2 Samuela 9 - Vakavakadewa Makawa

Ai tukutuku kei Mefiposece na luve i Jonacani, kei na loloma i Tevita vua, 1-13.

¹ A sa kaya ko Tevita, Sa vo tiko li e dua e na mataqali i Saula me'u caka vinaka vua e na vuku i Jonacani, se segai?

² A sa dua na tamata e na mataqali i Saula, na yacana ko Sipa. A sa kacivi ko koya vei Tevita, a sa tarogi koya na tui, O iko ko Sipa, se segai? A sa kaya ko koya, Koi au saka ga na nomuni tamata.

³ A sa kaya na tui, Sa sega li ni vo tiko e dua na tamata e na mataqali i Saula, me'u caka vinaka vua e na vuku ni Kalou, se segai? A sa kaya vua na tui ko Sipa, Sa bula tiko na luve i Jonacani, a sa lokiloki na yavana.

⁴ A sa kaya vua ko koya na tui, Sa evei ko koya? A sa kaya vua na tui ko Sipa, Raica, sa tiko e na vale i Mekiri, na luve i Amieli, mai Lo-tipari.

⁵ A sa talaki ko Tevita na tui, ka kauti koya mai na vale i Mekiri, na luve i Amieli, mai Lo-tipari.

⁶ A sa lako mai vei Tevita ko Mefiposece, na luve i Jonacani, na luve i Saula, a sa cuva sara ki na qele, ka vakarokoroko. A sa kaya ko Tevita, I Mefiposece. A sa kaya ko koya, Koi au saka na nomuni tamata!

⁷ A sa kaya vua ko Tevita, Mo kakua ni rere, ni'u na caka vinaka vakaidina vei iko e na vuku i Jonacani, na tamamu, ia ka'u na vakasuka vei iko na vanua kecega ka nei Saula na nomu qase; ia ko iko, ko na kana tikoga mai na noqu tepeli.

⁸ A sa vakarokoroko ko koya, ka kaya, A cava na nomuni tamata, mo ni golevi au kina na koli mate?

⁹ A sa kacivi Sipa na tamata i Saula ko koya na tui, ka kaya vua, Au sa solia vua na luvena na nomu turaga na ka kecega ka nei Saula kei ira kecega na nona mataqali.

¹⁰ Ia ko iko, kei ira na luvemu, kei ira na nomu tamata, dou wereca na qele vei koya, ia mo kauta mai na kakana me kena na luve ni nomu turaga: ia ena kana tikoga mai na noqu tepeli ko Mefiposece, na luvena na nomu turaga: ia ko Sipa, sa le tinikalima na luvena tagane, ka le ruasagavulu na nona tamata.

¹¹ A sa kaya vua na tui ko Sipa, Ena cakava na nomuni tamata me vaka na ka kecega sa vakarota koi kemuni na noqu turaga na tui: ka sa kaya na tui, ena kana e na noqu tepeli ko Mefiposece me vaka e dua vei ira na luve ni tui.

¹² A sa dua na luve i Mefiposece na gone tagane, a yacana ko Maika. Ia ko ira kecega ka tiko e na vale i Sipa era sa dauqaravi Mefiposece.

¹³ A sa tiko mai Jerusalemi ko Mefiposece; ka sa kana tikoga mai na tepeli ni tui; ia sa lokiloki na yavana ruarua.