2 Veigauna 11 - Vakavakadewa Makawa

Sa vakaukauwataka na nona matanitu ko Riopoami.

¹ Ia ni sa yaco ki Jerusalemi ko Riopoami, sa vakasoqona vata ko koya, maivei ira na mataqali i Juta kei Penijamini, e le tinikawalu na oba na tamata digitaki era dauia nai valu, me la'ki veivala kei ira na Isireli, me vakalesuya tale na matanitu kivei Riopoami.

² A sa yaco mai na vosa i Jiova vei Semaia na tamata ni Kalou, ka kaya,

³ Mo vosa vei Riopoami, na luve i Solomoni, na tui Juta, kei ira kecega na Isireli mai Juta kei Penijamini, ka kaya,

⁴ Sa vosa vakaoqo ko Jiova, Dou kakua ni lako cake, se veivala kei ira na wekamudou; dou lesu yani na tamata yadua ki na nona vale; ni sai au ga na vu ni ka oqo. A ra sa vakarorogo ki na vosa i Jiova, ka lesu me ra kua ni la'ki vala kei Jeropoami.

⁵ A sa tiko mai Jerusalemi ko Riopoami, a sa tara eso na koro ni valu mai Juta.

⁶ A sa tarai Pecileema ko koya, kei Etami, kei Tikoa,

⁷ kei Peci-suri, kei Soko, kei Etulama,

⁸ kei Kaca, kei Maresa, kei Sifi,

⁹ kei Etorayimi, kei Lakisi, kei Aseka,

¹⁰ kei Sora, kei Eijaloni, kei Epironi, sa veikoro vakabai ka sa tu mai Juta kei Penijamini.

¹¹ A sa vakaukauwataka ko koya na veikoro ni valu, a sa lesia kina eso na kapiteni ni valu, ka sa binia kina na kakana, kei na waiwai, kei na waini:

¹² ka sa vakauta ki na koro yadua nai sasabai kei na moto, ka vakaukauwataka sara. Ka sa totaki koya ko Juta kei Penijamini.

¹³ A sa lako yani vei koya mai na nodra veiyasana kecega ko ira na bete kei ira na Livai era sa tiko e Isireli taucoko.

¹⁴ Ni ra a biuta na nodra vanua veico kei na nodra i votavota ko ira na Livai, ka lako ki Juta kei Jerusalemi: ni sa vakasivoi ira ko Jeropoami kei iratou na luvena, me ra kakua ni bete vei Jiova:

¹⁵ ka sa lesia e so na nona bete ki na veitikina cecere, kei na me tagane, kei rau na luve ni pulumokau ka cakava ko koya.

¹⁶ A sa muri ira, mai na nodra veimataqali kecega na Isireli, ko ira sa vagolea na lomadra me ra vakasaqarai Jiova na nodra Kalou na Isireli, era sa lako mai ki Jerusalemi, me ra vakacaboi soro vei Jiova na Kalou ni nodra qase.

¹⁷ A ra sa vakaukauwataka na matanitu i Juta, ka sa vakauwakauwataki Riopoami na luve i Solomoni, ka yabaki tolu: ni sa tolu na yabaki era sa muria nai valavala i Tevita kei Solomoni.

¹⁸ Ia ko Riopoami sa vakawati kei Meelaci na luve i Jirimoci na luve i Tevita ka tagane; kei Epaieli na luve i Iliapi na luve i Jese,

¹⁹ ko koya sa vakasucuma vua na gone tagane eso: ko Jiusi, kei Semaraia, kei Seami.

²⁰ Ia emuri sa vakawati kei Meeka na luve i Apisalomi; a sa vakasucumi Apaija, kei Atai, kei Sisa, kei Silomeci.

²¹ A sa levu na loloma i Riopoami kivei Meeka na luve i Apisalomi, ka lailai vei ira kecega na watina kei ira na watina lalai: (ni sa lewe tinikawalu na watina, ka le onosagavulu na watina lalai: ka sa lewe ruasagavulu ka walu na luvena tagane, ka le onosagavulu na luvena yalewa.)

²² A sa lesi Apaija na luve i Meeka ko Riopoami me turaga, me lewa vei ira na tacina: ni sa lomana me buli koya me tui.

²³ Ka sai valavala vakavuku ko koya, ka sa lesi ira na luvena kecega me ra dui tiko e na veivanua kecega i Juta kei Penijamini, ki na koro vakabai kecega: a sa soli kakana tiko vei ira, e dua na ka levu. A sa gadreva ko koya me lewe vuqa na watidra.