2 Timoci 4 - Vakavakadewa Makawa

Sa vakarota tale vua na ka eso, 15. Sa tukuna ni sa voleka ni mate, a sa sega ni rere, 68. Sa tukuni Alekisada, kei ira tale eso, a sa qai tinia na nonai vola, 922.

¹ Ia kau sa vakarota, e na mata ni Kalou, kei Jisu Karisito, o koya ena lewai ira na bula kei ira na mate e na nona rairai mai kei na nona matanitu;

² mo vunautaka na Vosa; gumatua e na gauna vinaka, e na gauna ca; mo tukuna na ka e ca, mo vunauci ira sa cala, mo dauvakarota tiko e nai vakavuvuli ka vosota vakalevu sara.

³ Ni na yaco na gauna era na sega ni vosota kina nai vakavuvuli dodonu; ia ena vaka na nodra gagadre ca, era na vakalewevuqataki ira kina na nodra i vakavuvuli, ni sa qasikanunu na daligadra;

⁴ a ra na vagolea tani na daligadra mai na ka dina, ka lesu ki nai tukutuku wale.

⁵ Ia ko iko, mo yalomatua e na ka kecega, mo vosota na ka rarawa, mo kitaka na cakacaka ni vakavuvuli, vakayacora sara na ka ko sa lesi kina moi talatala.

⁶ Niu sa vakarau tu meu liviraki, ka sa voleka na siga ni noqu toki yani.

⁷ Au sa vala oti e nai valu vinaka, au sa ciciva oti na cere, au sa taura matua na vakabauta:

⁸ emuri, sa maroroi me noqu nai sala vakaturaga ni valavala dodonu, o koya ena solia mai vei au na Turaga, o koya na turaga-ni-lewa dodonu, e na siga ko ya; ia ena sega vei au duaduaga, vei ira kece talega era sa vinakata na nona rairai mai.

⁹ Gumatua mo lako vakariri mai vei au:

¹⁰ ni sa biuti au ko Timasa, ni sa lomani vuravura oqo, ka sa lako ki Cesalonaika; ko Kirisiki ki Kalatia, o Taito ki Talimetia.

¹¹ Sa tiko vei au ko Luke duaduaga. Kauti Marika mo drau lako vata kaya mai: ni sa yaga vei au ko koya e na cakacaka.

¹² Au sa talai Tikiko ki Efeso.

¹³ Ai tutuvi kau a laiva mai Tiroa vei Karipo, ni ko sa lako mai, mo kauta mai, kei nai vola, ia mo nanuma sara nai vola kuli-ni-sipi.

¹⁴ Sa levu na ka ca ka kitaka vei au ko Alekisada na matai ni parasa; ena sauma vei koya na Turaga me vaka na nona cakacaka:

¹⁵ mo qarauni iko talega maivua; ni sa qatia vakalevu na neitou vosa ko koya.

¹⁶ Niu a tukuni au mada eliu, sa sega e dua na tamata keirau sa tu vata kaya, ia sa biuti au ko ira kecega: me kakua ni wili vei ira.

¹⁷ Ia sa tu vata kei au na Turaga, a sa vakaukauwataki au; me kilai sara e na vukuqu na ka sa vunautaki, me ra rogoca talega na veimatanitu kecega; ia kau a vakabulai mai na gusu ni laioni.

¹⁸ Ena vakabulai au na Turaga mai na ka ca kecega, ka na vakayacori au talega ki na nona matanitu vakalomalagi: me ia vua na vakarokoroko ka sega ni mudu. Emeni.

¹⁹ Au sa loloma yani vei Pirisila kei Akuila, vei ira talega na lewe-ni-vale i Onesiforo.

²⁰ Sa tiko mai Korinica ko Erasito: ia kau sa laivi Tirofimo mai Milito ni sa tauvi-mate.

²¹ Gumatua mo liu mai ni sa bera na vula i liliwa. Sa loloma yani vei iko ko Upolo, kei Putena, kei Laino, kei Kilotia, kei ira kecega na veiwekani.

²² Me tiko vata kei na yalomu na Turaga ko Jisu Karisito. Me nomudou na loloma. Emeni.