2 Samuela 19 - Vakavakadewa Makawa

Sa tarova ko Joapi na tagiyaso i Tevita, 1-8. Sa kau tale ki Jerusalemi ko Tevita na tui, 9-43.

¹ A sa tukuni vei Joapi, Raica, sa tagicaki Apisalomi ka yasovaka tiko ko koya na tui.

² Ia sa yaco na veivakabulai e na siga ko ya me ka era tagi kina ko ira kecega na tamata: ni ra sa rogoca ko ira na tamata e na siga ko ya, ka vaka, Sa rarawa na tui e na vuku ni luvena.

³ A ra sa lako lo ki na koro e na siga ko ya ko ira na tamata, me vaka na nodra lako lo na tamata era sa madua ni ra dro e nai valu.

⁴ A sa puloutaka na matana na tui, ka qoqolou vakadomolevu na tui, Ulei, Apisalomi na luvequ! ulei, Apisalomi! ulei, na luvequ, na luvequ!

⁵ A sa lako mai ki vale vei koya na tui ko Joapi, ka kaya, O ni sa vakamaduataka edaidai na matadra kecega na nomuni tamata, o ira ka vakabulai kemuni, kei iratou na luvemuni tagane, kei iratou na luvemuni yalewa, kei iratou na watimuni, kei iratou na watimuni lalai:

⁶ ni kemuni sa lomani ira era sa cati kemuni, ka cati ira era sa lomani kemuni: ni kemuni sa tukuna edaidai, ni sa ka walega vei kemuni ko ira na turaga kei ira na tamata: ni'u sa qai kila edaidai ke sa bula ko Apisalomi, ka mate edaidai koi keimami kecega, ke sa vinaka vei kemuni:

⁷ ia oqo, mo ni tu cake, mo ni curu yani, ka vosa vakayalovinaka vei ira na nomuni tamata: ni'u sa bubului vei Jiova, kevaka ko ni sa sega ni curu yani, ena sega ni tiko kei kemuni e dua na tamata e na bogi edaidai: ia ena ca vakalevu vei kemuni na ka oqo, ka vakalailai na ka ca kecega sa yacovi kemuni ni kemuni a cauravou, ka yacova na gauna oqo.

⁸ A sa tu cake na tui, ka la'ki tiko mai na matamata-ni-koro. A sa tukuni vei ira kecega na tamata, ka vaka, Raica, sa tiko na tui mai na matamata-ni-koro. A ra sa lako kece mai na tamata kivei koya na tui. Ia era a dro ko ira na Isireli, na tamata yadua ki na nona vale laca.

⁹ A ra sa veileti na tamata kecega e na veimataqali kecega ni Isireli, ka kaya, Sa vakabulai keda na tui mai na ligadra na noda meca kecega, ka vakabulai keda mai na ligadra na kai Filisitia; ia sa qai dro mai na vanua e na vuku i Apisalomi.

¹⁰ Ia ko Apisalomi, o koya eda a lumuta me noda tui, sa mate e nai valu: ia oqo, a cava dou sa sega kina ni kaya me sa kau tale mai na tui?

¹¹ Sa qai talaki ko Tevita na tui kivei rau na bete, ko Setoki kei Epaiaca, ka kaya, Drau kaya mada vei ira na qase ni Juta, A cava dou sa berabera sara kina ni kauta tale mai na tui ki na nona vale? ni sa rogo mai vua na tui, io ki nona vale, na nodra vosa kecega na Isireli:

¹² oi kemudou na wekaqu; na suiqu kei na lewequ koi kemudou: ia ka cava dou sa berabera sara kina ni kauta tale mai na tui?

¹³ Ia drau kaya vei Amasa, Ko sa sega li ni suiqu kei na lewequ, ko iko? me cakacaka vakaoqo vei au ko Jiova, ka vakaikuritaka, kevaka ko sa sega ni mai kapiteni ni valu tikoga e mataqu, mei sosomi kei Joapi.

