2 Samuela 2 - Vakavakadewa Makawa

Sa lako ko Epironi ko Tevita, a sa buli me tui Juta, 1-4. Sa talaki ki Jepesi, 5-7. Sa buli me tui Isireli ko Isi-poseci, 8-11. Era sa vala na nona tamata ko Tevita kei na tamata i Isi-poseci, 12-32.

¹ Ia sa oti na ka oqo, sa qai tarogi Jiova ko Tevita, ka kaya, Me'u lako cake ki na dua na koro ni Juta, se me'u kakua? A sa kaya vua ko Jiova, Mo lako cake. A sa kaya ko Tevita, Me'u lako cake kivei? A sa kaya ko koya, Ki Epironi.

² A ratou sa lako cake kina ko Tevita, kei rau talega na watina, ko Eiinoami na yalewa ni Jesirieli, kei Apikali na yalewa ni Kameli na wati i Nepali.

³ A sa kauti ira cake na nona tamata era tiko vata kaya ko Tevita, na tamata yadua kei na nona lewe-ni-vale: a ra sa tiko e na veikoro ki Epironi.

⁴ A ra sa lako mai na Juta, a ra sa lumuti Tevita maikea me nodra tui na Juta. A ra sa tukuna vei Tevita, ka vaka, Ko ira na kai Jepesi-kiliati era sa buluti Saula.

⁵ A sa talaki ko Tevita vei ira na kai Jepesi-kiliati, ka kaya vei ira, Me vakalougatataki kemudou ko Jiova, ni dou a cakava na ka vinaka oqo vua na nomudou turaga, io, vei Saula, ni dou a buluti koya.

⁶ Ia me qai cakava na ka vinaka vei kemudou ko Jiova, kei na ka dina: ia koi au talega, ka'u na sauma vei kemudou na ka vinaka oqo, ni dou a cakava na ka oqo.

⁷ Ia oqo, me kaukauwa na ligamudou, ka mo dou qaqa: ni sa mate tu ko Saula na nomudou turaga, a ra sa lumuti au me'u nodra tui na Juta.

⁸ Ia ko Apineri na luve i Neri, na kapiteni ni valu i Saula, sa kauti Isi-poseci na luve i Saula, ka kauti koya mai ki Meeneimi;

⁹ ka buli koya me nodra tui na Kiliati, kei na Asuri, kei na kai Jesirieli, kei na Ifireimi, kei na Penijamini, kei ira kecega na Isireli.

¹⁰ (Sa vasagavulu na nona yabaki ko Isi-poseci na luve i Saula ni sa buli me nodra tui na Isireli, a sa tui tiko ka yabaki rua). Ia na Juta ga era sa muri Tevita.

¹¹ Ia na kena dede sa tui kina mai Epironi ko Tevita vei ira na Juta, sa vitu na yabaki ka ono na vula.

¹² A sa lako tani mai Meeneimi ki Kipioni ko Apineri na luve i Neri, kei ira na tamata i Isi-poseci na luve i Saula.

¹³ A sa lako yani ko Joapi na luve i Seruaia kei ira na tamata i Tevita, a ra sa la'ki veitavaki kei ira mai na mata-ni-wai ki Kipioni, a ra sa tiko ko ira oqo e na yasa ni mata-ni-wai oqo, kei ira oqori e na yasa ni mata-ni-wai ko ya.

¹⁴ A sa kaya vei Joapi ko Apineri, Me ra ia mada na cauravou, ka qito e matada. A sa kaya ko Joapi, Me ra ia ga.

¹⁵ A ratou sa ia, ka lako e lewe tinikarua na kedrai wiliwili vei ira na Penijamini, era sa nei Isi-poseci na luve i Saula, kei na lewe tinikarua talega na tamata i Tevita.

