2 Samuela 22 - Vakavakadewa Makawa

A meke ni vakavinavinaka vua na Kalou, ni sa vakabulai Tevita ko koya mai na nona meca kecega.

¹ A sa cavuta vei Jiova ko Tevita na vosa ni sere oqo, e na siga sa vakabulai koya oti kina ko Jiova mai na liga ni nona meca kecega, kei na liga i Saula:

² a sa kaya ko koya, A noqu uluvatu ko Jiova, kei na noqu i drodro, na noqu i vakabula;

³ Na Kalou, o koya sa noqu kaukauwa; au na vakararavi vua; A noqu i sasabai, kei na ka kaukauwa ka'u sa vakabulai kina, a noqu vale ni valu cecere, kei na noqu i drodro; A noqu i vakabula; ni sa vakabulai au mai nai valavala kaukauwa.

⁴ Au na kaci vei Jiova, o koya sa dodonu me vakavinavinakataki; Ia ka'u na sa vakabulai kina maivei ira na noqu meca.

⁵ Ni sa vakavolivoliti au na biau ni mate, Sa vakarerei au na waluvu ni ca;

⁶ Sa voliti au na rarawa ni bulubulu; sa yacovi au nai cori ni mate;

⁷ E na noqu rarawa ka'u a tagi vei Jiova, Ka'u sa tagi ga vua na noqu Kalou; A sa rogoca na domoqu ko koya mai na nona vale; A sa curuma na daligana na noqu tagi.

⁸ Sa qai yavala na vanua, ka sautaninini; Sa yavala talega na vu ni lomalagi, Ka sa yavala, ni sa cudru ko koya.

⁹ Sa kuvu cake na kubou mai na ucuna, Kei na bukawaqa mai na gusuna sa kana voli: Sa tutuvaki kina na qilaiso ni buka.

¹⁰ Sa vakalolovirataka na lomalagi ko koya, ka lako sobu mai; A sa tu e ruku ni yavana na butobuto loaloa.

¹¹ Sa vodoka na jerupi ko koya, ka vuka: Sa rairai lako e na veitaba ni cagi.

¹² Sa cakava na butobuto me nona vale me voliti koya, Na wai butobuto, na o loaloa ni lomalagi.

¹³ Sa caudre na qilaiso ni buka E na liva sa lako e matana.

¹⁴ Sa kurukuru mai na lomalagi ko Jiova, A sa tabalaka cake na domona ko Koya sa Cecere sara.

¹⁵ A sa vanataka na gasau ko koya, ka dui vakasevi ira; Na livaliva, ka vakubutaki ira.

¹⁶ A sa rairai na dreke ni wai ni wasaliwa, Sa vakavotui mai na yavu ni vuravura, Ni sa vunauca ko Jiova, Ni sa liwa na cagi ni ucuna.

¹⁷ Sa talaki maicake ko koya, ka tauri au, Ka vueti au cake mai na wai e vuqa:

¹⁸ Sa vakabulai au mai na noqu meca kaukauwa, Maivei ira era sa cati au: ni ra sa gumatua vei au.

¹⁹ Era sa lako vakaca mai vei au e na siga ni noqu rarawa; Ia sa tokoni au ko Jiova.

²⁰ Sa kauti au yani talega ki na vanua rabailevu: Sa vakabulai au, ni sa vinakati au.

²¹ Sa sauma vei au ko Jiova na noqu yalododonu: Me vaka na savasava ni ligaqu, sa sauma vei au.

²² Ni'u a muria na sala i Jiova, Ka sega ni lesu tani vakaca mai vua na noqu Kalou.

²³ Ni sa tu e mataqu na nona lewa kecega: Ia na nona vunau, ka'u a sega ni lesu tani maikina.

²⁴ Ia ka'u a yalododonu vua, Ia ka'u a maroroi au mai na noqu i valavala ca;

²⁵ A sa sauma kina vei au ko Jiova na noqu i valavala dodonu; Me vaka na noqu yalosavasava e matana.

²⁶ Vei koya sa yalololoma, ko ni na cakacaka vakayalololoma; Vei koya sa yalododonu, ko ni na cakacaka vakayalododonu;

²⁷ Vei koya sa yalosavasava, ko ni na cakacaka vakayalosavasava; Ia vei koya sa yalotakelo, ko ni na veivala kaya.

²⁸ Ia ko ni na vakabulai ira na tamata sa vakararawataki: A sa vakaraici ira na viavialevu na matamuni, mo ni vakabalei ira.

²⁹ Ni sa noqu cina koi kemuni, Jiova: Ia ena vakararamataka na noqu butobuto ko Jiova.

³⁰ Ni sai kemuni ka'u sa cici bula kina e na maliwa ni mataivalu, Ia sai koya na noqu Kalou ka'u sa ladeva kina na bai.

³¹ Ko koya na Kalou, sa dodonu na nonai valavala; Sa vakatovolei na vosa i Jiova: Ai sasabai ko koya vei ira kecega era sa vakararavi vua.

³² Ko cei tale sa Kalou, ko Jiova duaduaga? Ia ko cei tale sa kaukauwa, na noda Kalou duaduaga?

³³ Sa noqu koro ni valu na Kalou; A sa vakadodonutaka na noqu i lakolako ko koya.

³⁴ Sa cakava na yavaqu me tautauvata kei na yavadra na me kila: A sa vakaturi au e na noqu tikina cecere.

³⁵ Sa vakavulica na ligaqu me ia nai valu, A sa musuki kina e na ligaqu na dakai kaukamea.

³⁶ O sa solia talega vei au nai sasabai ko sa vakabulai au kina: A sa vakalevutaki au na nomu yalomalua.

³⁷ O a vakalalagataka vei au na noqu sala; A sa sega ni tidara kina na yavaqu.

³⁸ Au a vakasavi ira na noqu meca, ka vakarusai ira; Ka'u a sega ni lesu tale mai, ka'u a vakaoti ira mada eliu.

³⁹ Ia ka'u a vakaoti ira, ka vuetaki ira, a ra sa sega ni tu cake tale rawa: Io, era sa bale sobu e ruku ni yavaqu.

⁴⁰ Ni kemuni a vauci au e na kaukauwa me ia nai valu, Ko ni a vakamalumalumutaki ira vei au era a tu cake vakaivalu vei au:

⁴¹ O ni a vakanadakuya talega vei au na noqu meca, Me'u vakarusai ira kina era sa cati au.

⁴² Era a rai voli, ka sega e dua me vakabula; Io, vei Jiova, ka sa sega ni vosa vei ira.

⁴³ Ka'u sa qai vurumemeataki ira me vaka na kuvu ni qele: Ka'u a buturaki ira me vaka na oruoru e na salatu, ka dui biubiuti ira,

⁴⁴ O ni a vakabulai au talega mai na nodra veileti na noqu tamata, O ni a maroroi au me'u liu e na veimatanitu: Era na qaravi au na tamata ka'u a sega ni kila.

⁴⁵ Ena vakarokorokotaki au ko ira na kai tani: Ni ra sa rogoci au, era na talairawarawa vei au.

⁴⁶ Era na malai yani na kai tani; A ra na lako ninini tu mai na nodra veitikina vuni.

⁴⁷ Sa bula ko Jiova; ia me vakacaucautaki na noqu kaukauwa; Ia me vakalevulevui na Kalou, o koya na kaukauwa ka'u sa bula kina.

⁴⁸ A Kalou ga ko koya sa cudruvaki au, Ka vakamalumalumutaki ira na tamata vei au,

⁴⁹ Ka kauti au tani maivei ira na noqu meca: O ni a laveti au me'u uasivi cake vei ira era tu cake vakaivalu vei au: Ko ni a vakabulai au mai na tamata dauravuravu.

⁵⁰ O koya oqo ka'u na vakamolimoli kina vei kemuni, Jiova, e na kedra maliwa na lewe ni veivanua, Ka seretaka na yacamuni.

⁵¹ O koya ga na vale cecere ni bula vei koya na nona tui Ka sa ia na loloma vua ka lumuta ko koya; Io vei Tevita, kei na nona kawa, ka sega ni mudu.