¹⁴ A sa vagolea ko koya na lomadra kecega na tamata i Juta, me vaka era sa dua bauga na tamata; a ra sa talaki kina vua na tui, ka vaka, Mo ni lesu mai koi kemuni, kei ira kecega na nomuni tamata.

¹⁵ A sa lesu na tui, ka yaco ki na Joritani. A ra sa lako ki Kilikali ko ira na Juta, me ra tavaki koya na tui, ka me ra kauti koya na tui ki tai kadua ni Joritani.

¹⁶ Ia sa vakariri ko Semeai na luve i Kira, na Penijamini, o koya mai Peurimi, ka lako sobu kei ira na Juta, me tavaki Tevita na tui.

¹⁷ A ra sa tiko vata kaya e le dua na udolu na tamata vei ira na Penijamini, kei Sipa talega e dua na tamata vei ira na lewe-ni-vale i Saula, kei ira na luvena tagane e le tinikalima, kei na nona tamata e le ruasagavulu era sa lako vata kaya; a ra sa liutaka na tui ki tai kadua ni Joritani.

¹⁸ A sa kau yani ki tai kadua nai lelele me vakaleleci kina na nona lewe-ni-vale na tui, me kitaka talega na ka sa vinaka vua. Ia sa cuva sobu ko Semeai na luve i Kira e na mata ni tui, ni sa yaco ko koya ki tai kadua ni Joritani;

¹⁹ a sa kaya vua na tui, Mo ni kakua ni nanuma vei au nai valavala ca na noqu turaga, ia mo ni kakua ni nanuma, me rarawa kina na lomamuni na tui, na ka ka'u sa cakava vakayaloca koi au na nomuni tamata e na siga ko ni a lako tani kina mai Jerusalemi na noqu turaga na tui.

²⁰ Au sa kila koi au na nomuni tamata ni'u a kitaka na ka ca: o koya oqo, au sa liu kina edaidai vei ira kecega na mataqali i Josefa ka lako sobu mai me tavaki kemuni na noqu turaga na tui.

²¹ A sa vosa mai ko Apisai na luve i Seruaia, ka kaya, Me sega li ni vakamatei ko Semeai e na vuku ni ka oqo, ni sa rukaki koya ka lumuta ko Jiova?

²² A sa kaya ko Tevita, A cava li vei kedatou, oi kemudrau na luve i Seruaia, ni drau sa noqu meca edaidai? me dua li na tamata vei ira na Isireli me vakamatei edaidai? au sa sega beka ni kila ni'u sa nodra tui na Isireli edaidai?

²³ Sa kaya talega na tui vei Semeai, O na sega ni mate. A sa bubului kina vua ko koya na tui.

²⁴ A sa lako sobu ko Mefiposece na luve i Saula me tavaki koya na tui, a sa sega ni vuya oti na yavana, se kotiva na kumina, se sava na nonai sulu, mai na siga ka lako tani kina na tui, ka yacova na siga ka tale vakacegu mai kina.

²⁵ Ia ni sa lako mai ki Jerusalemi me tavaki koya na tui, sa kaya vua ko koya na tui, A cava ko a sega ni lako vata kina kei au, Mefiposece?

²⁶ A sa kaya ko koya, Noqu turaga na tui, sa cakacaka vakailasu vei au na noqu tamata; ni'u sa kaya koi au na nomuni tamata, Au na vauca nai vodovodo ki na asa, me'u vodo kina, ka lako vata kaya na tui; ni'u sa lokiloki koi au na nomuni tamata.

²⁷ A sa la'ki beitaka vakailasu na nomuni tamata ko koya vei kemuni na noqu turaga na tui; ia sa vaka e dua na agilose ni Kalou na noqu turaga na tui: ia mo ni cakava na ka e vinaka vei kemuni.

²⁸ Ni ra sa vaka na tamata mate e matana na noqu turaga na tui ko ira kece na mataqali ni tamaqu: ia ko ni a lesia na nomuni tamata me'u tiko vata kei ira era kana mai na nomuni tepeli. Ia sa dodonu vakacava me'u tagi tale vua na tui?