¹⁶ A ra sa dui taura yadua na uluna na nonai sa, ka cokavaka na nonai seleiwau ki na sarisarina; a ra sa bale sobu vata: a sa vakatokai kina na tikina ko ya Na yasa ni veiseleiwau, ko ya mai Kipioni.

¹⁷ A sa rui katakata nai valu, e na siga ko ya; a sa gu ca ko Apineri, kei ira na Isireli, ka gumatua ko ira na nona tamata ko Tevita.

¹⁸ A ratou sa tiko maikea na luve i Seruaia tolutolu, ko Joapi, kei Apisai, kei Asaeli: ia sa yava totolo ko Asaeli me vaka e dua na me ni veikau.

¹⁹ A sa cicimuri Apineri ko Asaeli; ia ni sa lako tu sa sega ni gole tani ki nai matau se ki nai mawi ni sa muri Apineri.

²⁰ A sa rai ki muri ko Apineri, ka kaya, O iko ko Asaeli, se segai? A sa kaya ko koya, Koi au.

²¹ A sa kaya vua ko Apineri, Mo lako tani ki na ligamu i matau se ki na ligamu i mawi, ka taura e dua vei ira na cauravou, ka kauta vei iko na nonai yaragi. A sa bese ni gole tani mai vua ko Asaeli.

²² A sa kaya tale vei Asaeli ko Apineri, Mo lako tani mo kakua ni muri au: a cava me'u mokuti iko kina ki na qele? au na qai ta cake vakaevei vua na tuakamu ko Joapi?

²³ A sa bese ga ni gole tani ko koya: a sa cokai koya e ketena ko Apineri e na dule ni moto, a sa basika sara ki muri na moto: a sa bale sobu maikea, ka mate kina: ia sa tu vakadua ko ira kecega era yaco ki na tikina sa bale mate kina ko Asaeli.

²⁴ A sa muri Apineri ko Joapi kei Apisai: a sa dromu na mata-ni-siga ni ra sa yacova na vanua-cecere mai Ama, ko ya sa donui Kia, e na sala e na veikau ki Kipioni.

²⁵ A ra sa soqoni vata na luve i Penijamini ka muri Apineri, a ra sa yaco me dua ga na matai valu, ka ra sa tu e dela ni dua na vanua-cecere.

²⁶ A sa kaci vei Joapi ko Apineri, ka kaya, Me kana tiko li nai seleiwau, ka tawa mudu? o sa sega beka ni kila ni na ka gaga na kenai vakataotioti? a cava na kena dede, mo sega ni kaya kina vei ira na tamata me ra lesu yani, me ra kakua ni muri ira tiko na wekadra?

²⁷ A sa kaya ko Joapi, Me vaka sa bula na Kalou, kevaka ko a sega ni vosa, era sa lesu tale vakaidina e na mataka ko ira na tamata, me ra kakua ni muria na wekana ko ira yadua.

²⁸ A sa uvuca na davui ko Joapi, a ra sa tu vakadua na tamata kecega, ka sega ni muri ira tiko na Isireli, ka sega tale ni kitaka nai valu.

²⁹ A sa lako yani e na buca ko Apineri kei ira na nona tamata e na bogi ko ya ka siga, ka qalo-kosova na Joritani, ka lako yani e lomai Picironi taucoko, ka basika yani ki Meeneimi.

³⁰ A sa lesu mai ko Joapi me kakua ni muri Apineri: ia ni sa vakasoqoni ira vata kecega na tamata ko koya, sa yali vei ira e le tinikaciwa na tamata i Tevita, kei Asaeli.

³¹ Ia ko ira na tamata i Tevita era sa mokuta mate vei ira na Penijamini, kei ira na tamata i Apineri, e le tolu na drau ka onosagavulu.

³² A ra sa kauti Asaeli, ka buluti koya e nai bulubulu i tamana, mai Pecileema. A sa lako tu ko Joapi kei ira na nona tamata e na bogi ko ya, a sa kida na mataka vei ira mai Epironi.