2 Veigauna 12 - Vakavakadewa Makawa

Sai valavala ca ko Riopoami, a sa yaco kina nai valu ki Jerusalemi: sa qai veivutuni ko Riopoami kei ira na tamata, era sa sega kina ni vakarusai.

¹ Ia ni sa vakataudeitaka na matanitu ko Riopoami, ka vakaukauwataki koya, sa biuta na vunau i Jiova ko koya, kei ira vata kaya na Isireli kecega.

² Ia e na kenai kalima ni yabaki i Riopoami na tui, sa la'ki vala ki Jerusalemi ko Sisaki na tui Ijipita, ni ra a talaidredre vei Jiova,

³ a sa lako vata kaya e tinikarua na drau na qiqi-ni-valu, ka le ono na oba na tamata dauvodo ose: a sa sega ni wili rawa ko ira na tamata era sa lako vata kaya mai Ijipita: ko ira na kai Lipea, ko ira na Sukiyi, kei ira na kai Iciopea.

⁴ A sa rawa na veikoro vakabai sa nei Juta, ka lako ki Jerusalemi.

⁵ Sa qai lako ko Semaia na parofita kivei Riopoami, kei ira na turaga ni Juta, era sa soqoni vata ki Jerusalemi e na vuku i Sisaki, a sa kaya vei ira, Sa vosa vakaoqo ko Jiova, Dou sa biuti au, ia ka'u sa biuti kemudou kina ki na liga i Sisaki.

⁶ A ra sa qai vakamalumalumutaki ira, ko ira na turaga ni Isireli kei na tui; a ra sa kaya, Sa yalododonu ko Jiova.

⁷ Ia ni sa raica ko Jiova ni ra sa vakamalumalumutaki ira, sa qai yaco mai na vosa i Jiova kivei Semaia, ka kaya, Era sa vakamalumalumutaki ira; au na sega ni vakarusai ira, ia ka'u na vakabulai ira malua; ena sega talega ni sovaraki ki Jerusalemi na noqu cudru e na liga i Sisaki.

⁸ Ia era na nona bobula; me ra kila kina na kenai valavala ni qaravi au, kei na kenai valavala ni qaravi ira na veimatanitu ni veivanua.

⁹ A sa lako mai ko Sisaki na tui Ijipita me kabai Jerusalemi, ka tokitaka nai yau ni vale i Jiova, kei nai yau ni nona vale na tui; sa kauta kecega: sa kauta tani talega nai sasabai koula ka cakava ko Solomoni.

¹⁰ A sa vakaisosomitaka ko Riopoami na tui e nai sasabai parasa, ka solia vei ira na nodra turaga nai vakatawa era sa vakatawa na katuba ni nona vale na tui.

¹¹ Ia ni sa la'ki curu na tui ki na vale i Jiova, sa lakova nai sasabai ko ira nai vakatawa, ka kauta tale ki na vale ni vakatawa.

¹² Ia ni sa vakamalumalumutaki koya, sa suka tani maivua na cudru i Jiova, a sa sega kina ni vakarusai koya sara: ia sa kune talega eso na ka vinaka e Juta.

¹³ A sa vakaukauwataki koya ko Riopoami na tui e Jerusalemi, ka sa lewa tiko: sa vasagavulu ka dua na yabaki i Riopoami ni sa buli me tui, a sa lewa mai Jerusalemi ka yabaki tinikavitu, na koro ka digitaka ko Jiova mai na nodra veimataqali kecega na Isireli, me vakatikora kina na yacana. Ia na yaca i tinana ko Neema, na yalewa i Amoni.

¹⁴ Ka sai valavala ca ga ko koya, ni sa sega ni vagolea na yalona me qaravi Jiova.

¹⁵ Ia na cakacaka i Riopoami, a kenai vakatekivu, kei na kenai otioti, sa sega li ni volai e nai vola sa baleta na veitabatamata erau vola ko Semaia na parofita, kei Ito na rairai? A sa sega ni mudu na nodrau veivala ko Riopoami kei Jeropoami.

¹⁶ A sa moce vata kei ira na nona qase ko Riopoami, a sa bulu e na koro i Tevita: a sa buli me tui ko Apaija na luvena, me kenai sosomi.