2 Samuela 3 - Vakavakadewa Makawa

Sa kaukauwa cake tiko ko Tevita, 1; a yacadratou na luve i Tevita sa sucu mai Epironi, 2-5. Sa veileti ko Apineri kei Isi-poseci, a sa totaki Tevita kina ko Apineri, 6-21. Sa mokuti Apineri vakaca ko Joapi, a sa cata ko Tevita, 22-30. Sa tagicaki Apineri ko Tevita ka buluti koya, 31-39.

¹ A ra sa vala vakadede ko ira na mataqali i Saula kei ira na mataqali i Tevita: a sa tubu cake me kaukauwa tiko ko Tevita, a sa malumalumu sobu tiko na mataqali i Saula.

² A sa sucu mai Epironi eso na luve i Tevita eratou tagane: a nona ulumatua ko Aminoni, o koya sa sucu vei Eiinoami na yalewa ni Jesirieli;

³ kei na kenai karua, ko Kiliapi, o koya sa sucu vei Apikali na yalewa ni Kameli na wati i Nepali; kei na kenai katolu, ko Apisalomi na luve i Meeka na yalewa na luve i Talimei, na tui Kesuri;

⁴ kei na kenai kava, ko Atonaija na luve i Akici; kei na kenai kalima, ko Sefataia na luve i Epitali;

⁵ kei na kenai kaono, ko Iciriami, o koya sa sucu vei Ekila na wati i Tevita. O iratou oqo, na luve i Tevita, ka ra sa sucu mai Epironi.

⁶ Ia ni ra sa vala tiko ko ira na mataqali i Saula kei na mataqali i Tevita, sa vakaukauwataki koya ko Apineri e na vuku ni mataqali i Saula.

⁷ Ia sa dua na wati i Saula, a watina lailai, a yacana ko Risipa na luve i Eya: a sa kaya vei Apineri ko Isi-poseci, A cava ko a curu kina vua na watina lailai i tamaqu?

⁸ A sa waqa vakalevu mai na cudru i Apineri e na vuku ni vosa i Isi-poseci, a sa kaya, Oi au beka na ulu ni koli i Juta? au sa caka vinaka e na gauna oqo ki na mataqali i Saula na tamamu, kei iratou na tacina, kei na wekana, ka sega ni soli iko ki na liga i Tevita; ia ko sa beitaki au edaidai ni'u ca e na vuku ni yalewa ko ya.

⁹ Me cakacaka vakakina na Kalou vei Apineri, ka vakaikuritaka, kevaka ka'u sa sega ni cakava vei Tevita me vaka sa bubului ko Jiova me cakava vua;

¹⁰ me'u kauta tani na matanitu mai na mataqali i Saula, ka vakatura cake nai tikotiko vakaturaga i Tevita me lewai ira na Isireli kei ira na Juta, mai Tani ka yacovi Pieri-sepa.

¹¹ A sa sega ni vosa rawa tale vei Apineri ko koya, ni sa rerevaki koya.

¹² A sa tala eso na mata vei Tevita ko Apineri, e na vukuna ka me ra kaya, A nei cei na vanua? a sa kaya talega, Me daru veiyalayalati mada, ka raica, ena tiko kei iko na ligaqu me'u vukici ira kecega na Isireli vei iko.

¹³ A sa kaya ko koya, E vinaka; au na ia na veiyalayalati kei iko; ia sa dua ga na ka ka'u sa lewa vei iko; oqo, mo kakua ni raica na mataqu kevaka ko sa sega mada ni kauti Maikali mai, na luve i Saula, ni ko sa mai raici au.

¹⁴ A sa tala ko Tevita eso na tamata vei Isi-poseci na luve i Saula, ka kaya, Mo solia mai na watiqu ko Maikali, o koya ka'u a rawata me noqu e na dua na drau na vuso ni kai Filisitia.

¹⁵ A sa talaki ko Isi-poseci, ka kauti koya maivua na watina, io, maivei Palitieli, na luve i Leisi.

¹⁶ A sa lako vata kaya na watina tagane, ka tagi lako ga ni sa muri koya ki Peurimi. Sa qai kaya vua ko Apineri, Mo lako, mo lesu yani. A sa lesu yani ko koya.

¹⁷ A sa veivosaki kei ira na qase ni Isireli ko Apineri, a sa kaya ko koya, Dou a qarai Tevita eliu me nomudou tui:

¹⁸ ia oqo mo dou vakayacora: ni sa vosataki Tevita ko Jiova, ka vaka, E na liga i Tevita na noqu tamata ka'u na vakabulai ira na noqu tamata na Isireli mai na ligadra na kai Filisitia, kei na ligadra na nodra meca kecega.

¹⁹ A sa vosa talega ko Apineri vei ira na Penijamini: a sa lako ko Apineri me vosataka vei Tevita mai Epironi na ka kecega sa vinaka vei ira na Isireli, kei ira kecega na Penijamini.

