2 Tui 8 - Vakavakadewa Makawa

Sa vakasuka vua na yalewa ni Sunemi ko koya na tui na nona vanua, 1-6. Sa vakamatea na tui Siria ko Esaeli, ka qai tui ko koya, 7-15. Sa tui Juta ko Jiorami, 16-19. Sa vuki ko Lipina kei Itomi, 20-24. Sa tui Juta ko Easaia, 25-29.

¹ A sa kaya ko Ilaisa vua na yalewa ka vakabula na luvena ko koya, Mo ia, ka mo dou lako kei ira na nomu lewe-ni-vale, ka la'ki tiko vulagi e na dua na vanua ko sa tiko vulagi rawa kina: ni sa vakayacora na dausiga ko Jiova; ka na dausiga na vanua ka yabaki vitu.

² A sa cavu tu na yalewa, ka sa muria na nona vosa na tamata ni Kalou: a sa lako yani ko koya kei iratou na nona lewe-ni-vale, ka tiko vulagi e na nodra vanua na kai Filisitia ka yabaki vitu.

³ Ia ni sa oti e vitu na yabaki, sa qai lesu mai na yalewa mai na nodra vanua na kai Filisitia, ka la'ki tagi vua na tui e na vuku ni nona vale kei na nona vanua.

⁴ A rau sa veivosaki tiko na tui kei Kiesai na nona cauravou na tamata ni Kalou, a sa kaya, Mo tukuna mada mai vei au na ka levu kecega ka cakava ko Ilaisa.

⁵ Ia ni sa tukuna tiko vua na tui ni ka vakabula ko koya e dua sa mate, sa qai lako mai na yalewa, o koya ka vakabula na luvena ko koya, ka mai tagi vua na tui e na vuku ni nona vale kei na nona vanua. A sa kaya ko Kiesai, Kemuni na noqu turaga na tui, oqo na yalewa, oqo talega na luvena ka vakabula ko Ilaisa.

⁶ A sa taroga na yalewa na tui, a sa tukuna vua ko koya. A sa lesia vua e dua na ovisa ko koya na tui, ka kaya, Mo vakasuka na nona ka kecega, kei na vua ni nona vanua kecega mai na siga ka lako tani kina e na vanua, ka yacova na siga oqo.

⁷ A sa lako ki Tamasiko ko Ilaisa; a sa tauvi mate ko Peni-etati na tui Siria; a sa tukuni vua, ka vaka, Sa lako mai ki ke ko koya na tamata ni Kalou.

⁸ A sa kaya vei Eseeli na tui, Mo kauta mada e dua na ka-ni-loloma, ka la'ki tavaki koya na tamata ni Kalou, ka tarogi Jiova vua, ka kaya, Au na bula tale mai na mate oqo, se segai?

⁹ A sa la'ki tavaki koya ko Eseeli, ka kauta e dua na ka-ni-loloma, io na ka eso mai na ka vinaka kecega e Tamasiko, e colata rawa na kameli e vasagavulu, ka la'ki tu e matana, ka kaya, Sa talai au vei iko na luvemu na tui Siria ko Peni-etati, me'u kaya, Au na bula tale mai na mate oqo, se segai?

¹⁰ A sa kaya vua ko Ilaisa, Mo la'ki kaya vua, E rawa ga mo bula: ia sa vakatakila vei au ko Jiova, ni na mate vakaidina ko koya.

¹¹ A sa vakaraici koya matua sara vakadede ka qai madua; a sa tagi ko koya na tamata ni Kalou.

¹² A sa kaya ko Eseeli, A cava ko sa tagi kina na noqu turaga? A sa kaya ko koya, Ni'u sa kila na ka ca ko na cakava vei ira na Isireli: a nodra veikoro vakabai, ko na vakama, kei ira na nodra cauravou ko na vakamatea e nai seleiwau, kei ira na nodra gone lalai ko na botobotolaki ira vakalalai, ka tavai ira na nodra yalewa era sa bukete tu.

