2 Timoci 2 - Vakavakadewa Makawa

Sa vakarota ko koya vei Timoci na ka eso, 115. Sa tukuna eso nai vakavuvuli ca, 1618; a sa tukuna nai vavakoso lewe ni lotu, 1921. Sa vakavulici koya e nai valavala e kilikili kaya, 2226.

¹ O koya oqo, na luvequ, mo qai vakaukauwataki iko e na loloma sa tu vei Karisito Jisu.

² Ia na veika ko a rogoca maivei au e na kedra maliwa na lewe vuqa era dauvakadinadina, mo solia vei ira na tamata yalodina, era na rawata me vakavulici ira na tani.

³ O koya oqo mo qai vosota na ca, me vaka na sotia vinaka i Jisu Karisito.

⁴ Sa sega na tamata sa dauia nai valu me sa vakaogai koya talega e na cakacaka ni bula oqo; me vinaka kina vua sa digitaka me sotia.

⁵ Ia ko koya sa gumatua e na veiqito, sa sega ni vakaisalataki vakaturaga, kevaka sa sega ni ia me vaka na kenai vakarau.

⁶ Nai vakatau-ni-were sa cakacaka, me sa kania taumada na vuana.

⁷ Vakananuma na ka kau sa kaya; ia me solia vei iko na Turaga na yalo e kila rawa na ka kecega.

⁸ Vakananumi koya sa vu mai na kawa i Tevita, ko Jisu Karisito, o koya sa vakaturi cake mai na mate, me vaka na noqu i tukutuku-vinaka:

⁹ o koya kau sa vosota kina na ca, me vaka na tamata caka ca, ia kau sa vesuki kina; ia na vosa ni Kalou sa sega ni vesuki.

¹⁰ O koya oqo kau sa vosota kina na ka kecega e na vukudra na digitaki, me ra rawata talega na bula sa yaco e na vuku i Karisito Jisu, kei na veivakalougatataki sa sega ni mudu.

¹¹ Sa dina na vosa: Kevaka eda sa mate kaya, eda na bula vata talega:

¹² kevaka eda sa vosota na ca, eda na lewa vata kaya: kevaka eda sa cakitaki koya, ena cakitaki keda talega ko koya:

¹³ kevaka eda sa sega ni vakadinata, sa yalodina tikoga ko koya: sa sega ni cakitaki koya rawa vakai koya.

¹⁴ Mo vakananumi ira e na veika oqo, ia mo vakaroti ira matua e na mata ni Turaga me ra kakua ni veiletitaka na vosa, a ka sa sega ni yaga ka sa vakacalai ira era sa rogoca.

¹⁵ Gumatua sara mo vakaraitaki iko mo vinaka e na mata ni Kalou, a tamata daucakacaka sa sega e dua na ka me madua kina, mo wasea vakadodonu nai vakavuvuli dina.

¹⁶ Ia na dautalanoa vakasisila ka sega ni yaga, mo drotaka: ni na tubu cake kina nai valavala sa sega ni vakalotu:

¹⁷ ia na nodra vosa ena kakana tiko me vaka na vidikoso ca: sa vakakina ko Imeneo kei Filito:

¹⁸ erau sa sese mai nai vakavuvuli dina; ni rau sa kaya sa oti na tu cake tale mai na mate; a rau sa vukica sara kina na nodra vakabauta eso.

¹⁹ Ia na yavu dei ni Kalou sa tu ga, ia sa vakaoqo na vosa sa volai kina, Sa kilai ira na nona tamata na Turaga: ka, Me ra lako tani mai nai valavala ca ko ira yadua era sa cavuta na yaca i Karisito.

²⁰ Ia e na vale levu sa sega walega ni tu na veibilo koula kei na veibilo siliva, eso talega na bilo kau kei na bilo qele; ia eso sa talei, eso sa sega ni talei.

²¹ Ia kevaka e dua na tamata sa vakasavasavataki koya mai na veika oqo, ena yaco kina me bilo talei, sa vakasavasavataki, ka yaga sara vua na Turaga, ni sa vakarau tu ki na cakacaka vinaka kecega.

²² Ia mo dro tani mai na gagadre ca vakacauravou; ia mo muria na yalododonu, na vakabauta, na loloma, na veivinakati kei ira era sa masuta na Turaga e na yalosavasava.

²³ Ia mo dro tani mai na veileti lialia eda sega ni vakatavulici kina, ni ko sa kila era sa vakavuna ga na veileti.

²⁴ Ia sa tabu ni veileti nai talatala ni Turaga; ia me yalomalumalumu vei ira kecega na tamata, me vakavuvuli vakavuku, me dauvosota,

²⁵ me vakatavulici ira e na yalomalumalumu era sa dauveivorati; de solia beka vei ira na Kalou na veivutuni me ra kila kina na ka dina,

²⁶ ka me ra bula tale mai nai cori ni tevoro, ni sa vakabobulataki ira ko koya me vaka na nona lewa.