2 Samuela 20 - Vakavakadewa Makawa

Sa vukici ira na Isireli ko Sipa, ka bolei Tevita; a sa vakamatei mai Epeli ko koya, 1-22. A yacadratou na turaga, 23-26.

¹ A sa tiko maikea e dua na tamata ca, na yacana ko Sipa, na luve i Pikiri, e na mataqali i Penijamini: a sa uvuca ko koya e dua na davui, ka kaya, Sa sega na noda tikina kei Tevita, ka sega na nodai votavota vua na luve i Jese: oi kemudou na Isireli, ni lesu na tamata yadua ki na nona vale laca.

² A sa lako tani ko ira kecega na Isireli maivei Tevita, me ra muri Sipa na luve i Pikiri: ia ko ira na Juta era kabita na nodra tui, mai na Joritani ka yacovi Jerusalemi.

³ A sa lako ko Tevita ki na nona vale mai Jerusalemi; a sa kauta ko koya na tui na yalewa ka watina lalai eratou lewe tini, o iratou ka laiva ko koya me vakatawa na vale, ka kauti iratou ki na dua na vale me ratou vakaraici, ka sa vakani iratou, ka sega ni curu vei iratou: a ratou sa sogolati tiko, ka yacova na siga eratou sa mate kina, eratou sa tiko vakayada ga.

⁴ A sa kaya vei Amasa ko koya na tui, Mo soqoni ira vata vei au na Juta e na bogi tolu, ia mo mai tiko ki ke.

⁵ A sa lako ko Amasa me soqoni ira vata na Juta; a sa berabera ko koya ka sa oti na siga ka lokuca vua ko koya.

⁶ A sa kaya vei Apisai ko Tevita, Oqo, ena levu cake na ka ca ena kitaka vei keda ko Sipa na luve i Pikiri, ka lailai ka kitaka ko Apisalomi: mo kauti ira na tamata ni nomu turaga, ka cicimuri koya, de curuma eso na koro vakabai, ka sa yali kina vei keda.

⁷ A ra sa muri koya yani na tamata i Joapi, kei ira na Kireci, kei ira na Pileci, kei ira na tamata qaqa kecega: a ra sa lako tani e Jerusalemi me cicimuri Sipa na luve i Pikiri.

⁸ Ia ni ra sa voleka ki na vatu levu mai Kipioni, sa mai sota kei ira ko Amasa. Ia sa sulumaka ko Joapi na nonai sulu ni valu, ka sa tu e nai vau ni tolona e dua nai seleiwau e na kena taga; ia ni sa lako tu ko koya, sa lutu mai na kena taga.

⁹ A sa kaya vei Amasa ko Joapi, O sa bula vinaka, na wekaqu? A sa taura na kumi i Amasa ko Joapi e na ligana i matau me reguci koya.

¹⁰ A sa sega ni nanuma ko Amasa nai seleiwau e na liga i Joapi, a sa cokai koya kina e na ketena, ka sa kasabura na nona wawa ki na qele, ka sa sega ni vakaruataka vua: a sa mate ko koya. Ia erau sa cicimuri Sipa na luve i Pikiri ko Joapi kei Apisai na tacina.

¹¹ A sa tu vakadua maikea e dua na tamata i Joapi, ka kaya, O koya sa vinakati Joapi, kei koya sa totaki Tevita, me muri Joapi.

¹² A sa davo no e na nona dra ko Amasa e na salatu. Ia ni sa raica na tamata ko ya ni ra sa tu vakadua na tamata kecega, sa qai kauti Amasa tani mai na salatu ki na were, a sa ubia e na dua nai sulu, ni sa raica ko koya era sa tu vakadua ko ira kece ka mai donui koya.

¹³ Ni sa kau tani mai na salatu, era sa qai lako yani na tamata kecega me muri Joapi, me cicimuri Sipa na luve i Pikiri.

¹⁴ A sa lakovi ira yani ko koya na nodra mataqali kecega na Isireli, ka yaco ki Epeli, kei Peci-maka, kivei ira kece talega na Peri: a ra sa soqoni vata, ka la'ki muri koya.

¹⁵ A ra sa lako ka buku na druadrua vei koya mai Epeli ni Peci-maka: a ra sa viria ki na koro e dua na suva, a sa tu e na kele; ia ko ira na tamata kecega era tiko vata kei Joapi, era sa tukitukia na bai, me vakabalea.

¹⁶ Sa qai kaci mai na koro e dua na yalewa vuku, Dou rogoca! dou rogoca! dou kaya mada vei Joapi, Mo toro mada mai ki ke, me'u vosa vei iko.

¹⁷ A sa toro vua ko koya, a sa kaya na yalewa, O iko ko Joapi, se segai? A sa kaya ko koya, Oi au ga. A sa kaya vua ko koya, Mo rogoca na vosa ni nomu vada. A sa kaya ko koya, Au sa vakarorogo tiko.

¹⁸ A sa vosa ko koya, ka kaya, Era a daukaya eliu, Me ra tarogi Epeli ga, a ra sa qai dautinia vakaoqo.

¹⁹ Oi au e dua vei ira na Isireli sa cata nai valu, ka sa yalodina: ko iko, ko sa segata mo vakarusa e dua na koro ka dua na tinana vei ira na Isireli: a cava ko via tiloma kina nai votavota i Jiova?

²⁰ A sa vosa ko Joapi, ka kaya, Me yawa sara, me yawa sara vei au, me'u tiloma se vakarusa.

²¹ Sa sega ni vakaoqo: ia sa dua ga na tamata mai na ulu-ni-vanua i Ifireimi, ko Sipa na yacana, na luve i Pikiri, sa dodoka na ligana vua na tui, io vei Tevita: dou soli koya duaduaga mai, ka'u na qai lako tani mai na koro. A sa kaya vei Joapi na yalewa, Raica, ena viritaki vei iko na uluna ki daku ni bai.

²² A sa lako na yalewa e na nona vuku vei ira kecega na tamata, A ra sa tamusuka na ulu i Sipa na luve i Pikiri, ka viritaka yani vei Joapi. A sa uvuca na davui ko koya, a ra sa lesu yani mai na koro, na tamata yadua ki na nona vale laca. A sa lesu ki Jerusalemi ko Joapi vei koya na tui.

²³ A sa nodra turaga na tamata i valu kecega ni Isireli ko Joapi; a sa nodra turaga na Kireci kei ira na Pileci ko Pinaia, na luve i Jioiata:

²⁴ a sa turaga ni vakacavacava ko Etorami: a sa dauvola na ka ni matanitu ko Jiosafati na luve i Eailute:

²⁵ ia sa vunivola ko Siva: a rau sa bete ko Setoki kei Epaiaca:

²⁶ ia na turaga erau dautiko vei Tevita ko Ira na luve i Jairi.