²⁹ A sa kaya vua ko koya na tui, A cava ko sa vosa tiko kina e na vuku ni nomu ka? au sa kaya oti, Drau wasea na vanua kei Sipa.

³⁰ A sa kaya vua na tui ko Mefiposece Me taura kecega ko koya, ni sa qai lako vakacegu tale mai ki na nona vale na noqu turaga na tui.

³¹ A sa lako sobu mai Rokilimi ko Pasiliai na kai Kiliati, ka lako vata kaya na tui ki tai kadua ni Joritani, ka me kauti koya ki tai kadua ni Joritani.

³² Ia sa tamata qase sara ko Pasiliai, e walusagavulu na nona yabaki: a sa vakania na tui ni sa tiko mai Meeneimi; ni sa tamata vutuniyau sara ko koya.

³³ A sa kaya na tui vei Pasiliai, Daru lako vata yani, ka'u na vakani iko ni daru sa tiko mai Jerusalemi.

³⁴ A sa kaya vua na tui ko Pasiliai, Ena bogi vica tale na noqu bula, me'u lako cake kina kei na tui ki Jerusalemi?

³⁵ Sa walusagavulu na noqu yabaki e na siga oqo: au sa kila rawa beka na ka vinaka kei na ka ca? sa kila rawa beka na nomuni tamata na kenai kanakana ni ka ka'u sa kania se na ka ka'u sa gunuva? au sa rogoca rawa tiko li na domodra na tagane dausere kei na yalewa dausere? ia ka cava me'u vakaocataki kemuni kina noqu turaga na tui koi au na nomuni tamata?

³⁶ Ena lako vakalailai ga na nomuni tamata kei na tui ki tai kadua ni Joritani: ia me sauma e na cava vei au na tui e na ka levu vakaoqo?

³⁷ Me'u lesu mada na nomuni tamata, me'u mate e na noqu koro, ka voleka ki nai bulubulu i tamaqu kei tinaqu: ia, raica na nomuni tamata ko Kimami; me lako vata yani ko koya kei na noqu turaga na tui; ia mo ni cakava vua na ka e vinaka vei kemuni.

³⁸ A sa kaya na tui, Ena lako vata kei au ko Kimami, ia ka'u na cakava talega vua na ka e vinaka vei iko: ia na ka kece talega ko na kerea vei au, ka'u na kitaka vei iko.

³⁹ A ra sa lako kece yani na tamata ki tai kadua ni Joritani. Ia ni sa yaco ki tai kadua na tui, sa reguci Pasiliai ko koya na tui, ka vosavakalougatataki koya; a sa lesu tale ko koya ki na nona vanua.

⁴⁰ A sa lako yani ki Kilikali na tui, a sa lako vata kaya ko Kimami: a ra sa kauta na tui ko ira kecega na Juta, ka dua na kenai wasewase vei ira na Isireli ni sa wase rua.

⁴¹ Ka raica, era lako mai vua na tui ko ira kecega na Isireli, a ra sa kaya vua na tui, A cava era sa butakoci kemuni kina ko ira na weka i keimami, na Juta, a ra sa kauti kemuni na tui kei ira na nomuni lewe-ni-vale, kei ira vata kecega na nomuni tamata, ki tai kadua ni Joritani?

⁴² A sa kaya vei ira na Isireli ko ira kecega na Juta, Ni sa weka i keimami dina na tui: ia ka cava kemuni sa cudru kina e na vuku ni ka oqo? keimami sa kana li vakalailai vua na tui? se sa solia beka vei keimami ko koya e dua nai solisoli?

⁴³ A ra sa vosa na Isireli vei ira na Juta, ka kaya, Sa neimami e tini nai votavota e na tui, a sa neimami vakalevu ko Tevita, ka sa nomuni vakalailai ga: ka cava kemuni sa beci keimami kina, ni keimami sa sega ni tarogi mada eliu e na vuku ni nona kau tale mai na neimami tui? A sa kaukauwa na nodra vosa na Juta, ka malumalumu na nodra vosa na Isireli.