2 Tui 12 - Vakavakadewa Makawa

Sa tui ko Jioasi.

¹ Sa kenai kavitu ni yabaki i Jeu sa mai tui kina ko Jioasi; a sa lewa ko koya mai Jerusalemi ka yabaki vasagavulu: ia na yaca i tinana ko Sipia, mai Pieri-sepa.

² A sa caka dodonu ko Jioasi e na mata i Jiova e na nona gauna kecega, sa vakavulici koya tiko kina ko Jioiata na bete.

³ Ia sa sega ni biu na veitikina cecere: era sa vakacaboi soro tiko ko ira na tamata ka vakama na ka boi vinaka e na veitikina cecere.

⁴ Sa qai kaya vei ira na bete ko Jioasi, Nai lavo kecega ni veika sa vakacabori ka sa kau mai ki na vale i Jiova, io nai lavo ni tamata yadua sa wili, nai lavo sa lewai e na vuku ni yalona na tamata yadua, kei nai lavo kecega sa lomadra na tamata yadua me ra kauta ki na vale i Jiova,

⁵ me ra dui taura ko ira na bete maivei ira na wekana: ia me ra vakavinakataka na veitiki ni vale kecega era sa kunea ni sa kabasu.

⁶ Ia e na kenai karuasagavulu ka tolu ni yabaki i Jioasi na tui, era a sega ni vakavinakataka ko ira na bete na veitiki ni vale sa kabasu.

⁷ Sa qai kacivi Jioiata na bete kei ira na bete tani ko Jioasi na tui, ka sa kaya vei ira, A cava dou sa sega kina ni vakavinakataka na veitiki ni vale sa kabasu? ia dou kakua ni taura tiko nai lavo maivei ira na wekamudou, dou solia ga me vakavinakataki na veitiki ni vale sa kabasu.

⁸ A ra sa vinakata ga ko ira na bete, me ra kakua ni taura tiko nai lavo maivei ira na tamata, ka me kakua talega ni vakavinakataka na veitiki ni vale sa kabasu.

⁹ A sa kauta e dua na kato ko Jioiata na bete, ka vakacicilataka e dua na tikina e na kenai sogo, ka viritura voleka ki nai cabocabo-ni-soro, e na nodra i matau na tamata ni ra sa curu ki na vale i Jiova: ka sa viritaka kina ko ira na bete era vakatawa na katuba nai lavo kecega sa kau ki na vale i Jiova.

¹⁰ Ia ni rau sa raica na nona vunivola na tui, kei koya na bete levu, ni sa levu nai lavo e na kato, erau sa lako cake ka tagana, ka wilika nai lavo sa kune e na vale i Jiova.

¹¹ Ia ni sa wili nai lavo, erau sa solia vei ira era sa kitaka na cakacaka, ko ira sa lesi me lewa na vale i Jiova: a ra sa saumi ira kina na matai ni kau kei ira na matai ni vatu, era sa kitaka tiko na vale i Jiova,

¹² vei ira talega na dauviri bai, kei ira na dauta vatu, ka me voli kina na kau kei na vatu sa ta oti, me vakavinakataka na veitiki ni vale i Jiova sa kabasu, ka me voli talega kina na ka kecega sa yaga me vakavinakataki kina na vale.

¹³ Ia sa sega ni taurivaki e dua nai lavo sa kau ki na vale i Jiova, me caka kina na bilo siliva, nai koti-ni-cina, na peseni, na davui, nai yaya koula, se nai yaya siliva:

¹⁴ a ra sa solia ga oqori vei ira na tamata cakacaka, ka vakavinakataka kina na vale i Jiova.

¹⁵ A ra sa sega ni tarogi ira tale na tamata sa soli vei ira nai lavo me ra saumi ira kina na tamata cakacaka; ni ra sa cakacaka vakadodonu.

¹⁶ Nai lavo e na vuku ni caka cala, kei nai lavo e na vuku ni valavala ca, sa sega ni kau ki na vale i Jiova; sa nodra ga na bete.

¹⁷ Sa qai lako cake ko Eseeli na tui Siria, ka vala kei Kaca, ka rawa: a sa namata ki Jerusalemi ko Eseeli me lako cake kina.

¹⁸ A sa taura ko Jioasi na tui Juta na ka tabu kecega ka cabora ko Jiosafati, kei Jiorami, kei Easaia, na nona qase, eratou sa tui Juta, kei na ka tabu ka vakacabora ko koya, kei na koula kecega sa kune vata kei nai yau ni vale i Jiova, ka mai na nona vale na tui, a sa vakauta vei Eseeli na tui Siria: a sa lako tani mai Jerusalemi ko koya.

¹⁹ Ia na kena vo ni cakacaka i Joasi, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

²⁰ A sa ia ko ira na nona tamata, ka buki kena vere, ka mokuti Joasi e na vale i Milo, ko ya sa lako sobu ki Sila.

²¹ A rau sa mokuti koya koi rau na nona tamata, ko Josakari na luve i Semeace, kei Jiosapati na luve i Someri, a sa mate ko koya; ka sa bulu vata kei ira na nona qase e na koro i Tevita; a sa tui ko Amasaia na luvena, me kenai sosomi.