2 Tui 18 - Vakavakadewa Makawa

Sa tui Juta ko Esekaia, ka sai valavala vinaka: sa kabai Jerusalemi ko ira na kai Asiria.

¹ Ia e na kenai katolu ni yabaki i Osea na tui Isireli, na luve i Ela, sa tekivu me lewa ko Esekaia na luve i Easi na tui Juta.

² E ruasagavulu ka lima na nona yabaki ni sa tekivu me lewa; a sa lewa tiko mai Jerusalemi ka yabaki ruasagavulu ka ciwa. Ia na yaca i tinana ko Epi, na luve i Sakaraia.

³ A sa daucaka dodonu e na mata i Jiova, me vaka na ka kecega ka cakava ko Tevita na tamana.

⁴ Sa biuta sobu ko koya na veitikina cecere, ka musumusuka na veimatakau, ka taya sobu na kalouyalewa ni veikau, ka vorolaka na gata parasa ka cakava ko Mosese: ni ra sa vakama tiko kina na ka boi vinaka ka yacova na gauna ko ya: a sa vakayacana ko koya ko Niusitani, a tiki ni parasa.

⁵ Sa vakararavi ko koya vei Jiova na nodra Kalou na Isireli, ka sa sega e dua sa bula eliu vua, ka sega e dua e muri koya me tautauvata kaya vei ira kecega na tui Juta.

⁶ Ni sa kabiti Jiova ko koya; sa sega ni vuki tani me sega ni muri koya tiko, sa vakabauta ga na nonai vakaro, ka vakarota ko Jiova vei Mosese.

⁷ A sa tiko kaya ko Jiova; sa tamata yaco ko koya e na yasana kecega sa lako kina: a sa vuki tani ko koya maivua na tui Asiria, ka sega ni qaravi koya.

⁸ Sa mokuti ira na kai Filisitia ko koya, ka yaco ki Kesa, kei na kena veiyasana, mai na nodra qatava nai vakatawa ka yacova na koro sa vakabai.

⁹ Ia e na kenai kava ni yabaki i Esekaia na tui, na kenai kavitu ni yabaki i Osea na tui Isireli, na luve i Ela, sa lako cake mai ki Samaria ko Salimanisa na tui Asiria, ka buku na kena druadrua.

¹⁰ Sa yabaki tolu sa qai rawa, io, e na kenai kaono ni yabaki i Esekaia, na kenai kaciwa ni yabaki i Osea na tui Isireli, sa qai rawai ko Samaria.

¹¹ A sa kauti ira tani na Isireli ki Asiria ko tui Asiria, ka vakatikori ira mai Ela, kei Apori, mai na uciwai mai Kosani, kei na nodra veikoro na kai Mitia:

¹² ka ni ra sa sega ni vakarorogo ki na vosa i Jiova na nodra Kalou, ka vakacataka na nona veiyalayalati, io na ka kecega sa vakarota ko Mosese nai talatala i Jiova, ka ra sega ni via rogoca se cakava.

¹³ Ia e na kenai katinikava ni yabaki i Esekaia na tui, sa qai lako cake ki na veikoro vakabai kecega nei Juta ko Senakaripi na tui Asiria, a sa rawai ira.

¹⁴ A sa talaki vei tui Asiria ki Lakisi ko Esekaia na tui Juta, a sa kaya, Au sa cala: mo suka tani vei au: a ka ko sa lesia vei au ka'u na cakava. A sa lavaka vei Esekaia na tui Juta ko tui Asiria e tolu na drau na taledi siliva, ka tolusagavulu na taledi koula.

¹⁵ A sa solia vua ko Esekaia na siliva kecega sa kune e na vale i Jiova, kei nai yau mai na vale ni tui.

¹⁶ E na gauna ko ya sa luvata ko Esekaia na koula mai nai sogo ni katuba ni vale ni soro i Jiova, mai na duru talega, ka botana ko Esekaia na tui Juta, a sa solia vei tui Asiria.

¹⁷ A sa tala ko tui Asiria e dua nai valu levu kei Taritani, kei Rapi-sarisi, kei Rapisake, mai Lakisi ki Jerusalemi, kivei Esekaia na tui. A ra sa lako cake, ka yaco ki Jerusalemi. Ia ni ra sa lako cake, era sa la'ki tu voleka ki na salisali ni drano e cake, ka koto mai na salatu e na vanua ni dausavai sulu.

¹⁸ A ratou sa kaci yani vua na tui, a sa lako yani vei iratou ko Elaiakimi na luve i Ilikaia, o koya sa lewa na vale, kei Sepina na vunivola kei Joa na luve i Esafa na tamata sa dauvola na ka ni matanitu.

¹⁹ A sa kaya vei iratou ko Rapisake, Dou kaya mada vei Esekaia, Sa taroga vakaoqo na tui levu, na tui Asiria, A cava na ka ko sa vakararavi kina?

