2 Tui 11 - Vakavakadewa Makawa

Sa lewa ko Acalaia, ka qai moku; a sa qai tui Juta ko Joasi ni sa gone ga.

¹ Ia ko Acalaia na tina i Easaia ni sa raica, sa mate na luvena, sa ia ko koya, ka vakawabokotaka kecega na kawa ni tui.

² Ia na gane i Easaia, ko Jiosepa na luve i Jorami na tui, sa kauta vuni na luve i Easaia, ko Joasi, mai na kedra maliwa na luve ni tui era sa moku; ka sa vunitaki koya maivei Acalaia e na vale ni moce, kei koya sa susuga, a sa sega kina ni mate ko koya.

³ A rau sa vuni vata kaya e na vale i Jiova, ka yabaki ono. A sa lewa na vanua ko Acalaia.

⁴ Ia e na kenai kavitu ni yabaki, sa talaki ko Jioiata, ka kauti ira mai na turaga ni yayadrau, kei ira na kapiteni ni valu, kei ira nai vakatawa, a sa kauti ira vua ki na vale i Jiova, ka ia na veiyalayalati kei ira, ka vakabubuluitaki ira e na vale i Jiova, ka vakaraitaka vei ira na luvena na tui.

⁵ A sa vakaroti ira, ka kaya, Dou cakava na ka oqo: me dua na kena wase vei kemudou sa curu mai e na siga ni vakacecegu, me vakatawa na vale ni tui;

⁶ kei nai karua ni kena wase, me tiko e na matamata-ni-koro ko Suri; kei nai katolu ni kena wase, me tiko e na matamata-ni-koro mai dakudra nai vakatawa: ia dou na vakatawa na vale me kakua ni curu kina e dua.

⁷ Ia ka rua na kena wase vei kemudou kecega sa curu yani e na siga ni vakacecegu, me vakatawa na vale i Jiova, voleka vua na tui.

⁸ Ia dou na tiko vakavolivoliti koya na tui ni dou sa dui taura tu na nomudou i yaragi: ia ko koya sa sivita nai yalayala ni vakatawa, me vakamatei: ia dou tiko kaya na tui ni sa curu yani ka curu tale mai.

⁹ A ra sa kitaka ko ira na turaga ni yayadrau me vaka na ka kecega sa vakarota vei ira ko Jioiata na bete: a ra sa dui kauti ira yadua na nona tamata sa dodonu me curu mai e na siga ni vakacecegu, kei ira e dodonu me curu yani e na siga ni vakacecegu, a ra sa lako vei Jioiata na bete.

¹⁰ A sa solia ko koya na bete, vei ira na turaga ni yayadrau, na moto kei nai sasabai i Tevita na tui, ka tu e na vale i Jiova.

¹¹ A sa tu ko ira nai vakatawa, ni ra sa taura yadua na nonai yaragi, ka vakavolivolita na tui, mai na yasa i matau ni vale, ka yaco ki na yasa i mawi ni vale, ka tu voleka ki nai cabocabo-ni-soro kei na vale.

¹² A sa kauta ki tautuba na luvena na tui ko koya, ka vakaisalataka e nai sala ni tui, ka solia vua nai vola ni vunau; a ra sa buli koya me tui, ka lumuti koya; a ra sa cobo, ka kaya, Me bula na tui.

¹³ Ia ni sa rogoca ko Acalaia na nodra ue nai vakatawa, kei na tamata, sa lako ko koya vei ira na tamata ki na vale i Jiova.

¹⁴ Ia ni sa rai voli ko koya, raica, sa tu e na kenai tutu ko koya na tui, me vaka na kenai valavala, kei ira na turaga, kei ira era dauuvu davui era tu vata kei na tui, a ra sa reki kecega na lewe ni vanua, ka uvu davui. A sa dresulaka na nonai sulu ko Acalaia, ka kacivaka, Na vere! na vere!

¹⁵ A sa vakarota ko Jioiata na bete, vei ira na turaga ni yayadrau, ko ira na turaga ni valu, ka kaya vei ira, Dou kauti koya ki tautuba e na kedra maliwa nai vakatawa: ia me vakamatei e nai seleiwau na tamata sa muri koya. Ni sa kaya na bete, Me kakua ni vakamatei e loma ni vale i Jiova.

¹⁶ A ra sa taura; a sa lako ko koya e na sala sa daulako kina na ose ki na vale ni tui: a sa vakamatei maikea.

¹⁷ A sa ia ko Jioiata na veiyalayalati kei Jiova kei koya na tui kei ira talega na tamata, me ra nona tamata ko Jiova: vei koya talega na tui kei ira na tamata.

¹⁸ A ra sa curuma na bure kalou i Peali ko ira kecega na lewe ni vanua, ka basuraka; ka ra talaraka sobu na kenai cabocabo-ni-soro, ka ra sa vakacataka sara na kena veimatakau, a ra sa vakamatei Matani na bete i Peali e na mata ni cabocabo-ni-soro Ia sa lesia na bete na turaga eso me lewa na vale i Jiova.

¹⁹ A sa kauti ira na turaga ni yayadrau, kei ira na kapiteni ni valu, kei ira nai vakatawa, kei ra kecega na lewe ni vanua; a ra sa kauti koya sobu na tui mai na vale i Jiova, ka lako e na sala sa lako ki na matamata-ni-koro era sa dautiko kina nai vakatawa, ki na vale ni tui. A sa tiko ko koya e na nodra i tikotiko vakaturaga na tui.

²⁰ A ra sa reki kecega na lewe ni vanua, a sa tiko vinaka na koro; a ra sa vakamatei Acalaia e nai seleiwau mai na vale ni tui.

²¹ Sa vitu na yabaki i Jioasi ni sa tekivu me lewa: