2 Samuela 23 - Vakavakadewa Makawa

Sa tukuna ko Tevita ni na dua na lewa dodonu, 1-7. A yacadra na tamata turaga i Tevita, 8-39.

¹ Oqo na kenai otioti ni vosa i Tevita. Sa kaya ko Tevita na luve i Jese, Ia sa kaya na tamata sa vakatuburi cake, O koya ka lumuta na Kalou i Jekope, Kei koya na daunivucu vinaka sara ni Isireli,

² Sa vosa e na gusuqu na Yalo i Jiova, Sa tiko e na yamequ talega na nona vosa.

³ Sa kaya ko koya na nodra Kalou na Isireli, Sa kaya vei au na nodra Kaukauwa na Isireli, Ko koya ka lewai ira na tamata vakadodonu, Ka lewa tiko e na rerevaki koya na Kalou;

⁴ Ia me vaka na rarama e na mataka, ni sa cadra na mata-ni-siga, Na mataka sa sega kina na o; Ni sa tubu mai na qele na co, Ni sa cila vinaka na mata ni siga ni sa oti na uca.

⁵ Ia ni sa sega ni vakaoqo vua na Kalou na noqu mataqali, Sa cakava ga ko koya vei au na veiyalayalati tawa mudu, Sa vakarau tu e na ka kecega, ka vakadeitaki: Ia na ka kecega me'u bula kina, kei na ka kecega ka'u sa gadreva, Ena sega beka ni vakatubura ko koya?

⁶ Ia na tamata ca kecega, era na vaka na voto ni kau sa biu, Ni ra sa sega ni tauri rawa e na ligada:

⁷ Ia na tamata sa via tauri ira, E dodonu me vakaiyaragi e na kaukamea kei na dia ni moto; A ra na visa vakaidina e na bukawaqa e na tikina ko ya.

⁸ Oqo na yacadra na tamata qaqa i Tevita: O koya na Takimonaiti sa liu vei iratou na lewe tolu; o koya ko Atino na Esinaiti: sa veivala kei ira na lewe walu na drau, a sa mokuti ira ko koya e na dua na gauna.

⁹ A sa muri koya ko Eliesa na luve i Toto na luve i Eoi; sa dua vei iratou na lewe tolu na tamata qaqa eratou tiko vata kei Tevita, ni ratou sa bolei ira na kai Filisitia era sa soqoni vata maikea ki nai valu, a ra sa lako tani na Isireli:

¹⁰ a sa tu cake ko koya, ka mokumokuti ira na kai Filisitia, ka sa malumalumu mai na ligana, a sa kabita na nonai seleiwau na ligana: a sa ka levu na veivakabulai ka ia ko Jiova e na siga ko ya; a sa muri koya ko ira na tamata me ra kauta walega nai toki ni valu.

¹¹ A sa muri koya ko Sama na luve i Aki, o koya mai na ulu-ni-vanua. A ra sa soqoni vata na kai Filisitia me ra kovekove, e na dua na tiki ni were sa tei kecega e na pini: a ra sa dro tani mai vei ira na kai Filisitia ko ira na tamata.

¹² A sa tu ko koya e na loma ni were, ka valataka, ka mokuti ira na kai Filisitia: a sa kitaka na veivakabulai levu ko Jiova.

¹³ A ratou sa lako sobu ko iratou e lewe tolu vei ira na lewe tolusagavulu sa liu, a ratou sa lako vei Tevita ki na qara vatu mai Etulama, e na vula i matua: a sa tiko vakaivalu mai na buca ko Refeimi na nodra mataivalu na kai Filisitia.

¹⁴ A sa tiko ko Tevita e na koro ni drodro e na veisiga ko ya; a sa tiko mai Pecileema e na gauna ko ya na nodra i valu na kai Filisitia.

¹⁵ A sa mate e na viagunu ko Tevita, ka kaya, Ke sa dua mada me vagunuvi au e na wai mai na mata-ni-wai mai Pecileema, ka tu mai na matamata-ni-koro!

