2 Veigauna 23 - Vakavakadewa Makawa

Sa buli ko Joasi me tui Juta; sa moku ko Acalaia; a sa vakarota vakavinaka nai soro ko Jioiata na bete.

¹ A sa vakaukauwataki koya ko Jioiata e na kenai kavitu ni yabaki, ka sa kauti iratou na turaga ni yayadrau, ko Asaraia na luve i Jiroami ka tagane, kei Isimeli na luve i Jioanani ka tagane, kei Asaraia na luve i Opeti ka tagane, kei Meesea na luve i Ataia ka tagane, kei Ilisafati na luve i Sikiri ka tagane, me ia vata kaya na veiyalayalati.

² A ratou sa veilakoyaki e Juta, ka vakasoqoni ira vata na Livai mai na veikoro kecega e Juta, kei ira na nodra qase turaga na Isireli, a ra sa lako mai ki Jerusalemi.

³ A ra sa ia na veiyalayalati kei na tui e na vale ni Kalou ko ira nai soqosoqo taucoko. A sa kaya vei ira ko koya, Raica, ena lewa tiko na luve ni tui, me vaka sa vosataki ira na luve i Tevita ko Jiova.

⁴ Oqo na ka mo dou kitaka: Me wase tolu koi kemudou na bete kei kemudou na Livai, sa daucuru e na siga ni vakacecegu ka me dua na kena wase mei vakatawa ni katuba;

⁵ ka me dua na kena wase me tiko e na vale ni tui; ka me tiko e na matamata-ni-koro ni yavu nai katolu ni wase: ka na tiko ko ira kecega na tamata e na lomanibai ni vale i Jiova.

⁶ Ia, me kakua ni curu e dua ki loma ni vale i Jiova, ko ira ga na bete, kei ira na Livai era sa vakaitavi tiko; era na curu ko ira ni ra sa savasava: ia ko ira kece na tamata era na ia na vakatawa sa vakarota ko Jiova.

⁷ Ia era na vakavolivoliti koya na tui ko ira na Livai, ka ra na taura yadua na nonai yaragi; ia ko ira kece na tani sa curu ki loma ni vale, ena vakamatei: ia koi kemudou, dou tiko vata kei na tui, ni sa curu mai ko koya ka ni sa curu yani.

⁸ A ra sa kitaka ko ira na Livai kei ira kecega na Juta me vaka na ka kecega sa vakarota ko Jioiata na bete, a ra sa dui kauti ira na nodra tamata, ko ira sa nodra i tavi me curu ki loma e na siga ni vakacecegu, kei ira sa nodra i tavi me curu yani ena siga ni vakacecegu: ni sa sega ni sereki ira era sa dauveitaravi ko Jioiata na bete.

⁹ Sa solia talega ko Jioiata na bete kivei ira na turaga ni yayadrau na moto, kei nai sasabai lalai, kei nai sasabai kece, ka nei Tevita na tui, ka tu e na vale ni Kalou.

¹⁰ A sa lesi ira kecega na tamata, me ra dui taura tu na tamata yadua na nonai yaragi, mai na yasana i matau ni vale ni soro, ka yaco ki na yasana i mawi ni vale ni soro, e na yasa ni cabocabo-ni-soro kei na vale ni soro, ka vakavolivolita na tui.

¹¹ Era sa qai kauta mai na luvena na tui, ka vakaisalataka e nai sala vakatui, ka solia vua nai vola ni vunau, ka buli koya me tui. A ra sa lumuti koya ko Jioiata kei iratou na luvena, a ra sa kaya, Me bula na tui.

¹² Ia ni sa rogoca ko Acalaia na nodra ue na tamata ni ra sa cici, ka vakarokorokotaka na tui, sa lako mai ko koya kivei ira na tamata ki na vale i Jiova:

¹³ a sa rai yani ko koya, ka raica, sa wavu tu na tui e na nonai tutu e nai curucuru kei ira vata kaya na turaga kei na davui voleka vua na tui: a ra sa reki ko ira kecega na lewe ni vanua, ka ra uvu davui; kei ira talega na dausere era taura na ka domo vinaka, ka liutaka na sere ni vakavinavinaka. Sa qai dresulaka na nonai sulu ko Acalaia, ka kaya, Na vere, na vere.

¹⁴ Sa qai kauti ira mai na turaga ni yayadrau era sa lesi me lewa nai valu ko Jioiata na bete, ka kaya vei ira, kauti koya tani ki tautuba e na maliwa ni veiyatu: ia kevaka sa muri koya e dua, me vakamatei e nai seleiwau. Ni sa kaya na bete, Me kakua ni vakamatei ko koya e na vale i Jiova.

¹⁵ A ra sa tauri koya; ia ni sa yaco ki na matamata-ni-koro ni ose, o koya sa voleka ki na vale ni tui, era a vakamatei koya kina.

¹⁶ A sa ia na veiyalayalati ko Jioiata kei ira kecega na tamata, kei koya na tui, me ra nona tamata ko Jiova.

¹⁷ Sa ra qai lako ko ira kecega na tamata ki na bure kalou i Peali, ka basuraka sobu, ka basuraka na nonai cabocabo-ni-soro kei na nona matakau, ka ra sa vakamatei Matani na bete i Peali e na mata ni cabocabo-ni-soro.

¹⁸ A sa lesia ko Jioiata na tamata turaga e na vale i Jiova me ra muri ira na bete kei ira na Livai, ko ira sa lesia ko Tevita me ra dui tiko e nona yasana e na vale i Jiova, me cabora na veisoro kama i Jiova, me vaka sa volai e na vunau i Mosese, ka ia na reki kei na sere me vaka sa vakarota ko Tevita.

¹⁹ A sa lesi ira nai vakatawa me tiko ki na matamata-ni-koro ni vale i Jiova, me kakua ni curu kina e dua sa sega ni savasava e na vuku ni dua na ka.

²⁰ A sa kauti ira na turaga ni yayadrau, kei ira na turaga, kei ira na nodra turaga na tamata, kei ira kecega na lewe ni vanua, ka kauti koya sobu na tui mai na vale i Jiova: a ra sa curuma na matamata-ni-koro e cake ki na vale ni tui, ka ra sa vakatikora na tui e nai tikotiko vakatui ni matanitu.

²¹ A sa reki kecega na lewe ni vanua: ka sa vakacegu na koro, ni ra sa vakamatei Acalaia e nai seleiwau.