²⁰ A sa lako mai vei Tevita ki Epironi ko Apineri, kei ira vata kaya e lewe ruasagavulu na tamata. A sa caka magiti ko Tevita vei Apineri kei ira na tamata era sa lako vata kaya.

²¹ A sa kaya vei Tevita ko Apineri, Au na ia ka lako, ka vakasoqoni ira vata kecega na Isireli vei kemuni na noqu turaga na tui, ka me ra ia na veiyalayalati kei kemuni, mo ni lewai ira kecega sa vinakata na yalomuni. A sa talai Apineri yani ko Tevita; a sa lako ko koya e na vakacegu.

²² Ia raica, era sa tale mai ko ira na tamata i Tevita kei Joapi mai na mataivalu, a sa levu nai toki era sa kauta mai; a sa sega ni tiko kei Tevita mai Epironi ko Apineri; ni sa talai koya yani ko koya, a sa lako e na vakacegu.

²³ Ia ni sa lako mai ko Joapi, kei ira kecega nai valu era sa tiko vata kaya, sa tukuni vei Joapi, ka vaka, Sa lako mai vei koya na tui ko Apineri, na luve i Neri, a sa talai koya yani ko koya, a sa lako ga e na vakacegu.

²⁴ A sa lako mai vua na tui ko Joapi, ka kaya, A cava ko ni sa cakava? raica, sa lako mai vei kemuni ko Apineri; a cava ko ni a talai koya yani kina, a sa lako sara yani ko koya?

²⁵ o ni sa kilai Apineri, na luve i Neri, ni sa lako mai ko koya me vakacalai kemuni, ka me kila na nomuni veilakoyaki, ia me kila na ka kecega ko ni sa cakava.

²⁶ Ia ni sa lako tani ko Joapi maivei Tevita, sa tala eso na tamata me muri Apineri, a ratou sa vakalesui koya mai na mata-ni-wai mai Sira; a sa sega ni kila ko Tevita.

²⁷ Ia ni sa lesu mai ki Epironi ko Apineri, sa kauti koya vakatikitiki ki na matamata-ni-koro ko Joapi, me vosa lo vua, a sa cokai koya maikea e na ketena, ai sau ni dra i Asaeli na tacina, a sa mate kina ko koya.

²⁸ A sa rogoca emuri ko Tevita, a sa kaya, Au sa sega ni cala koi au, kei na noqu matanitu, e na mata i Jiova, ka sega ni mudu, e na vuku ni dra i Apineri, na luve i Neri:

²⁹ me baleta na ulu i Joapi, kei na mataqali taucoko i tamana; ia me kakua ni mudu mai na mataqali i Joapi na tamata sa turudrabalavu, se na vukavuka, se dua sa vakaititoko voli, se dua e bale e nai seleiwau, se dua e dravudravua e na kakana.

³⁰ A rau sa vakamatei Apineri ko Joapi kei Apisai na tacina, ni sa vakamatei Asaeli na tacidrau ko koya mai Kipioni, ni sa ia nai valu.

³¹ A sa kaya ko Tevita vei Joapi, vei ira kece talega na tamata era sa tiko vata kaya, Dou dresulaka na nomudou i sulu, ka vauci kemudou e nai sulu taga, ka tagicaki Apineri. A sa muria na tavata ko Tevita na tui.

³² A ra sa buluti Apineri mai Epironi: a sa tagi vakadomoilevu ko koya na tui, mai nai bulubulu i Apineri; a ra sa tagi ko ira kecega na tamata.

³³ A sa lelevaki Apineri ko koya na tui, ka kaya, Me mate li ko Apineri me vaka sa mate na tamata lialia?

³⁴ Sa sega ni vesuki na ligamu, a sa sega ni vakacurumi ki nai vesu kaukamea na yavamu: Me vaka sa bale na tamata e matadra na tamata ca, sa vakakina na nomu bale. A sa tagicaki koya tale ko ira kecega na tamata.

³⁵ A sa lako mai ko ira kecega na tamata me vakauqeti Tevita me kana ni sa siga toka; a sa bubului ko Tevita, ka kaya, Me cakacaka vakakina vei au na Kalou, ka vakaikuritaka, kevaka ka'u sa tovolea na madrai, se dua na ka tani, ka me dromu mada na mata-ni-siga.

³⁶ A ra sa vakasamataka na tamata kecega, a sa vinaka vei ira; ka sa vinaka vakakina vei ira kecega na tamata na ka kece sa cakava ko koya na tui.

³⁷ A sa kila ko ira kecega na tamata kei ira kecega na Isireli e na siga ko ya, ni sa sega ni vu vei koya na tui na mate i Apineri, na luve i Neri.

³⁸ A sa kaya vei ira na nona tamata ko koya na tui, Dou sa sega beka ni kila ni sa bale e Isireli edaidai oqo e dua na turaga kei na tamata rogo?

³⁹ Ia koi au, ka'u sa lumuti tu me'u tui, ia ka'u sa malumalumu ga edaidai oqo; ia eratou sa tamata dredre vei au ko iratou oqo na luve i Seruaia: me sauma ko Jiova na nona ca vei koya sa kitaka na ca.