2 Tui 22 - Vakavakadewa Makawa

Sa tui ko Josaia, ka sa caka dodonu; a sa kune nai Vola Tabu e na vale ni Kalou.

¹ Sa walu na yabaki i Josaia ni sa buli me tui, a sa lewa tiko ko koya mai Jerusalemi ka yabaki tolusagavulu ka dua. Ia na yaca i tinana ko Jitita, na luve i Ataia na kai Posikaci.

² A sa caka dodonu ko koya e na mata i Jiova, ka muria nai valavala kecega i Tevita na nona qase, ka sega ni lako tani ki nai matau se ki nai mawi.

³ Ia e na kenai katinikawalu ni yabaki i Josaia na tui, sa talai Safani ko koya na tui, o koya na luve i Asalaia, na luve i Mesulame, o koya na vunivola, ki na vale i Jiova, ka kaya,

⁴ Mo lako cake vei Ilikaia na bete levu, me sa wilika ko koya na siliva sa daukau ki na vale i Jiova, o koya sa kumuna vata maivei ira na tamata ko ira nai vakatawa ni katuba:

⁵ ia me ra solia kivei ira era kitaka na cakacaka, io, vei ira era sa lewa na vale i Jiova: ia me ra solia ko ira kivei ira na tamata cakacaka era cakacaka tiko e na vale i Jiova, me ra vakavinakataka na veitiki ni vale sa kabasu,

⁶ vei ira na matai ni kau, kei ira era dautara vale, kei ira na matai ni vatu; me ra volia kina na kau kei na vatu sa ta, me vakavinakataka kina na vale.

⁷ Ia ka sa sega ni wili nai lavo sa soli kivei ira, ni ra sa tamata daucaka vakayalododonu.

⁸ A sa kaya ko Ilikaia na bete levu vei Safani na vunivola, Au sa kunea nai vola ni vunau e na vale i Jiova. A sa solia nai vola vei Safani ko Ilikaia, a sa wilika ko koya.

⁹ A sa lako vua na tui ko Safani na vunivola, a sa tukutuku vua na tui, ka kaya, Sa kumuna vata ko ira na nomuni tamata nai lavo ka kune e na vale, a ra sa solia kivei ira era kitaka na cakacaka, io, ko ira sa lewa na cakacaka ni vale i Jiova.

¹⁰ A sa tukuna vua na tui ko Safani na vunivola, ka kaya, Sa solia vei au e dua nai vola ko Ilikaia na bete. A sa wilika ko Safani vua na tui.

¹¹ Ia ni sa rogoca ko koya na tui na vosa ni vola ni vunau, sa dresulaka na nonai sulu.

¹² A sa vakaroti Ilikaia na bete ko koya na tui, kei Eaikami na luve i Safani, kei Akipori na luve i Mekaia, kei Safani na vunivola, kei Asaia, e dua na tamata sa dauqarava na tui, ka kaya,

¹³ Dou lako, dou taroga vei Jiova e na vukuqu, e na vukudra talega na tamata, e na vukudra kece talega na Juta, na vosa ni vola oqo sa qai kune, ni sa ka levu na cudru i Jiova sa waqa mai kivei keda, ni ra sa sega ni vakarorogo ki na vosa ni vola oqo ko ira na noda qase, me cakacaka me vaka na ka kecega sa volai kivei keda.

¹⁴ A sa lako ko iratou ko Ilikaia na bete, kei Eaikami, kei Akipori, kei Safani, kei Asaia, kivei Ulita na parofita yalewa, na wati i Salumi na luve i Tikiva, na luve i Ariasi, o koya sa daumaroroya nai sulu; (ia sa tiko ko koya mai Jerusalemi, e na kenai karua ni yasana;) a ratou sa veivosaki kaya.

¹⁵ A sa kaya vei iratou ko koya, Sa vosa vakaoqo ko Jiova na nodra Kalou na Isireli, Dou kaya vua na tamata sa talai kemudou mai vei au,

¹⁶ Sa kaya vakaoqo ko Jiova, Raica, ka'u na vakayacora na ca ki na tikina oqo, kivei ira talega era tiko kina, io na vosa kecega ni vola sa wilika oti ko tui Juta:

¹⁷ ni ra sa biuti au, ka sa vakama na ka boi vinaka ki na kalou tani eso me vakacudrui au kina e na cakacaka kecega ni ligadra; o koya ena waqa kina na noqu cudru ki na tikina oqo, ka na sega ni boko.

¹⁸ Ia dou kaya vua na tui Juta, o koya ka talai kemudou me tarogi Jiova, Sa kaya vakaoqo ko Jiova na nodra Kalou na Isireli, e na vuku ni vosa ko sa rogoca.

¹⁹ Ni sa malumalumu na yalomu, ka ko sa vakamalumalumutaki iko e na mata i Jiova, ni ko a rogoca na ka ka'u a kaya e na vuku ni tikina oqo, e na vukudra talega era tiko kina, ka me ra vakarusai, ka vatonaki me ra ca, ni ko sa dresulaka talega na nomu i sulu, ka tagi e mataqu; au sa vakarogoci iko talega koi au, sa kaya ko Jiova:

²⁰ Raica, e na vuku ni ka oqo, au na kauti iko yani kina vei ira na nomu qase, ia ko na kau e na vakacegu ki na nomu i bulubulu; ia ena sega ni raica na matamu na ka ca kecega ka'u na vakayacora ki na tikina oqo. A ratou sa la'ki tukuna vei koya na tui na vosa oqo.