2 Veigauna 14 - Vakavakadewa Makawa

Sa tui Juta ko Esa; a sa gumatua ni rau a veivala kei Sira mai Kusi.

¹ A sa moce kei ira na nona qase ko Apaija, a sa bulu e na koro i Tevita: ka sa lewa ko Esa na luvena, me kenai sosomi. Sa sautu na vanua ka yabaki tini e na nona gauna.

² A sa caka vinaka ka dodonu e na mata i Jiova na nona Kalou ko Esa:

³ ni sa kauta tani ko koya nai cabocabo-ni-soro tani, kei na veitikina cecere, a sa musumusuka na matakau, ka taya sobu na veikalou-yalewa ni veikau:

⁴ a sa vakaroti ira na Juta me ra golevi Jiova na Kalou ni nodra qase, ka muria na vunau kei nai vakaro.

⁵ A sa kauta tani mai na nodra veikoro kecega na Juta na veitikina cecere kei na matakau: ka sa sautu na matanitu e na nona lewa.

⁶ A sa tara e Juta eso na koro vakabai: ni sa sautu na vanua, ka sega na nonai valu e na veiyabaki oqori; ni sa vakasaututaki koya ko Jiova.

⁷ A sa kaya kina vei ira na Juta, Me da tara na veikoro oqo, ka viria na kena bai me vakavolivolita, kei na vale ni vakatawa, kei na veimatamata-ni-koro, kei na kena samugakagaka; ni sa noda tiko na vanua, ni keimami sa golevi Jiova na neimami Kalou; keimami sa qaravi koya, ka sa vakasaututaki keimami e na veiyasana kecega. A ra sa mai tara ka ra sa yaco sara.

⁸ A sa dua na mataivalu i Esa era sa taura nai sasabai kei na moto, sa le tolusagavulu na oba mai Juta; ka le ruasagavulu ka walu na oba mai Penijamini era sa taura nai sasabai ka loka dakai tiko: ko ira kecega oqo era sa tamata i valu qaqa.

⁹ A sa lako mai me vala kei ira ko Sira na kai Iciopea, ia na nona mataivalu sa le oba vakadrau, ka tolu na drau na qiqi-ni-valu: a ra sa lako mai ki Maresa.

¹⁰ A sa curu yani ko Esa me vala kaya, a rau sa tuva na nodraui valu e na buca i Sifaca mai Maresa.

¹¹ A sa tagi ko Esa vei Jiova na nona Kalou, ka kaya, Kemuni Jiova, sa ka rawarawa vei kemuni me veivuke kei ira na lewe vuqa, se me veivuke kei ira sa sega vei ira na kaukauwa: mo ni vukei keimami, kemuni Jiova na neimami Kalou; ni keimami sa vakararavi vei kemuni, ka sa mai vala e na yacamuni ga kei ira na lewe vuqa oqo. I Jiova, ko ni sa neimami Kalou; me kakua ni gumatua na tamata vei kemuni.

¹² A sa mokuti ira na kai Iciopea ko Jiova e na mata i Esa, kei na matadra na Juta; a ra sa dro ko ira na kai Iciopea.

¹³ A sa vakasavi ira ko Esa, kei ira na tamata era tiko vata kaya, ka yaco ki Kira: ka ra sa moku mate ko ira na kai Iciopea, ka ra sa sega tale ni kaukauwa rawa; ni ra sa vakarusai e na mata i Jiova, kei ira na nona mataivalu; ia sa ka levu sara nai yau era sa tokitaka.

¹⁴ A ra sa samuta na veikoro kecega e vakavolivoliti Kira; ni sa kani ira na rerevaki Jiova: a ra sa tokitaka nai yau ni veikoro kecega; ni sa ka levu vakaidina nai yau sa tiko kina.

¹⁵ A ra sa samuta na veivale laca ni pulumokau, ka kauta yani na sipi, kei na kameli, a ka levu, a ra sa lesu tale ki Jerusalemi.