¹⁶ Ia ko iratou na lewe tolu ka tamata qaqa, eratou a basuka na nodra mataivalu na kai Filisitia, ka taki wai mai na matamata-ni-wai mai Pecileema, mai na matamata-ni-koro, a ratou sa kauta vei Tevita: ia sa bese ni gunuva ko koya, a sa livia yani me ka ga vei Jiova:

¹⁷ a sa kaya, I Jiova, me yawa vei au me'u kitaka na ka oqo: sa kedratou dra na tamata eratou a douvaka na mate, se segai? ka sa bese kina ni gunuva ko koya. A ka oqo eratou sa kitaka na tamata qaqa tolutolu oqori.

¹⁸ Ia ko Apisai na taci i Joapi, na luve i Seruaia, sa turaga vei iratou na lewe tolu. A sa taura na nona moto me veivala kei ira e le tolu na drau, ka vakamatei ira, a sa rogo vata ko koya kei iratou na lewe tolu ko ya.

¹⁹ Sa sega li ni dokai vakalevu cake vei iratou na lewe tolu? o koya oqo sa lesi kina me nodratou turaga, ia ka sa sega ni tautauvata kei iratou na lewe tolu oqori.

²⁰ Ia ko Pinaia na luve i Jioiata, a luvena e dua na tamata qaqa mai Kapisieli, ka cakava na ka levu eliu, io sa mokuta ko koya e le rua na tamata erau a vaka na laioni, erau kai Moapi: sa lako sobu talega ka mokuta e dua na laioni e na dua nai keli, e na gauna ni uca-vulavula:

²¹ sa mokuta talega e dua na kai Ijipita, a tamata matavinaka; a sa taura e dua na moto ko koya na kai Ijipita; a sa lako sobu vua ko koya ni sa taura ga nai titoko, ka sa kaliraka na moto mai na ligana na kai Ijipita, ka vakamatei koya e na nona moto ga.

²² A ka oqo sa cakava ko Pinaia na luve i Jioiata, a sa rogo vata ko koya kei iratou na lewe tolu na qaqa.

²³ Sa dokai vakalevu cake ko koya vei ira na lewe tolusagavulu, a sa sega ni tautauvata kei iratou na lewe tolu oqori. A sa lesi koya kina ko Tevita me dua vei ira era sa daubose vata kaya.

²⁴ Ko Asaeli na taci i Joapi sa dua vei ira na lewe tolusagavulu; ko Elanani na luve i Toto na kai Pecileema;

²⁵ ko Sama na kai Eroti, ko Elika na kai Eroti,

²⁶ ko Elesi na luve i Paliti, ko Ira na luve i Ikesi na kai Tikoa;

²⁷ ko Epieseri na kai Anacovi, ko Mipunei na luve i Usa;

²⁸ ko Salimoni na luve i Eoi, ko Meerei na kai Nitofa;

²⁹ ko Elepi na luve i Peana, e dua na kai Nitofa, ko Itei na luve i Ripei mai Kipea mai vei ira na Penijamini;

³⁰ ko Pinaia na kai Piraconi, ko Itei mai na uciwai mai Keasi;

³¹ ko Epialiponi na kai Arapa, ko Asimavece na kai Peurimi;

³² ko Elaiapa na kai Seelipimi, ko Jonacani, e dua vei ira na luve i Jaseni;

³³ ko Sama, o koya mai na ulu ni vanua, ko Eiami na luve i Sarari o koya mai na ulu ni vanua;

³⁴ ko Elifeleti na luve i Easipai, na luvena na kai Meeka, ko Iliami na luve i Eitofeli na kai Kilo;

³⁵ ko Esirei na kai Kameli, ko Peerei na kai Aripa;

³⁶ ko Ikiali na luve i Necani o koya mai Sopa, ko Pani na luve i Kata;

³⁷ ko Seleki na luve i Amoni, ko Neeri na kai Pieroci, o koya sa daucolata nai yaragi i Joapi na luve i Seruaia;

³⁸ ko Ira na luve i Jecesi, ko Karepi na luve i Jeceri;

³⁹ ko Uraia na Itaiti. O ira kecega, era le tolusagavulu ka vitu.