2 Tui 20 - Vakavakadewa Makawa

Sa tauvi mate ko Esekaia, a sa vakabulai ni sa masu, 1-11. Sa vakaraitaka ko koya na nona ka kece vei ira ka lako mai Papiloni, 12,13; sa qai tukuna ko Aisea na veivakabobulataki ki Papiloni, 14-19. Sa mate ko Esekaia, 21.

¹ E na gauna ko ya sa tauvi Esekaia e dua na mate ka sa vakarau ciba kina. A sa lako mai vua ko Aisea na parofita, na luve i Emosi, ka kaya vua, Sa kaya vakaoqo ko Jiova, Mo tatau mada vei ira na nomu lewe-ni-vale; ni ko na mate, ka sega ni bula.

² Sa qai goleva na lalaga ko koya, ka masu vei Jiova, ka kaya,

³ Au masuti kemuni, Jiova, mo ni nanuma mada na noqu lako voli e matamuni e na yalodina kei na yalo e dua bau, kei na noqu caka vinaka e matamuni. A sa tagi vakalevu ko Esekaia.

⁴ Ia ni sa curu yani ko Aisea ka sa bera ni yaco ki na loma ni koro, sa yaco vua na vosa i Jiova, ka kaya,

⁵ Mo lesu tale, ka kaya vei Esekaia na nodra turaga na noqu tamata, Sa kaya vakaoqo ko Jiova na Kalou i Tevita na nomu qase: Au sa rogoca na nomu masu, au sa raica na wai ni matamu: raica, ka'u na vakabulai iko: e na kenai katolu ni siga ko na lako cake ki na vale i Jiova.

⁶ Ia ka'u na vakaikuritaka na gauna ni nomu bula me sa yabaki tinikalima tale; ia ka'u na vakabulai iko kei na koro oqo mai na liga i tui Asiria; ia ka'u na vakatawa na koro oqo e na vukuqu, e na vuku talega i Tevita na noqu i talatala.

⁷ A sa kaya ko Aisea, Taura e dua nai buli lolo. A ra sa taura ka buluta kina na mata ni bo, a sa bula tale ko koya.

⁸ A sa kaya vei Aisea ko Esekaia, A cava na kenai vakadinadina ni na vakabulai au ko Jiova, ka ni'u na lako cake talega ki na vale i Jiova e na kenai katolu ni siga?

⁹ A sa kaya ko Aisea, Oqo nai vakadinadina vei iko maivei Jiova, ni na cakava ko Jiova na ka sa vosataka ko koya: me bau lako sobu na yaloyalo ka tini na tikina, se me suka ki muri e tini na tikina?

¹⁰ A sa kaya ko Esekaia, A ka walega me lako sobu na yaloyalo e na tikina e tini: me kakua, me suka ga ki muri na yaloyalo e na tikina e tini.

¹¹ A sa masu vagumatua vei Jiova ko Aisea na parofita: a sa vakasuka ki muri ko koya na yaloyalo e na tikina e tini, o koya ka lako sobu kina e nai vakatakilakila ni mata-ni-siga nei Easi.

¹² E na gauna ko ya sa vakauta nai vola kei na ka-ni-loloma vei Esekaia ko koya na tui Papiloni, ko Pirotaki-paletani, na luve i Paletani; ni sa rogoca ni ka tauvi mate ko Esekaia.

¹³ A sa vakarorogo vei ira ko Esekaia, ka vakaraitaka kecega vei ira na vale ni nona ka talei, na siliva, kei na koula, kei na ka boi vinaka, kei na waiwai vinaka, kei na vale ni nonai yaragi, kei na ka kece sa tu vata kei na nonai yau: sa sega e dua na ka e nona vale, kei na nona matanitu taucoko, sa sega ni vakaraitaka vei ira ko Esekaia.

¹⁴ Sa qai lako vei Esekaia na tui ko Aisea na parofita, ka kaya vua, A cava era sa kaya ko ira na tamata oqo? ka ra sa lako maivei kivei iko? A sa kaya ko Esekaia, Era sa lako mai na vanua vakayawa, io mai Papiloni.

¹⁵ A sa kaya ko koya, A cava era sa kunea e na nomu vale? A sa kaya ko Esekaia, Era sa kunea na ka kecega e noqu vale sa sega e dua na noqu i yau ka'u sa sega ni vakaraitaka vei ira.

¹⁶ A sa kaya vei Esekaia ko Aisea, Mo rogoca na vosa i Jiova:

¹⁷ Raica, sa lako mai na gauna ena kau tani kina ki Papiloni na ka kecega sa tu e nomu vale, kei na ka era sa binia na nomu qase ka yacova na siga oqo: ena sega ni vo e dua na ka, sa kaya ko Jiova:

¹⁸ ia era na kauta tani na luvemu era na tubu maivei iko, ko ira ko na vakatubura; a ra na la'ki matanivanua e na nona vale vakaturaga na tui Papiloni.

¹⁹ A sa kaya vei Aisea ko Esekaia, Sa vinaka na vosa i Jiova ko sa tukuna mai. Sa kaya talega, Sa na sega li ni vinaka kevaka sa yaco na sautu kei na ka dina e na noqu gauna?

²⁰ Ia na kena vo ni cakacaka i Esekaia, kei na nona kaukauwa kecega, kei na nona cakava na drano, kei na salisali ni wai, sa vakasalia kina na wai ki na koro, sa sega li ni volai e nai vola ni veika sa caka e na nodra gauna na tui Juta?

²¹ A sa moce vata kei ira na nona qase ko Esekaia: a sa lewa ko Manasa na luvena, me kenai sosomi.