2 Samuela 7 - Vakavakadewa Makawa

Sa nanuma ko Tevita me tara na vale i Jiova; a sa kaya ko Jiova me kakua, ka me na qai tara ga ko koya na luvena, 1-17. Sa la'ki masu kina ko Tevita, ka vakavinavinaka, 18-29.

¹ Ia ni sa mai tiko na tui e nona vale, a sa solia vua ko Jiova me vakacegu maivei ira kecega na nona meca era tiko volita.

² Sa kaya na tui vei Necani na parofita, Mo raica mada, oi au, ka'u sa tiko e na vale sitari, ia na kato ni Kalou sa tiko e loma ni vale laca.

³ A sa kaya vua na tui ko Necani, A ka kecega sa tu e lomamuni mo ni la'ki cakava; ni sa tiko vata kei kemuni ko Jiova.

⁴ Ia e na bogi ko ya sa lako mai na vosa i Jiova vei Necani, ka kaya,

⁵ Mo la'ki kaya vua na noqu tamata ko Tevita, Sa vosa vakaoqo ko Jiova, O iko beka ko na tara e dua na noqu vale me'u tiko kina?

⁶ Ni'u sa sega ni tiko e na dua na vale mai na siga ka'u a kauti ira cake kina na Isireli mai Ijipita, ka yacova na siga edaidai, ia ka'u a lako voli ga e na vale laca, kei na vale vakacevaceva.

⁷ E na tikina kecega ka'u a lako voli kina kei ira kecega na Isireli, ka'u a vosataka li e dua na vosa vua e dua vei ira na veimataqali i Isireli, o ira ka'u a vakarota me lewai ira na noqu tamata na Isireli, ka vaka, A cava dou sa sega kina ni tara e dua na vale sitari me noqu?

⁸ Ia mo vosa kina vakaoqo vua na noqu tamata ko Tevita, Sa vosa vakaoqo ko Jiova ni lewe vuqa, Au a kauti iko mai na bai ni sipi, ni ko a muria na sipi, mo turaga vei ira na noqu tamata na Isireli:

⁹ ia ka'u a tiko vata kei iko e na vanua kecega ko a lako kina, ia ka'u a muduka tani na nomu meca kecega, ia ka'u na vakarogoya na yacamu, me vaka na yacadra na tamata rogo e vuravura:

¹⁰ ka'u na lesia e dua na tikina vei ira na noqu tamata na Isireli, ka vakataudeitaki ira, me ra tiko e na nodra tikina dina ka sega ni yavala tale; ka me kakua ni vakamalumalumutaki ira tale ko ira na tamata ca, me vaka eliu,

¹¹ me vaka mai na siga ka'u a lesi ira kina eso na turaga ni lewa me lewai ira na noqu tamata na Isireli; ia ka'u a vakacegui iko mai na nomu meca kecega. A sa tukuna vei iko ko Jiova ni na vakatuburi iko ko Jiova mo qase ni dua na mataqali.

¹² Ni sa oti na nomu gauna, ka ko sa moce vata kei ira na nomu qase, ka'u na vakataudeitaka na nomu kawa, o koya ka lako mai na yagomu, ia ka'u na vakataudeitaka na nona matanitu.

¹³ O koya ga ena tara na vale ki na yacaqu, ia ka'u na vakataudeitaka nai tikotiko ni nona matanitu, ka tawa mudu.

¹⁴ Au na tamana koi au, ia ena luvequ ko koya, Kevaka sa kitaka na ka ca ko koya, ka'u na cudruvi koya me vaka sa daucudruvi ko ira na tamata, kei na ka era sa dauyaviti kina ko ira na luve ni tamata:

¹⁵ ia na noqu loloma ena sega ni kau tani mai vua, me vaka ka'u a kauta tani mai vei Saula, o koya ka'u a vakasivoya e matamu.

¹⁶ Ia na nomu mataqali, kei na nomu matanitu, ena vakataudeitaki e matamu, ka sega ni oti: ena vakataudeitaki ka tawa mudu na nomu i tikotiko vakaturaga.

¹⁷ Sa vosa vei Tevita ko Necani me vaka na vosa kecega oqo, kei na raivotu kecega oqo.

¹⁸ A sa lako ko Tevita na tui, ka tiko e na mata i Jiova, a sa kaya, O cei koi au, kemuni na Turaga ko Jiova? ka cava na noqu mataqali, ko ni sa kauti au mai kina ka yacova na gauna oqo?

¹⁹ Ia sa ka lailai talega oqo e matamuni, kemuni na Turaga ko Jiova, ni kemuni sa vosataka talega na noqu mataqali, na nomuni tamata, e na gauna sa bera sara ni yaco. Kemuni na Turaga ko Jiova, sa dauvakaoqo li na nodra i valavala na tamata?

²⁰ Ia ka cava tale me kaya vei kemuni ko Tevita? ni kemuni sa kila, koi kemuni na nomuni tamata Turaga Jiova.

²¹ E na vuku ni nomuni vosa, ka me vaka na lomamuni, ko ni sa cakava na ka levu kecega oqo, ka vakatakila vei au na nomuni tamata.

²² O koya sa levu kina koi kemuni, Jiova na Kalou: ni sa sega e dua sa tautauvata kei kemuni, ka sa sega na Kalou, koi kemuni duaduaga, me vaka na ka kecega keimami sa rogoca e na daliga i keimami.

²³ Ia sa dua li na matanitu e vuravura me tautauvata kei ira na nomuni tamata na Isireli, o ira ka lako kina na Kalou me volia me ra nona tamata, me vakarogoya talega na yacana, ka cakava vei kemuni na ka levu kei na ka rerevaki, e na vuku ni nomuni vanua, e na matadra na nomuni tamata, o ira ko ni a volia me nomuni mai Ijipita, mai na veimatanitu kei na nodra kalou?

²⁴ Ia ko ni sa vakataudeitaki ira vei kemuni na nomuni tamata na Isireli me ra nomuni tamata ka tawa mudu: ia koi kemuni, Jiova, ko ni sa yaco me nodra Kalou.

²⁵ Ia oqo, kemuni Jiova na Kalou, na vosa ko ni a vosataka e na vuku ni nomuni tamata, kei na vuku ni nona mataqali, mo ni vakataudeitaka mada, ka tawa mudu, ka kitaka me vaka ko ni a kaya.

²⁶ Ia me vakalevulevui na yacamuni ka tawa mudu, ka vaka, Ko Jiova ni lewe vuqa sa nodra Kalou na Isireli; ia me vakataudeitaki e matamuni na mataqali i Tevita na nomuni tamata.

²⁷ Io koi kemuni, Jiova ni lewe vuqa, na nodra Kalou na Isireli, ko ni sa vakatakila vua na nomuni tamata, ka vaka, Au na vakatuburi iko mo qase ni dua na mataqali; o koya sa doudou kina na yaloqu na nomuni tamata me'u masu vei kemuni e na masumasu oqo.

²⁸ Ia oqo, na Turaga Jiova, koi kemuni na Kalou, a sa dina na nomuni vosa, ka ko ni sa yalataka na ka vinaka oqo vei au na nomuni tamata:

²⁹ ia oqo, me sa yalomuni, mo ni vakalougatataka na mataqali ni nomuni tamata, me tu ga e matamuni, ka tawa mudu: ni kemuni sa vosataka, na Turaga ko Jiova: ia me kalougata ka tawa mudu maivei kemuni na mataqali ni nomuni tamata.