sa lako rawa e nai valu, ka dautaura na moto kei nai sasabai.

⁶ Sa tautauri talega ko koya me ra mai veivuke e le tini na oba na tamata qaqa maivei ira na Isireli e na dua na drau na taledi siliva.

⁷ Ia sa lako mai vei koya e dua na tamata ni Kalou, ka sa kaya, Kemuni na tui, me kakua mada ni lako vata kei kemuni na nodra i valu na Isireli; ni sa sega ni tiko vata kei ira na Isireli ko Jiova, io e segai vei ira kecega na mataqali i Ifireimi.

⁸ Ia kevaka sa lomamuni mo ni lako, mo ni ia ga; mo ni kaukauwa ki nai valu: sa na vakabalei kemuni na Kalou e matadra na meca: ni sa rawarawa vua na Kalou me veivuke, se me veivakabalei talega.

⁹ A sa kaya ko Amasaia vua na tamata ni Kalou. Ia ka na vakabeka evei na taledi e dua na drau au sa solia ki na nodra i valu na Isireli? A sa kaya na tamata ni Kalou, E rawarawa vua na Kalou me solia vei kemuni me vakalevu cake sara e na ka oqo.

¹⁰ Sa qai tawasei ira ko Amasaia, ka me ra lesu tale ki na nodra veivale, nai valu ka lako mai kivei koya mai Ifireimi: ka sa tubu vakalevu kina na nodra cudru kivei ira na Juta, ka ra sa lesu ki na nodra veivale ka sa ka levu na nodra cudru.

¹¹ A sa vakaukauwataki koya ko Amasaia, ka sa liutaki ira yani na nona tamata, ka sa lako ki na buca ni masima, ka mokuta e le tini na udolu vei ira na luve i Sia.

¹² A sa le tini na udolu era sa taura bula ko ira na Juta, ka kauta ki na dela ni uluvatu, ka biuti ira sobu mai na dela ni uluvatu, era sa raramusumusu kecega kina.

¹³ Ia ko ira na lewe ni mataivalu sa vakasuka ko Amasaia, me ra kakua ni lako kaya ki nai valu, era sa sikita na nodra veikoro na Juta, sa vakatekivu mai Samaria ka yaco ki Peci-oroni, ka ra sa mokuta e lewe tolu na udolu vei ira, a sa levu nai yau era sa tokitaka.

¹⁴ Ia ni sa tale mai ko Amasaia mai na nona mokuti ira na kai Itomi, sa kauta mai ko koya na nodra kalou na luve i Sia, ka vakaduria cake me nona kalou, ka cuva vakatoboicu e matadra, ka vakama kina na ka boi vinaka.

¹⁵ A sa waqa kina na cudru i Jiova vei Amasaia, ka sa tala vua e dua na parofita, o koya sa kaya vua, A cava ko sa goleva kina na nodra kalou na tamata era a sega ni vakabulai ira rawa na nodra tamata mai na ligamuni?

¹⁶ Ia ni sa veivosaki tiko kaya, sa kaya vua, O sa lesi beka mo dua vei ira na lewe ni nona bose na tui? kua so; e na vuku ni cava ko via moku? A sa kua so na parofita, ka sa kaya, Au sa kila ni sa nakita na Kalou me vakarusai kemuni, ni kemuni sa kitaka na ka oqo, ka sega ni vakarorogo ki na noqu vosa.

¹⁷ Sa qai ia na bose ko Amasaia na tui Juta, ka vakatadu mata kivei Joasi na luve i Jioaasi, na luve i Jeu, na tui Isireli, a sa kaya, Mo lako mai, me daru veikune mada.

¹⁸ A sa talaki ko Joasi na tui Isireli kivei Amasaia na tui Juta, ka kaya, E dua na wa-vakavotona mai Lepanoni sa talaki ki na dua na vu ni sitari mai Lepanoni, ka kaya, Mo musuka mada na luvemu yalewa vua na luvequ tagane me watina; a sa lako yani e dua na manumanu kila mai Lepanoni, ka butuka sobu na wa-vakavotona.

¹⁹ O sa kaya, Raica, ka'u sa mokuti ira oti na kai Itomi; ka sa vakadoudoutaki iko na lomamu mo bole; mo tiko ga e nomu yasana; o na yavavala e na vuku ni cava, mo bale kina, ko iko, kei kemudou vata kei ira na Juta?

²⁰ A sa bese ni rogoca ko Amasaia; ni sa vu mai vua na Kalou, me soli ira kina ki na ligadra na meca, ni ra sa goleva na kalou ni Itomi.

²¹ A sa lako cake ko Joasi na tui Isireli; ka rau sa veikune, o koya kei Amasaia na tui Juta, mai Peci-semesi, ko ya na nodra na Juta.

²² A sa mokuti ira na Juta ko ira na Isireli, a ra sa dui dro na tamata yadua ki na nona vale laca.

²³ Ia ko Joasi na tui Isireli sa tauri Amasaia na tui Juta, na luve i Joasi, na luve i Jioaasi, mai Peci-semesi, ka kauti koya ki Jerusalemi, ka basuka sobu na bai mai Jerusalemi mai na matamata-ni-koro nei Ifireimi ki na matamata-ni-koro e tutuna, e va na drau na kiupiti.

²⁴ A sa kau kecega na koula kei na siliva, kei nai yaya kecega sa kune e na vale ni Kalou vei Opeti-itomi, kei nai yau ni vale ni tui, kei ira na tamata mei vakadinadina ni sautu, ka sa lesu tale ki Samaria.

²⁵ A sa bula tiko ka yabaki tinikalima ko Amasaia, na luve i Joasi na tui Juta, ni sa mate ko Joasi luve i Jioaasi na tui Isireli.

²⁶ Ia na kena vo ni cakacaka i Amasaia, a kenai vakatekivu, kei na kenai otioti, raica, sa sega li ni volai e na kedrai vola na tui Juta kei Isireli?

²⁷ Ia e na gauna ka lesu tani kina ko Amasaia me kua ni muri Jiova, era sa buki kena vere mai Jerusalemi, ka sa dro ko koya ki Lakisi: a ra sa talai ira eso me muri koya ki Lakisi, ka vakamatei koya maikea.

²⁸ A ra sa kauti koya mai e na daku ni ose, ka buluta vata kei ira na nona qase e na koro nei Juta.