2 Veigauna 18 - Vakavakadewa Makawa

Erau tovata ko Jiosafati kei Eapi, ka la'ki vala ki Remoci-kiliati, ka mate kina ko Eapi.

¹ A sa ka levu na nonai yau ko Jiosafati, ka sa dokai vakalevu, ka sa vakawati kei na mataqali i Eapi.

² Ia ni sa oti eso na yabaki sa lako sobu ko koya kivei Eapi ki Samaria. A sa vakamatea ko Eapi na sipi kei na pulumokau a ka levu me kena, me kedra talega era tiko vata kaya, a sa cikevi koya me lako ki Remoci-kiliati.

³ A sa kaya ko Eapi na tui Isireli kivei Jiosafati na tui Juta, O na lako vata kei au ki Remoci-kiliati, se segai? a sa qai kaya vua, Koi kedaru vata ga; sa dua vata ga na nodaru tamata; ia keimami na dua vata kei iko e nai valu.

⁴ A sa kaya vua na tui Isireli ko Jiosafati, Mo taroga mada na vosa i Jiova edaidai.

⁵ A sa vakasoqoni ira vata kina na tui Isireli, na parofita era le va na drau na tamata, ka sa kaya vei ira, Me keimami lako ki Remoci-kiliati me ia nai valu, se me'u kakua? A ra sa kaya, Ni lako ga, ka na solia na Kalou kivei koya na tui.

⁶ A sa kaya ko Jiosafati, Sa sega beka ni tiko eke e dua tale na parofita i Jiova, me daru taroga vua?

⁷ A sa kaya vei Jiosafati ko koya na tui Isireli, Sa dua tale na tamata, eda tarogi Jiova rawa kina: ia ka'u sa cati koya; ni sa sega ni parofisaitaka na ka vinaka e na vukuqu, sa parofisaitaka tikoga na ka ca: ko koya ko Maikaia na luve i Imila. Ka sa kaya ko Jiosafati, Me kakua ni kaya vaka ko ya ko koya na tui.

⁸ Sa qai kaciva e dua na turaga na tui Isireli, ka kaya, Me kusarawa mai ko Maikaia na luve i Imila.

⁹ A rau sa dui tiko e nonai tikotiko vakaturaga, na tui Isireli kei Jiosafati na tui Juta, e na rara mai na matamata-ni-koro ni Samaria, a rau sa vakaisulu vakaturaga; a ra sa ia tiko na parofisai e matadrau ko ira kecega na parofita.

¹⁰ A sa cakava ko Setekaia na luve i Kinana eso nai leu vakamanumanu e na aironi; a sa kaya, Sa vosa vakaoqo ko Jiova, O na cumuti ira na kai Siria e na veika oqo, ka me ra vakaoti laivi.

¹¹ Ka ra sa parofisai vakakina ko ira kecega na parofita, ka kaya, Mo lako cake ki Remoci-kiliati, ka mo gumatua; ka na solia ko Jiova ki na ligana na tui.

¹² A sa kaya vei Maikaia na tamata ka la'ki kaciva, Raica, sa tautauvata na nodra vosa na parofita, ka ni ra tukuna ga na ka vinaka vua na tui: ia me tautauvata mada na nomu vosa kei na nona vosa e dua vei ira, ka mo cavuta na ka vinaka.

¹³ A sa kaya ko Maikaia, Me vaka sa bula ko Jiova, na ka sa kaya vei au ko Jiova, oqori ga ka'u na vosataka.

¹⁴ Ia ni sa lako mai ko koya vua na tui, sa kaya vei koya na tui, I Maikaia, me keimami lako ki Remoci-kiliati me vala, se me'u kakua? A sa kaya ko koya, Ni lako cake, ka mo ni gumatua; ia era na soli ki na ligamuni.

¹⁵ A sa kaya vua na tui, Me'u vakabubuluitaki iko vakavica, mo cavuta vei au e na yaca i Jiova na ka dina?

¹⁶ A sa kaya ko koya, Au a raici ira kecega na Isireli, ka ra dui se e na veiulu-ni-vanua, me vaka na sipi sa sega na nodra i vakatawa: ka sa kaya ko Jiova, Sa sega na nodra turaga ko ira oqo: me ra dui lesu e na vakacegu ki na nona vale.

