2 Samuela 8 - Vakavakadewa Makawa

Ia ko Tevita sa vakamalumalumutaki ira na kai Filisitia, kei ira na Moapi, kei Etateseri, kei ira na kai Siria, 1-8. Sa vakacabora ko koya nai toki ni valu vua na Kalou, 9-12. Sa vakamalumalumutaki Siria kei Itomi, 13,14. O ira na tamata vakaturaga i Tevita, 15-18.

¹ Sa oti na ka oqo, sa qai yaviti ira na kai Filisitia ko Tevita, ka vakamalumalumutaki ira: a sa tauri Mecekiama vakaukauwa ko Tevita maivei ira na kai Filisitia.

² A sa mokuti ira na Moapi, a sa vakarauti ira e na wa ni vakarau, ka vakadavori ira ki na qele: a sa vakarauti ira e na wa ni vakarau, e rua nai vakarau me vakamatei, ka dua nai vakarau taucoko me vakabulai: a ra sa qai qali vei Tevita ko ira na kai Moapi ka dausoli vakacavacava vua.

³ A sa yavita ko Tevita na luve i Riopi, ko Etateseri, na tui Sopa, ni sa lako ko koya me taura tale na nona lewa mai na uciwai ko Uferetisi.

⁴ A sa rawata maivei koya ko Tevita e le dua na udolu ka vitu na drau na tamata sa vodo ose, ka le rua na oba na tamata era taubale: a sa tava na tularua ni ose ni qiqi-ni-valu kecega ko Tevita, ia sa maroroya ga maivei ira na ose me rauta e dua na drau na qiqi-ni-valu.

⁵ Ka ni ra sa lako mai na kai Siria mai Tamasiko me vukei Etateseri na tui Sopa, sa mokuta ko Tevita e le rua na oba ka rua na udolu na tamata vei ira na kai Siria.

⁶ Sa qai lesia ko Tevita na mataivalu e vakatawa e Siria mai Tamasiko; a ra sa qai qali vei Tevita ko ira na kai Siria, ka dau soli vakacavacava vua. A sa vakabulai Tevita ko Jiova e na vanua kecega ka lako kina.

⁷ A sa taura ko Tevita na veisasabai koula sa nodra na tamata i Etateseri, ka kauta ki Jerusalemi.

⁸ A sa taura ko Tevita na tui e dua na ka levu sara na parasa, mai Peta kei Perocae, erau sa koro i Etateseri.

⁹ Ni sa rogoca ko Tou na tui Emaci ni sa mokuta ko Tevita nai valu taucoko i Etateseri,

¹⁰ sa qai talai Jorami na luve i Tou vei Tevita na tui, me veikidavaki kaya, ka vosavakalougatataki koya, ni sa ia nai valu kei Etateseri, ka mokuti koya ni sa veivala oti kei Etateseri ko Tou: a sa kauta vata kaya ko Jorami nai yaya siliva kei nai yaya koula, kei nai yaya parasa:

¹¹ ko ya talega sa vakacabora vei Jiova ko Tevita na tui, ka sa vakacabora talega na siliva kei na koula ka rawata ko koya mai na veimatanitu kecega sa vakamalumalumutaka;

¹² io, mai Siria, kei Moapi, kei ira na luve i Amoni, kei ira na kai Filisitia, kei ira na Amalekaiti, kei nai toki ni valu mai vua na luve i Riopi, ko Etateseri, na tui Sopa.

¹³ A sa rogo levu na yaca i Tevita, ni sa tale mai na nona mokuti ira na kai Siria e lewe tinikawalu na udolu, mai na Buca ni Masima.

¹⁴ A sa lesia ko koya na veimataivalu i vakatawa ki Itomi; io, ki Itomi taucoko, a ra sa qai tauri kecega ko ira na kai Itomi me ra qali vei Tevita. A sa vakabulai Tevita ko Jiova e na vanua kecega sa lako kina.

¹⁵ A sa nodra tui na Isireli kecega ko Tevita: a sa kitaka na lewa dodonu ko Tevita vei ira kecega na nona tamata.

¹⁶ A sa lewai ira nai valu ko Joapi na luve i Seruaia; a sa dauvola na ka ni matanitu ko Jiosafati, na luve i Eailute;

¹⁷ ia erau sa bete ko Setoki, na luve i Eiitupi, kei Eiimeleki, na luve i Epaiaca; a sa vunivola ko Siraia;

¹⁸ a sa turaga vei ira na Kireci, kei na Pileci, ko Pinaia, na luve i Jioiata; a ra sa turaga ko iratou na luve i Tevita.