2 Veigauna 10 - Vakavakadewa Makawa

Sa buli me tui ko Riopoami; ka sai valavala kaukauwa ko koya, ka bese kina ni vakarogoci koya na mataqali e tini.

¹ A sa lako ki Sikemi ko Riopoami: ni ra sa lako mai ko ira kecega na Isireli ki Sikemi me buli koya me tui.

² Ia ni sa rogoca ko Jeropoami na luve i Nipati, ni sa tiko ga mai Ijipita, ni sa dro eliu mai na mata i Solomoni na tui, sa qai lesu mai Ijipita ko Jeropoami;

³ a ra sa talaki vua me lako mai; ka ra sa qai lako, ko Jeropoami kei ira kecega na Isireli, ka vosa vei Riopoami, ka kaya,

⁴ O tamamuni sa vakabibitaka na neimami tavi; ia oqo, mo ni vakamamadataka na cakacaka rarawa i tamamuni, kei nai tavi bibi sa lesia vei keimami ko koya; keimami na qai qaravi kemuni.

⁵ A sa kaya vei ira ko koya, Dou lako mada ga ka me bogi tolu, dou qai lako tale mai vei au. A ra sa lako tani na tamata.

⁶ A sa bose vata ko Riopoami na tui, kei ira na qase ka tu e na mata i Solomoni na tamana ni sa bula tiko ko koya, a sa kaya ko koya, Dou lewa mada se cava me'u kaya vei ira na tamata oqo?

⁷ A ra sa kaya vua, Kevaka ko na yalololoma vei ira na tamata oqo, ka vakayalovinakataki ira, ka vosataka vei ira na vosa vinaka, era na qai qaravi kemuni ka tawa mudu.

⁸ Ia sa biuta ko koya na nodra lewa na qase, na ka era sa tukuna vua, ka bose vata kei ira na cauravou era tubu vata kaya, era dautu e matana:

⁹ a sa kaya vei ira ko koya, A cava dou sa lewa me da vosataka vei ira na tamata oqo, ko ira ka vosa mai vei au, ka kaya, Mo ni vakamamadataka nai tavi ka lesia vei keimami ko tamamuni?

¹⁰ A ra sa kaya vua ko ira na cauravou era tubu vata kaya, Mo vosa vakaoqo vei ira na tamata era a vosa vei kemuni, ka kaya, Sa vakabibitaka na neimami tavi ko tamamuni, ia mo ni vakamamadataka vei keimami; mo ni vosa vakaoqo vei ira, A noqu i qaqalo lailai ena levu cake, ka lailai na tolo i tamaqu:

¹¹ ia oqo, sa bibi nai tavi sa lesia vei kemudou ko tamaqu, ia ka'u na vakaikuritaka na nomudou i tavi: sa vakanakuitataki kemudou ko tamaqu e na dali, ia koi au ka'u na vakanakuitataki kemudou e na kuita sa buki.

¹² A ra sa tale mai ko Jeropoami kei ira kecega na tamata kivei Riopoami e na kenai katolu ni siga, me vaka ka kaya eliu na tui, ni sa kaya, Dou lako tale mai vei au e nai katolu ni siga.

¹³ A sa vosa vakaukauwa ko koya na tui vei ira, ka biuta na nodra lewa na qase ko Riopoami na tui,

¹⁴ ka vosa vei ira me vaka na nodra lewa na cauravou, ka vaka, Sa vakabibitaka na nomudou i tavi ko tamaqu, ia ka'u na vakaikuritaka: sa vakanakuitataki kemudou ko tamaqu e na dali, ia koi au ka'u na vakanakuitataki kemudou e na kuita sa buki.

¹⁵ A sa sega ni vakarorogo na tui vei ira na tamata; ni sa vu vua na Kalou na ka oqo, me vakayacora na nona vosa ka vosataka ko Jiova e na gusu i Eaija, na kai Sailo, kivei Jeropoami na luve i Nipati.

¹⁶ Ia ni sa raica ko ira kecega na Isireli ni sa sega ni rogoci ira ko koya na tui, era sa qai vosa vua na tui ko ira na tamata, ka kaya, Keimami sai votavota vata vakaevei kei Tevita? ka sa sega na neimami votavota vata kei koya na luve i Jese: dou lako ki na nomudou veivale laca, koi kemudou yadua na Isireli! ia oqo, mo qarauna na nomu vale, Tevita. A ra sa lako kecega na Isireli ki na nodra veivale laca.

¹⁷ Ia ko ira na Isireli era tiko e na veikoro i Juta, sa turaga vei ira ko Riopoami.

¹⁸ A sa talai Atorami ko Riopoami na tui, ko koya ka lewa nai vakacavacava: a ra sa vakaviriki koya e na vatu ko ira na Isireli, a sa mate ko koya. A sa kusarawa kina ko Riopoami na tui me vodoka na nona qiqi-ni-valu, me dro ki Jerusalemi.

¹⁹ A ra sa vuki tani kina ko ira na Isireli mai na mataqali i Tevita, ka yacova na siga oqo.