¹⁷ A sa kaya vei Jiosafati na tui Isireli, Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?

¹⁸ Sa kaya tale ko koya, O koya oqo, mo ni rogoca kina na vosa i Jiova: Au a raici Jiova, ni sa tiko e nonai tikotiko vakaturaga, ka ra sa tiko voleka vua e nai matau kei nai mawi ko ira kecega na lewe i lomalagi.

¹⁹ A sa kaya ko Jiova, O cei ena temaki Eapi na tui Isireli, me lako cake me bale mai Remoci-kiliati? A sa vosa e dua ka vaka, a sa vosa e dua tani ka vaka.

²⁰ A sa lako mai e dua na yalo, ka la'ki tu e na mata i Jiova, ka kaya, Oi au ga, ka'u na temaki koya. Ka sa kaya vua ko Jiova, E na cava?

²¹ A sa kaya ko koya, Au na lako yani, ia ka'u na yalo lasulasu e na gusudra kecega na nona parofita. A sa kaya ko koya, O na temaki koya, ka ko na rawai koya talega: mo lako yani, ka kitaka vakakina.

²² Ia oqo, raica sa vakacuruma ko Jiova na yalo lasulasu e na gusudra na nomuni parofita oqo, a sa vosataka na ka ca ko Jiova, me yacovi kemuni.

²³ A sa toro mai ko Setekaia na luve i Kinana, ka sabici Maikaia e baluna, ka sa kaya, A sala cava ka lako tani kina vei au na Yalo i Jiova me vosa vei iko?

²⁴ Ka sa kaya ko Maikaia, Raica, ko na kunea e na siga ko ya ko na curu kina ki loma ni loqi, mo vunitaki iko.

²⁵ A sa kaya na tui Isireli, Dou kauti Maikaia tale kivei Emoni, na turaga ni koro, kei Joasi na luve ni tui;

²⁶ ka kaya, Sa vosa vakaoqo na tui, Drau biuta na tamata la oqo ki na vale ni veivesu, ka vakani koya e na madrai ni veivakararawataki, kei na wai ni veivakararawataki, ka me'u tale vakacegu mada mai.

²⁷ A sa kaya ko Maikaia, Kevaka ko ni na lesu vakaidina mai e na vakacegu, sa qai sega ni vosa e gusuqu ko Jiova. Ka sa kaya, Ni rogoca mada, koi kemuni kecega na tamata.

²⁸ A rau sa lako cake ki Remoci-kiliati, na tui Isireli kei Jiosafati na tui Juta.

²⁹ A sa kaya vei Jiosafati na tui Isireli, Au na liatamata tani koi au, ka lako ki nai valu; ia mo vakaisulutaki iko e na nomu i sulu ga. A sa liatamata tani na tui Isireli, ka rau a lako ki nai valu.

³⁰ Ia sa vakarota ko koya na tui Siria vei ira na nona turaga ni qiqi-ni-valu, ka kaya, Dou kakua ni veivala kaya e dua e lailai, se dua e levu, vei koya duaduaga na tui Isireli.

³¹ Ia ni ra sa raici Jiosafati ko ira na turaga ni qiqi-ni-valu, era kaya, Oqori ga na tui Isireli. A ra sa vakavolivoliti koya me veivala kaya: a sa qoqolou ko Jiosafati, a sa vukei koya ko Jiova; a sa vakauqeti ira na Kalou me ra lako tani vua.

³² Ia ni ra sa raica ko ira na turaga ni qiqi-ni-valu ni sa sega ni tui Isireli ko koya, era sa lesu ki muri, me kakua ni vakasavi koya.

³³ A sa dua na tamata sa kaloca vakailoa ga na dakai, ka vanai koya na tui Isireli e na tikina sa veiuturi kina na nonai sulu ni valu: a sa kaya ko koya vua sa vakacici ose ni nona qiqi-ni-valu, Mo vakalesuya na ligamu, ka kauti au tani mai nai valu, ni'u sa vuetaki.

³⁴ A sa levu cake tiko nai valu e na siga ko ya: ia sa vakaukauwataki koya na tui Isireli me duri rawa tiko e na nona qiqi-ni-valu, me vala kei ira na kai Siria, ka yacova na yakavi: ka sa mate ko koya ni sa vakarau dromu na mata-ni-siga.