2 Timoci 1 - Vakavakadewa Makawa

Sa loloma yani vei Timoci ko Paula, a sa tukuni koya kei na tinana kei na buna, 17. Sa qai vakarota vua na ka eso, 814. Sa tukuni ira eso era a biuti koya; kei Onesiforo, ni sa lomani koya dina sara, 1518.

¹ Koi au ko Paula, nai apositolo i Jisu Karisito e na lewa ni Kalou, e na vuku ni bula ka yalataki, sa tu vei Karisito Jisu,

² vei Timoci, na noqu gone ni toko: Me yaco na loloma, na yalololoma, na vakacegu mai vua na Kalou ko Tamada kei Karisito Jisu na noda Turaga.

³ Au sa vakavinavinaka vua na Kalou, o koya kau sa qarava e na yalo dina me vaka na nodra i valavala na qase eliu, niu sa sega ni mudu ni nanumi iko e na noqu masu e na bogi kei na siga;

⁴ niu sa gadreva vakalevu meu raici iko, niu sa nanuma na wai ni matamu, meu vakasinaiti kina e na marau;

⁵ niu sa vakananumi e na vakabauta dina sara sa tu vei iko, ka tu eliu vei Loi na bumu, vei Unaisi talega na tinamu, au sa dinata sa tu talega vei iko.

⁶ O koya oqo kau sa vakananumi iko kina mo uqeta nai solisoli ni Kalou, sa yaco vei iko e na veitabaki ni ligaqu.

⁷ Ni sa sega ni solia mai vei keda na Kalou na yalo ni rere: a yalo ni kaukauwa ga, kei na yalololoma, kei na yalomatua.

⁸ O koya mo qai kakua ni maduataka na kenai tukutuku ni noda Turaga, se koi au na nona tamata sa vesu tu: ia mo vosota na veivakararawataki e na vuku ni tukutuku-vinaka me vaka na kaukauwa ni Kalou;

⁹ o koya sa vakabulai keda, ka sa kacivi keda me da yalosavasava, a sa sega ga e na vuku ni noda cakacaka, e na vuku ni sa nonai naki ga kei na loloma walega ka soli vei keda eliu, e na vuku i Karisito Jisu, sa vakatekivu emuri ko vuravura;

¹⁰ ia ka sa qai vakaraitaki mai ni sa rairai mai na nodai Vakabula ko Jisu Karisito, o koya sa vakaotia na mate, ka vakavotuya na bula kei na tawa mate rawa e nai tukutuku-vinaka:

¹¹ au a lesi kina meu vunau, meu apositolo talega, kei na nodra i vakavuvuli na veimatanitu.

¹² O koya talega kau sa vosota kina na veika oqo: ia kau sa sega ni madua kina: niu sa kilai koya kau a vakararavi kina, ia kau sa kila dina sara ni sa rawata ko koya me maroroya na ka kau sa solia vua ka yacova na siga ko ya.

¹³ Mo taura matua nai vakarau ni vosa dina ko a rogoca maivei au, e na vakabauti Karisito Jisu kei na loloma.

¹⁴ A ka vinaka sa soli vei iko mo taura matua, ni sa vukei iko na Yalo Tabu sa tu vei keda.

¹⁵ A ka oqo ko sa kila, ni sa biuti au ko ira kecega na kai Esia; sa vakakina ko Faijelo kei Erimojini.

¹⁶ Me yalololoma mada na Turaga kivei ira na mataqali i Onesiforo: ni sa vakacegui au wasoma, a sa sega ni maduataki au niu sa vesu tu:

¹⁷ ia ni sa tiko mai Roma, sa vakasaqarai au matua, a sa kunei au.

¹⁸ Me solia mada vei koya na Turaga me kune loloma mai vua na Turaga e na siga ko ya: ia na kena levu ni ka sa qaravi au kina mai Efeso, ko sa kila vinaka sara.