2 Tui 19 - Vakavakadewa Makawa

Sa vakararavi vei Jiova ko Esekaia, a sa vakabulai ko Jerusalemi; a sa yaviti ira na kai Asiria na agilose i Jiova.

¹ Ia ni sa rogoca ko Esekaia na tui, sa dresulaka na nonai sulu, ka vakasulumi koya e nai sulu taga, ka la'ki curu ki na vale i Jiova.

² A sa talai Elaiakimi, o koya ka lewa na vale, kei Sepina na vunivola, kei ira era qase vei ira na bete ni ra sa vakaisulu e nai sulu taga, kivei Aisea na parofita na luve i Emosi.

³ A ratou sa kaya vua, Sa kaya vakaoqo ko Esekaia, Sa dua na siga ni veivakararawataki, kei na veivunauci talega, kei na veivosavakacacataki, na siga oqo; ni ra sa voleka ni sucu na gone, ka sega na kaukauwa me ra vakasucumi kina.

⁴ Ena rogoca beka ko Jiova na nomu Kalou na vosa kecega i Rapisake, o koya sa tala mai ko tui Asiria na nona turaga, me vosavakacacataka na Kalou bula; ia ena vunauca na vosa sa rogoca ko Jiova na nomu Kalou: o koya mo qai cavuta na masu e na vukudra na lewe lailai sa vo tiko.

⁵ A sa lako vei Aisea ko iratou nai talaki i Esekaia na tui.

⁶ A sa kaya vei iratou ko Aisea, Dou la'ki kaya vakaoqo vua na nomudou turaga, Sa kaya vakaoqo ko Jiova, Mo kakua ni rere e na vuku ni vosa ko sa rogoca, eratou sa vosavakacacataki au kina ko iratou na nona tamata na tui Asiria.

⁷ Raica, ka'u na vakaliwavi koya e na cagi, ia ena rogoca ko koya e dua nai rogorogo, ka lesu yani ki na nona vanua; ia ka'u na vakabalei koya e nai seleiwau e na nona vanua.

⁸ A sa lesu yani ko Rapisake, a sa kunei tui Asiria ni sa vala kei Lipina; ni sa rogoca oti ko koya ni sa lako tani ko koya mai Lakisi.

⁹ Ia ni sa rogoca ko koya e na vuku i Tiraka, na tui Iciopea, ka vaka, Raica, sa mai veivala kei iko ko koya; sa qai tala tale eso na tamata vei Esekaia, ka kaya,

¹⁰ Dou vosa vakaoqo vei Esekaia na tui Juta, ka kaya, Me kakua ni vakaisini iko na nomu Kalou, o koya ko sa vakararavi kina, ni sa kaya, Ena sega ni soli ko Jerusalemi ki na liga i tui Asiria.

¹¹ Raica, ko sa rogoca oti na ka era sa cakava na tui Asiria ki na veivanua kecega, ni sa vakarusai ira sara: ia ko na vakabulai beka ko iko?

¹² Na veivanua ka vakarusa ko iratou na noqu qase era sa vakabula li ko ira na nodra kalou? io, ko Kosani, kei Arani, kei Resefi, kei ira na luve i Iteni era tiko mai Tilasari?

¹³ Sa evei ko tui Emaci, kei tui Apati, kei na tui ni koro ko Sifaveimi, kei Ena, kei Iva?

¹⁴ A sa taura nai vola ko Esekaia mai na ligadratou na tamata, ka wilika: a sa lako cake ko Esekaia ki na vale i Jiova, a sa tevuka e na mata i Jiova.

¹⁵ A sa masu ko Esekaia e na mata i Jiova, a sa kaya, Kemuni Jiova na nodra Kalou na Isireli, o koya sa tiko e na tadrua ni jerupi, koi kemuni vakai kemuni ga sa Kalou ni veimatanitu kecega e vuravura; koi kemuni sa bulia na lomalagi kei na vuravura:

¹⁶ I Jiova, mo ni vakalakalataka na daligamuni, ka vakarorogo: I Jiova, mo ni vakayadrata na matamuni, ka raica; ka rogoca na vosa i Senakaripi, o koya sa talai koya me vosavakacacataka na Kalou bula.

¹⁷ Kemuni Jiova, e dina ni ratou sa vakarusa na lewe ni veivanua kei na nodra vanua ko ira na tui Asiria,

¹⁸ a ratou sa biuta ki na bukawaqa na nodra kalou; ni ra sa sega ni Kalou, ni ra sa cakacaka walega ni liga ni tamata, na kau kei na vatu: ia eratou sa vakarusai ira kina:

¹⁹ ia oqo, Jiova na neimami Kalou, mo ni vakabulai keimami mai na ligana, me ra kila kina na veimatanitu kecega e vuravura ni sai kemuni ko Jiova na Kalou, koi kemuni duaduaga.

