2 Veigauna 13 - Vakavakadewa Makawa

Sa tui ko Apaija; a sa gumatua ni rau a vala kei Jeropoami na tui Isireli.

¹ Ia e na kenai katinikawalu ni yabaki i Jeropoami na tui, sa buli me tui Juta ko Apaija.

² Sa tui tiko mai Jerusalemi ka yabaki tolu. Ia na yaca i tinana ko Mekaia, na luve i Urieli mai Kipea. A rau sa veivala ko Apaija kei Jeropoami.

³ A sa tuvai valu ko Apaija; era sa mataivalu qaqa, sa le vasagavulu na oba era tamata digitaki: a sa tuvai valu talega ko Jeropoami me veivaluti kaya, kei ira vata na tamata digitaki e le walusagavulu na oba, era tamata i valu qaqa.

⁴ A sa tu cake ko Apaija e na dela ni ulu-ni-vanua ko Simareimi, oqori e na ulu-ni-vanua nei Ifireimi, a sa kaya, Dou rogoci au mai, ko iko Jeropoami, kei kemudou kecega na Isireli;

⁵ sa sega li ni kilikili kei kemudou, mo dou kila ni ka solia ko Jiova na nodra Kalou na Isireli vei Tevita me lewai ira na Isireli ka tawa mudu, io, vei koya kei ira na luvena, ni sa veiyalayalatitaka kei na masima.

⁶ Ia ka sa tu cake ko Jeropoami, na luve i Nipati, e dua na tamata i Solomoni na luve i Tevita, a sa vuki tani maivua na nona turaga.

⁷ A sa soqoni vata vei koya na tamata lialia eso, na luve ni vu-ni-ca, a ra sa vakaukauwataki ira me ra biuti Riopoami na luve i Solomoni, ni sa gone ga ko Riopoami ka yalowai, ka sega ni vorati ira rawa.

⁸ Ia edaidai dou sa nanuma mo dou vorata na matanitu i Jiova ka tu ga vei iratou na luve i Tevita: ia dou sa lewe vuqa, ka sa tiko vata kei kemudou na luve ni pulumokau koula ruarua ka cakava ko Jeropoami me nomudou Kalou.

⁹ Dou sa sega li ni biuti ira tani na bete i Jiova, ko ira na luve i Eroni, kei ira na Livai, ka lesia na nomudou bete me vaka na veimatanitu ni veivanua? sa yaco me bete vei ira era sa sega ni kalou, ko ira yadua sa la'ki kauta e dua na luve ni pulumokau, ka vitu na sipi tagane, me vakatabui koya kina.

¹⁰ Ia koi keimami, sa neimami Kalou ga ko Jiova, ia keimami sa sega ni biuti koya; kei ira na bete, era sa qaravi Jiova tiko, era sa luve i Eroni, kei ira na Livai era kitaka tiko na nodra i tavi:

¹¹ ia e na veimataka kei na veiyakavi kecega era sa vakama vei Jiova nai soro kama kei na ka boi vinaka: era sa vakarautaka talega na madrai dauyatuni e dela ni tepeli savasava; kei nai tutu-ni-cina koula kei na kena cina, me caudre e na veiyakavi: ni keimami sa vakabauta nai lesilesi i Jiova na neimami Kalou; ia koi kemudou, dou sa biuti koya.

¹² Ka raica, sa tiko kei keimami na Kalou, me neimami vu-ni-valu, kei ira na nona bete, kei na davui rorogo me vakatagi na nomudou i tutu. Oi kemudou na Isireli, kakua ni dou veivala kei Jiova na Kalou ni nomudou qase; ni dou na sega ni gumatua.

¹³ A sa talai ira na bikalawa ko Jeropoami me ra sa vakasaraviravi ira ki dakudra: ia era sa tu e matadra na Juta, ka tiko ko ira na bikalawa mai dakudra.

¹⁴ Ia ni sa rai ki muri ko ira na Juta, raica, sa tiko e matadra nai valu, e dakudra talega: ka ra sa tagi vei Jiova, ka vakatagi davui ko ira na bete.

¹⁵ A ra sa qoqolou ko ira na Juta: a sa yaco ni sa qoqolou tiko ko ira na Juta, sa yaviti Jeropoami kei ira kecega na Isireli na Kalou, e na mata i Apaija kei ira na Juta.

¹⁶ A sa dro ko ira na Isireli e matadra na Juta: ka sa soli ira na Kalou ki na ligadra.

¹⁷ A sa mokuti ira e na moku levu ko Apaija kei ira na nona tamata: a sa bale mate kina vei ira na Isireli e le limasagavulu na oba era tamata digitaki.

¹⁸ A ra sa vakamalumalumutaki ko ira na Isireli e na siga ko ya, ka ra sa gumatua ko ira na Juta, ni ra sa vakararavi vei Jiova na Kalou ni nodra qase.

¹⁹ A sa vakasavi Jeropoami ko Apaija, a sa rawata eso na nona veikoro, ko Peceli kei na kena veikoro, kei Jisana kei na kena veikoro, kei Ifironi kei na kena veikoro.

²⁰ A sa sega ni kaukauwa tale ko Jeropoami e na gauna i Apaija: a sa vakayaco mate vua ko Jiova, a sa mate kina ko koya.

²¹ A sa tubu me kaukauwa tiko ko Apaija, a sa veiwatini kei na yalewa e le tinikava, a sa vakatubura e lewe ruasagavulu ka rua na luvena tagane, ka le tinikaono na luvena yalewa.

²² Ia na kena vo ni cakacaka i Apaija, kei na nonai valavala, kei na nona vosa, sa volai e nai tukutuku ni parofita ko Ito.