2 Veigauna 22 - Vakavakadewa Makawa

Sa tui Juta ko Easaia, a sa levu na nonai valavala ca.

¹ A ra sa buli Easaia na luvena tagane ka gone, me tui me kenai sosomi, ko ira na kai Jerusalemi: ni ra sa vakamatei iratou kecega na luvena tagane era sa qase, ko ira na mataivalu era a lako vata kei ira na kai Arepea ki na koro. A sa tui ko Easaia na luve i Jiorami na tui Juta.

² Sa vasagavulu ka rua na yabaki i Easaia ni sa buli me tui, ka sa lewa e Jerusalemi ka yabaki dua. Na yaca i tinana ko Acalaia na luve i Omirai.

³ Sa muria talega ko koya nai valavala ni mataqali i Eapi: ni sa vakavulici koya ko tinana me cakava na ka ca.

⁴ A sa caka ca e na mata i Jiova me vaka na mataqali i Eapi: ni ra sa nonai vakavuvuli ni sa mate ko tamana, ka sa rusa kina ko koya.

⁵ Sa muria talega na nodra i vakavuvuli, ka lako vata kei Jiorami na luve i Eapi na tui Isireli me veivala kei Eseeli na tui Siria mai Remoci-kiliati: a ra sa vuetaki Jorami ko ira na kai Siria.

⁶ A sa lesu ko koya ki Jesirieli me bula mada mai na nona vue ka vuetaki kina mai Rama, ni sa vala kei Eseeli na tui Siria. A sa lako sobu ko Asaraia na luve i Jiorami na tui Juta ki Jesirieli me raici Jiorami na luve i Eapi, ni sa tauvi mate ko koya.

⁷ A sa vu mai vua na Kalou na rusa i Easaia ni sa lako mai kivei Jorami: io ni sa lako mai, sa rau lako vata kei Jiorami me veivala kei Jeu na luve i Nimesai, ko koya ka lumuta ko Jiova me vakawabokotaka na mataqali i Eapi.

⁸ Ia ni sa vakayacora tiko na cudru ki na mataqali i Eapi ko Jeu, sa kunei ira na nodra turaga na Juta, kei iratou na luvedratou na taci i Easaia, ko iratou sa qaravi Easaia; a sa vakamatei iratou ko koya.

⁹ A sa qarai Easaia ko koya: ka ra sa tauri koya, (ni sa vuni tu mai Samaria,) ka ra kauta kivei Jeu: ia ni ra sa vakamatei koya, era sa buluta: ni ra sa kaya, Sa luve i Jiosafati, ko koya ka qaravi Jiova e na yalona taucoko. A sa sega ni kaukauwa na mataqali i Easaia me ra taura rawa tiko na matanitu.

¹⁰ Ia ni sa raica ko Acalaia na tina i Easaia ni sa mate na luvena, sa ia ko koya ka vakamatea kecega na kawa ni tui e na nodra mataqali na Juta.

¹¹ A sa kauti Joasi na luve i Easaia ko Jiosapici na luvena yalewa na tui, ni sa butakoci koya maivei iratou na luve ni tui eratou sa vakamatei, ka kauti rau kei na nonai mei ki na dua na vale ni ka ni mocemoce. A sa vunitaki koya ko Jiosapici na luve i Jiorami na tui, na wati i Jioiata na bete, (ni sa gane i Easaia ko koya,) me kakua ni kunei koya ko Acalaia, a sa sega kina ni vakamatei koya.

¹² A sa tiko vei ira, ka sa vuni tu e na vale i Jiova, ka yabaki ono: ka sa lewa na vanua ko Acalaia.