2 Samuela 24 - Vakavakadewa Makawa

Sa dauveretaki ko Tevita me wiliki ira na nona tamata; sa cudru kina ko Jiova, a sa mate e le vitu na oba na tamata; a sa qai donu nai soro ka vakacabora ko Tevita.

¹ A sa cudru tale vei ira na Isireli ko Jiova, a sa vakauqeti Tevita ko koya vei ira, ka vaka, Mo la'ki wiliki ira na Isireli kei ira na Juta.

² A sa kaya na tui vei Joapi na kapiteni ni valu, erau tiko vata kaya, Mo lako voli mada e na kedra maliwa na veimataqali kecega ni Isireli, mai Tani ka yacovi Pieri-sepa, ka wiliki ira na tamata, me'u kila na kedrai wiliwili.

³ A sa kaya vua na tui ko Joapi, Me vakaikuritaka vakadrau ko Jiova na nomuni Kalou na kedrai wiliwili na tamata, me raici ira talega ko koya na noqu turaga na tui: ia ka cava ko ni sa vinakata kina na ka oqo na noqu turaga na tui?

⁴ Ia sa gumatua na nona vosa na tui vei Joapi, vei ira talega na turaga ni valu. A sa lako tani mai vua na tui ko Joapi, kei ira na turaga ni valu, me wiliki ira na tamata, io, na Isireli.

⁵ A ra sa qalo-kosova na Joritani, ka la'ki tiko ki Aroeri, mai na yasa ni koro ki nai matau, mai na loma ni buca nei Kata, ka donui Jaseri:

⁶ era sa qai lako ki Kiliati, kei na vanua ko Tatimi-otisi; a ra sa yaco ki Tani-jeani, ka lako voli ki Saitoni,

⁷ ka yaco ki na koro vakabai ko Taia, kei na nodra veikoro kecega na Aivaiti, kei na kai Kenani: ka ra lako yani vaka ki na mata ni ceva i Juta ka yaco ki Pieri-sepa.

⁸ Ia ni ra sa veilakoyaki voli e na vanua taucoko, era sa yaco ki Jerusalemi ni sa oti e ciwa na vula ka ruasagavulu na bogi.

⁹ A sa cavuta ko Joapi vua na tui na kedrai wiliwili na tamata: a sa le oba vakawalusagavulu na tamata qaqa vei ira na Isireli, era sa vakaiyaragi e nai seleiwau; ia ko ira na Juta, era sa le limasagavulu na oba na tamata.

¹⁰ A sa beitaki Tevita na lomana ni sa wiliki ira oti na tamata. A sa kaya vei Jiova ko Tevita, Au sa kitaka na ca levu e na ka ka'u sa cakava: ia oqo, kemuni Jiova, mo ni kauta tani mada na noqu i valavala ca na nomuni tamata: ni'u sa cakava na ka lialia sara.

¹¹ A sa duri cake ko Tevita e na mataka; a sa lako mai na vosa i Jiova vei Kata na parofita, na rairai nei Tevita, a sa kaya,

¹² Mo la'ki kaya vei Tevita, Sa vosa vakaoqo ko Jiova, E tolu na ka ka'u sa cavuta vei iko; mo digitaka e dua, me'u vakayacora vei iko.

¹³ A sa lako vei Tevita ko Kata, ka kaya vua, Me yacovi iko na dausiga e nomu vanua ka yabaki vitu? se mo dro tiko e matadra na nomu meca ka vula tolu, ni ra sa vakasavi iko? se me bogi tolu na mate levu e na nomu vanua? mo lewa mada, se cava na vosa me'u kauta tale vua ka talai au mai.

¹⁴ A sa kaya vei Kata ko Tevita, Au sa taqaya vakalevu: me da lutu mada ki na liga i Jiova; ni sa levu na nona loloma: ia me'u kakua ni lutu ki na liga ni tamata.

¹⁵ A sa vakayacora ko Jiova na mate levu vei ira na Isireli e na mataka ko ya ka yacova na siga sa lokuca: a ra sa mate vei ira na tamata mai Tani ka yaco ki Pieri-sepa e le vitu na oba na tamata.

¹⁶ Ia ni sa dodoka na ligana na agilose vaka ki Jerusalemi me vakarusa, sa qai veivutuni ko Jiova e na vuku ni rarawa, a sa kaya vua na agilose ka vakarusai ira tiko na tamata, Sa levu; me cegu oqo na ligamu. A sa tu na agilose i Jiova e na rara ni samu sila nei Arauna na Jepusaiti.

¹⁷ Ia ni sa raica ko Tevita na agilose ka mokuti ira na tamata, sa vosa vei Jiova ka kaya, Mo ni raica, koi au ga sa caka cala, io, ka'u sa kitaka na ka ca: ia ko ira na sipi oqo, a cava era sa cakava? me yaviti au ga kei ira na mataqali i tamaqu, na ligamuni.

¹⁸ A sa lako vei Tevita e na siga ko ya ko Kata, ka kaya vua, Mo lako cake, mo cakava e dua nai cabocabo-ni-soro vei Jiova mai na rara ni samu sila nei Arauna na Jepusaiti.

¹⁹ Ka sa lako cake ko Tevita me vaka na vosa i Kata, me vaka ka vakarota ko Jiova.

²⁰ A sa rai voli ko Arauna, ka raica na tui kei ira na nona tamata ni ra lako mai vua: a sa lako yani ko Arauna, ka cuva vakatoboicu ki na qele vua na tui.

²¹ A sa kaya ko Arauna, A cava e lako mai kina na noqu turaga na tui vei au na nomuni tamata? A sa kaya ko Tevita, Me'u volia vei iko na rara ni samu sila me'u cakava kina e dua nai cabocabo-ni-soro vei Jiova, me mudu na mate levu vei ira na tamata.

²² A sa kaya vei Tevita ko Arauna, Me taura ga na noqu turaga na tui, ka cabora na ka e vinaka vua: raica, na pulumokau mei soro kama, ia me kena buka mo ni taura nai yaya ni samu sila, kei nai yaya ni pulumokau.

²³ A ka kecega oqo sa solia vakaturaga ko Arauna vei koya na tui. Sa kaya talega vua na tui ko Arauna, Me vinakati kemuni ko Jiova na nomuni Kalou.

²⁴ A sa kaya vei Arauna ko koya na tui, E segai; ka'u na volia vakaidina vei iko e na kenai voli: ia ka'u na sega ni vakacabora vei Jiova na noqu Kalou nai soro kama sa rawa walega. A sa volia ko Tevita na rara ni samu sila, kei na pulumokau, e na sikeli siliva e limasagavulu.

²⁵ A sa cakava maikea ko Tevita nai cabocabo-ni-soro vei Jiova, ka vakacabora eso nai soro kama ka so nai soro ni veivinakati. A sa vakamasuti ko Jiova e na vuku ni vanua, a sa mudu na mate levu vei ira na Isireli.