2 Tui 14 - Vakavakadewa Makawa

Sa tui Juta ko Amasaia, 1-22. Sa tui Isireli nai karua ni Jeropoami, 23-29.

¹ E na kenai karua ni yabaki i Joasi na tui Isireli, na luve i Jioaasi, sa tekivu me lewa ko Amasaia na luve i Joasi na tui Juta.

² Sa ruasagavulu ka lima na nona yabaki ni sa tekivu me lewa, a sa lewa mai Jerusalemi ka yabaki ruasagavulu ka ciwa. Ia na yaca i tinana ko Jioatani, a marama ni Jerusalemi.

³ A sa caka dodonu ko koya e na mata i Jiova, ka sega ni vakataki Tevita na nona qase: sa cakacaka ko koya me vaka na ka kecega ka cakava ko Joasi na tamana.

⁴ Ia sa sega ni biu na veitikina cecere: era sa vakacaboi soro tiko ko ira na tamata ka vakama tiko na ka boi vinaka e na veitikina cecere.

⁵ Ia ni sa vakataudeitaki vua na matanitu, sa mokuti ira na nona tamata era a vakamatea na tamana na tui:

⁶ ia na luvedra na tamata era a vakamatei tamana, sa sega ni vakamatei ira ko koya: me vaka na ka sa volai e nai vola ni vunau i Mosese, ka vakarota ko Jiova, ka kaya, Me ra kakua ni vakamatei na tama ni gone e na vuku ni luvedra, se vakamatei na gone e na vuku ni tamadra; ia na tamata yadua ena vakamatei e na vuku ni nonai valavala ca.

⁷ Sa mokuti ira na Itomi ko koya e na buca ni masima e le tini na udolu, ka tauri Sila e nai valu, ka vakatoka na yacana ko Jokicieli, ka yacova na siga oqo.

⁸ Sa qai vakatadu mata ko Amasaia vua na tui Isireli ko Jioasi, na luve i Jioaasi na luve i Jeu, ka kaya, Me daru mai veikune mada.

⁹ A sa talaki ko Jioasi na tui Isireli kivei Amasaia na tui Juta, ka kaya, Sa talaki na wa-vakavotona mai Lepanoni ki na sitari mai Lepanoni, ka vaka, Mo solia na luvemu yalewa vua na luvequ tagane me watina: a sa lako voli e dua na manumanu kila mai Lepanoni ki na sitari mai Lepanoni, me vaka, Mo solia na luvemu yalewa vua na luvequ tagane me watina: a sa lako voli e dua na manumanu kila mai Lepanoni, a sa butuka sobu na wa-vakavotona.

¹⁰ E dina ko sa mokuti ira na Itomi, ka ko sa yalolevu kina: mo marautaka mada, ka tiko ga mai nomu vale: a cava ko sa tara kina na ka ca mo bale kina, io ko iko, kei ira vata kei iko na Juta?

¹¹ Ia sa sega ni via muria ko Amasaia. A sa lako cake kina ko Jioasi na tui Isireli: a rau sa veikune kei Amasaia na tui Juta mai Peci-semesi ka nei Juta.

¹² A sa mokuti ira na Juta ko ira na Isireli; a ra sa dui dro na tamata yadua ki na nona vale laca.

¹³ Ia ko Jioasi na tui Isireli, sa tauri Amasaia na tui Juta, na luve i Jioasi, na luve i Easaia, mai Peci-semesi, ka lako ki Jerusalemi, ka basuraka na bai mai Jerusalemi, mai na matamata-ni-koro ni Ifireimi, ka yacova na matamata-ni-koro mai na ucu ni koro, e va na drau na kiupiti.

¹⁴ A sa kauta kecega ko koya na koula kei na siliva, kei nai yaya kecega sa kune e na vale i Jiova, kei nai yau mai na nona vale na tui, kei na tamata eso me vakataudeitaki kina na sautu; ka lesu tale ki Samaria.

¹⁵ Ia na kena vo ni cakacaka i Jioasi, sa cakava ko koya, kei na nona kaukauwa, kei na nona veivala kei Amasaia na tui Juta, sa sega li ni volai e nai vola ni veika sa caka e na nodra gauna na tui Isireli?

¹⁶ A sa moce vata kei ira na nona qase ko Jioasi, a sa bulu vata kei ira na tui Isireli mai Samaria; a sa tui ko Jeropoami na luvena, me kenai sosomi.

¹⁷ A sa bula tiko ko Amasaia na luve i Joasi na tui Juta ka yabaki tinikalima, ni sa mate ko Jioasi na luve i Jioaasi na tui Isireli.

¹⁸ Ia na kena vo ni cakacaka i Amasaia, sa sega li ni volai e nai vola ni veika sa caka e na nodra gauna na tui Juta?

¹⁹ A ra sa bukiveretaki koya mai Jerusalemi, a sa dro ko koya ki Lakisi; a ra sa talaki vua ki Lakisi, ka vakamatei koya kina.

²⁰ A ra sa kauti koya e na ose eso: a sa bulu mai Jerusalemi kei ira na nona qase e na koro i Tevita.

²¹ A ra sa kauti Asaraia ko ira kecega na Juta, ni sa tinikaono na nona yabaki, a ra sa buli koya me tui mei sosomi kei Amasaia na tamana.

²² Sa tarai Elaci ko koya, ka vakasuka tale vei ira na Juta, sa oti, sa qai moce vata na tui kei ira na nona qase.

²³ E na kenai katinikalima ni yabaki i Amasaia na tui Juta, na luve i Joasi, sa tekivu me lewa mai Samaria ko Jeropoami na luve i Joasi na tui Isireli, ka sa lewa yabaki vasagavulu ka dua.

²⁴ A sa daucaka ca ko koya e na mata i Jiova: sa sega sara ni biuta tani nai valavala ca i Jeropoami na luve i Nipati, o koya ka vakaivalavalacataki ira na Isireli.

²⁵ Sa vakasuka tale ko koya nai yalayala kei Isireli mai nai curucuru ki Emaci, ka yacova na wasawasa mai na buca, me vaka na vosa i Jiova na nodra Kalou na Isireli, ka vosataka ko koya e na gusu i Jona na nonai talatala, o koya na luve i Amitai na parofita, na kai Kaca-eferi.

²⁶ Ni sa raica ko Jiova na nodra rarawa na Isireli, ni sa rui bibi sara: ni sa sega ni dua sa sogolati se lako voli, ka sega nai vukevuke vei ira na Isireli.

²⁷ A sa sega ni kaya ko Jiova me bokoca na yacadra na Isireli mai na ruku i lomalagi: ia sa vakabulai ira e na liga i Jeropoami na luve i Joasi.

²⁸ Ia na kena vo ni cakacaka i Jeropoami, kei na ka kecega sa cakava ko koya, kei na nona kaukauwa sa ia kina nai valu ko koya, ka rawai Tamasiko tale kina, kei Emaci na nei Juta, me nodra na Isireli, sa sega li ni volai e nai vola ni veika sa caka e na nodra gauna na tui Isireli?

²⁹ A sa moce vata kei ira na nona qase ko Jeropoami, io ko ira na tui Isireli; a sa tui ko Sakaraia na luvena, me kenai sosomi.