¹³ A sa kaya ko Eseeli, Au sa koli beka koi au na nomu tamata, me'u kitaka na ka levu oqo? A sa kaya ko Ilaisa, Sa vakatakila vei au ko Jiova ni ko na tui Siria.

¹⁴ Sa qai lako tani vei Ilaisa ko koya, ka lako vua na nona turaga; a sa kaya vua ko koya, A cava sa kaya vei iko ko Ilaisa? A sa kaya ko koya, Sa kaya vei au ni ko na bula vakaidina.

¹⁵ Ia e na mataka, sa kauta ko koya nai tutuvi, ka tonisua e na wai, ka tevuka ki na matana, a sa mate kina: a sa tui ko Eseeli, me kenai sosomi.

¹⁶ Ia e na kenai kalima ni yabaki i Jorami na tui Isireli, na luve i Eapi, ni sa tui Juta ko Jiosafati, sa tekivu me lewa ko Jiorami na luve i Jiosafati na tui Juta.

¹⁷ Sa tolusagavulu ka rua na nona yabaki ni sa buli me tui; a sa tui tiko mai Jerusalemi ka yabaki walu.

¹⁸ A sa muria ko koya na nodra i valavala na tui Isireli, me vaka sa cakava na mataqali i Eapi: ni sa watina na luve i Eapi: a sa daucaka ca ko koya e na mata i Jiova.

¹⁹ Ia sa sega ni via vakawabokotaki ira na Juta ko Jiova, e na vuku i Tevita na nonai talatala, me vaka ka kaya vua me solia tikoga vua na cina, vei ira talega na luvena.

²⁰ E na nona gauna sa bese ni qaravi ira tiko na Juta ko ira na Itomi, ka bulia e dua tani me nodra tui.

²¹ A sa lako yani ko Jorami ki Sea, ka lako vata kaya na qiqi-ni-valu kecega: a sa tu cake ko koya e na bogi, ka mokuti ira na kai Itomi era sa vakavolivoliti koya, kei ira na kapiteni ni qiqi-ni-valu: a ra sa dui dro ko ira na tamata ki nona vale laca.

²² Ia sa bese tiko ni qaravi ira na Juta ko ira na Itomi, ka yacova na gauna oqo. A sa vuki talega ko ira na kai Lipina e na gauna ko ya.

²³ Ia na kena vo ni cakacaka i Jorami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

²⁴ A sa moce vata ko Jorami kei ira na nona qase, ka sa bulu vata kei ira na nona qase e na koro i Tevita: a sa tui ko Easaia na luvena, me kenai sosomi.

²⁵ E na kenai katinikarua ni yabaki i Jorami na tui Isireli, na luve i Eapi, sa qai tekivu me lewa ko Easaia na luve i Jiorami na tui Juta.

²⁶ E ruasagavulu ka rua na nona yabaki ko Easaia ni sa buli me tui: a sa tui mai Jerusalemi ka yabaki dua. Ia na yaca i tinana ko Acalaia na luve i Omirai na tui Isireli.

²⁷ A sa muria nai valavala ni mataqali i Eapi ko koya, ka daucaka ca e na mata i Jiova, me vaka na mataqali i Eapi: ni sa veivugoni ko koya kei na vuvale i Eapi.

²⁸ A rau a lako kei Jorami na luve i Eapi ki nai valu kei Eseeli na tui Siria mai Remoci-kiliati; a ra sa vuetaki Jorami na kai Siria.

²⁹ A sa lesu tale ki Jesirieli ko Jorami na tui, me bula mai na vue era a vuetaki koya kina mai Rama ko ira na kai Siria, ni rau a veivala kei Eseeli na tui Siria. Ia ko Easaia na luve i Jiorami na tui Juta, sa lako sobu me raici Jorami na luve i Eapi mai Jesirieli, ni sa vuetaki tu ko koya.