²⁰ O sa kaya, Sa tu na vuku kei na kaukauwa me ia kina nai valu, ia sa vosa walega. Ko sa vakararavi vei cei, ko sa vuki tani kina vei au?

²¹ Oqo, raica, ko sa vakararavi ki nai titoko gasau sa bibivoro, io ki Ijipita, ko ya kevaka sa ravita e dua, ena suaka na ligana ka vakamavoataka: sa vakakina ko Fero na tui Ijipita kivei ira kecega era vakararavi vua.

²² Ia kevaka dou sa kaya vei au, Keimami sa vakararavi vei Jiova na neimami Kalou: sa sega beka ni ko koya ka taukena na veitikina cecere kei nai cabocabo-ni-soro sa biuta tani ko Esekaia, ka kaya vei ira na Juta kei ira mai Jerusalemi, Dou soro ga e na mata ni cabocabo-ni-soro oqo e Jerusalemi.

²³ Ia oqo, mo solia mada vua na noqu turaga na tui Asiria nai vakadinadina, ia ka'u na solia vei iko e rua na udolu na ose, kevaka ko rawata na tamata sa dauvodo ose me vodoka.

²⁴ O na qai vakasuka tani vakaevei e dua vei ira na kapiteni ni valu e lailai vei ira na nona tamata na noqu turaga, ka la'ki vakararavi ki Ijipita me rawa kina na qiqi-ni-valu kei na tamata dauvodo ose?

²⁵ Ia ka'u sa qai lako cake beka mai me'u vakarusa na koro oqo, ka sa sega li ni tiko vata kei au ko Jiova? Sa kaya ga vei au ko Jiova, Mo lako cake ki na vanua oqo, ka vakarusa.

²⁶ Eratou sa qai kaya vei Rapisake ko Elaiakimi na luve i Ilikaia, kei Sepina, kei Joa, Mo vosa mada vei keitou na nomu tamata e na vosa vaka-Siria; ni keitou sa kila: ia mo kakua ni vosa vei keitou e na vosa vaka-Juta e na daligadra na tamata era sa tiko e dela ni bai.

²⁷ A sa kaya vei iratou ko Rapisake, Sai kemudrau li kei na nomu turaga sa talai au kina na noqu turaga me'u vosataka na vosa oqo? sa sega li ni talai au vei ira talega na tamata era sa tiko e dela ni bai me ra kania na nodra benu ka gunuva na nodra suasua, ko ira vata kei kemudou?

²⁸ A sa tu ko Rapisake ka kaci vakadomoilevu e na vosa vaka-Juta, ka kaya, Dou rogoca na nona vosa na tui levu na tui Asiria:

²⁹ Sa kaya vakaoqo na tui, Me kakua ni vakaisini kemudou ko Esekaia, ni na sega ni vakabulai kemudou rawa mai na ligana:

³⁰ ia me kakua ni rawai kemudou ko Esekaia mo dou vakararavi vei Jiova, ni sa kaya, Ena vakabulai keda vakaidina ko Jiova, ka na sega ni soli na koro oqo ki na ligana na tui Asiria.

³¹ Dou kakua ni vakarorogo vei Esekaia: ni sa kaya vakaoqo ko tui Asiria, Dou soro mada mai vei au, ka ucu mada vei au, ka kania tiko na tamata yadua na vua ni nona vaini, kei na vua ni nona lolo, ka gunuva na tamata yadua na wai ni nona mata-ni-wai:

³² ka me'u qai lako malua mai, ka kauti kemudou yani ki na vanua sa vaka na nomudou vanua, a vanua ni sila kei na waini, a vanua ni madrai kei na veiwere-ni-vaini, a vanua ni waiwai olive, kei na oni, mo dou bula kina, ka sega ni mate: ia dou kakua ni vakarorogo vei Esekaia, ni sa vakaisini kemudou, ka kaya, Ena vakabulai keda ko Jiova.

³³ Sa dua li vei ira na kalou ni veivanua sa vakabula na nona vanua mai na ligana na tui Asiria?

³⁴ Sa evei na kalou ni Emaci, kei Apati? sa evei na kalou ni Sifaveimi, kei Ena, kei Iva? era sa vakabulai Samaria li mai na ligaqu?

³⁵ O cei vei ira kecega na kalou ni veivanua sa vakabula na nodra vanua mai na ligaqu, me vakabulai Jerusalemi ko Jiova mai na ligaqu?

³⁶ A ra sa galu ga ko ira na tamata, ka sega ni cavuta vua e dua na vosa: ni sa vakarota na tui, ka vaka, Dou kakua ni vosa vua.

³⁷ A sa lako ko Elaiakimi na luve i Ilikaia, o koya ka lewa na vale, kei Sepina na vunivola, kei Joa na luve i Esafa, o koya sa dauvola na ka ni matanitu, vei Esekaia, ka sa dresulaki na nodratou i sulu, ka ra tukuna vua na vosa i Rapisake.