2 Tui 16 - Vakavakadewa Makawa

Sa tui ko Easi.

¹ E na kenai katinikavitu ni yabaki i Peka na luve i Rimalaia, sa tekivu me lewa ko Easi na luve i Jocame na tui Juta.

² Sa ruasagavulu na yabaki i Easi ni sa tekivu me lewa, a sa lewa tiko mai Jerusalemi ka yabaki tinikaono: a sa sega ni daucaka dodonu e na mata i Jiova na nona Kalou, me vakataki Tevita na nona qase.

³ A sa muria ga na nodra i valavala na tui Isireli; ia sa vakacabora na luvena e loma ni bukawaqa, me vaka na ka vakasisila ni veimatanitu ka vakaseva ko Jiova e matadra na Isireli.

⁴ A sa vakacaboi soro ko koya, ka vakama na ka boi vinaka, e na veitikina cecere, kei na veiulu-ni-koro, kei na ruku ni kau bulabula kecega.

⁵ Sa qai lako cake ko Risini na tui Siria, kei na tui Isireli, ko Peka na luve i Rimalaia, me rau kabai Jerusalemi: a ra sa buku druadrua vei Easi, ka ra sa sega ga ni rawai koya.

⁶ E na gauna ko ya sa rawai Elaci tale me nei Siria ko Risini na tui Siria, a sa vakasevi ira yani na Juta mai Elaci: a ra sa lako ki Elaci na kai Siria, ka tiko kina, ka yacova na siga oqo.

⁷ A sa vakatadu mata ko Easi kivei Tikilaci-pileseri na tui Asiria, ka kaya, Koi au na nomu tamata, kei na luvemu: mo lako cake mai, ka vakabulai au mai na liga i tui Siria, kei na liga i tui Isireli, erau sa noqu meca.

⁸ A sa taura ko Easi na siliva kei na koula sa kune e na vale i Jiova, kei nai yau mai na vale ni tui, ka vakauta me ka-ni-loloma vua na tui Asiria:

⁹ A sa vakarorogo vua ko tui Asiria: a sa lako cake ki Tamasiko ko tui Asiria, ka kaba, ka kauti ira vakabobula na lewena ki Kiri, ka vakamatei Risini.

¹⁰ A sa lako ki Tamasiko ko Easi na tui me tavaki Tikilaci-pileseri na tui Asiria, a sa raica nai cabocabo-ni-soro mai Tamasiko: a sa vakauta ko Easi na tui kivei Uraija na bete na kenai cakacaka ni cabocabo-ni-soro kei na kenai vakatakarakara, me vaka na kenai cakacaka kecega.

¹¹ A sa cakava ko Uraija na bete nai cabocabo-ni-soro me vaka na ka kecega ka talaki kina mai Tamasiko ko Easi na tui: sa cakava oti vakakina ko Uraija na bete, ni sa bera na nona tale mai Tamasiko ko Easi na tui.

¹² Ia ni sa tale mai Tamasiko na tui, sa qai kunea nai cabocabo-ni-soro: a sa toro ki nai cabocabo-ni-soro na tui, ka vakacaboi soro kina.

¹³ A sa vakama na nonai soro kama, kei na nonai madrali laukana; ka livia na nonai madrali liviraki, ka kureitaka na dra ni nonai soro ni veivinakati, e nai cabocabo-ni-soro.

¹⁴ Ia nai cabocabo-ni-soro parasa ka tu e na mata i Jiova, sa kauta ko koya mai na mata ni vale, mai na tadrua ni cabocabo-ni-soro kei na vale i Jiova, ka tauca ki na yasa ni cabocabo-ni-soro, vaka ki na tokalau.

¹⁵ A sa vakaroti Uraija na bete ko Easi na tui, ka kaya, Mo vakama e nai cabocabo-ni-soro levu nai soro kama ni mataka, kei nai madrali laukana, ni yakavi, kei na nonai soro kama na tui, kei na nonai madrali laukana, kei na nodra i soro kama kecega na lewe ni vanua, kei na nodra i madrali laukana, kei na nodra i madrali liviraki; ka kureitaka ki delana na dra kecega ni soro kama, kei na dra ni soro kecega: ia nai cabocabo-ni-soro parasa, au na taro kina.

¹⁶ A sa kitaka ko Uraija na bete, me vaka na ka kecega ka vakarota ko Easi na tui.

¹⁷ A sa taya laivi na batina mai na kenai tutu ko Easi na tui, ka laveta tani na taqi mai na deladratou: ka tauca sobu na taqi levu mai na deladratou na pulumokau parasa sa tu e rukuna, ka tauca ki na dua na rara vatu:

¹⁸ ia nai vakaruru ni siga ni vakacecegu ka ra tara mai na vale, kei nai curucuru ni tui e tautuba, sa vukica ko koya mai na vale i Jiova e na vuku i tui Asiria.

¹⁹ Ia na kena vo ni cakacaka i Easi sa cakava ko koya, sa sega li ni volai e nai vola ni veika sa caka e na nodra gauna na tui Juta?

²⁰ A sa moce vata kei ira na nona qase ko Easi, a sa bulu vata kei ira na nona qase e na koro i Tevita: a sa tui ko Esekaia na luvena, me kenai sosomi.