²⁰ A sa talaki vei Esekaia ko Aisea na luve i Emosi, ka kaya, Sa kaya vakaoqo ko Jiova na nodra Kalou na Isireli, Ni ko sa masu vei au e na vuku i Senakaripi na tui Asiria, ka'u a rogoca.

²¹ Oqo na vosa sa vosataka e na vukuna ko Jiova, Sa beci iko na goneyalewa ni Saioni, ka sa dredrevaki iko; sa kurea na uluna vei iko na goneyalewa ni Jerusalemi?

²² Ko sa vosavakacacataki cei, ka vakaucacataka? ia vei cei beka ko sa tabalaka na domomu, ka rai cake kina? vei koya ga na Yalosavasava e Isireli.

²³ O sa vosavakacacataka na Turaga e na gusudra na nomu i talaki, ka sa kaya, Au sa cabe cake e na noqu qiqi-ni-valu e vuqa ki na kena cecere ni veiulu-ni-vanua, ki na veiyasa i Lepanoni, ia ka'u na taya sobu na kena veisitari babalavu; kei na kena veidamanu talei: ia ka'u na curuma na vale mai na nonai yalayala, kei na veikau ni nona Kameli.

²⁴ Au sa kelia ka gunuva na wai tani, ka vakamamacataka e na qeteqete ni yavaqu na uciwai kecega ni Ijipita.

²⁵ O sa sega beka ni rogoca ni'u a cakava makawa, au a kitaka tale eliu sara? au sa qai vakayacora, mo cakava me bukebuke walega na veikoro vakabai.

²⁶ O koya era sa malumalumu kina na lewena, sa waicala na yalodra ka rere; era sa vaka na co ni vanua, kei na co drokadroka sa qai rovu, na co mai na dela ni vale, kei na sila sa malai ni sa cadra cake walega.

²⁷ Ia ka'u sa kila na nomu tiko, kei na nomu curu ki tuba, kei na nomu curu ki loma, kei na nomu cudru levu vei au.

²⁸ Ni sa lako cake ki daligaqu na nomu cudru vei au kei na nomu viavialevu, ka'u na qai vakacuruma ki na ucumu na noqu siwa, ka vakaciqira na noqu i tubetube ki na gusumu, ia ka'u na vakasukai iko yani e na sala ko a lako mai kina.

²⁹ Ia oqo sa na kenai vakadinadina vei iko, Dou na kania e na yabaki oqo na ka sa tubu walega, kei na kenai karua ni yabaki na ka sa tubu walega maikina; ia e na kenai katolu ni yabaki dou kaburaka, ka tamusuka, ka tea na veiwere-ni-vaini, ka kania na vuana.

³⁰ Ia ena tei sobu tale na kena vo ni mataqali i Juta, ka vua ki cake.

³¹ Ni na lako tani mai Jerusalemi na kena vo, kei ira era dro bula mai na ulu-ni-vanua ko Saioni: ena kitaka na ka oqo na yalogugumatua i Jiova ni lewe vuqa.

³² O koya oqo sa kaya kina ko Jiova e na vuku i tui Asiria, Ena sega ni curu mai ki na koro oqo, se vanataka kina e dua na gasau, se mai tu kina vakasasabai, se viri suva kina:

³³ e na sala sa lako mai kina, ko ya ga ena lesu tale yani kina, ka na sega ni curu ki na koro oqo, sa kaya ko Jiova.

³⁴ Ia ka'u na vakatawa na koro oqo, ka vakabula, e na vukuqu, e na vuku talega i Tevita na noqu i talatala.

³⁵ Ia e na bogi ko ya, sa lako yani na agilose i Jiova, ka vakamatea e na nodra i tikotiko ni valu e le tinikawalu na oba ka lima na udolu na kai Asiria: ia ni ra sa sou e na mataka, raica, era sa mate koto kecega.

³⁶ A sa lako tani ko Senakaripi na tui Asiria, ka la'ki lesu, ka tiko mai Ninive.

³⁷ Ia ni sa soro tiko ko koya e na bure kalou i Nisiroki na nona kalou, erau sa vakamatei koya e nai seleiwau, koi rau na luvena ko Etirameleki, kei Saresa: a rau sa dro bula ki na vanua ko Aminia. A sa lewa ko Esa-atoni na luvena, me kenai sosomi.