2 Samuela 18 - Vakavakadewa Makawa

Ko Apisalomi kei ira na Isireli era sa vala kei Tevita kei ira na nona tamata; sa tacori e na kau ko Apisalomi, ka qai moku; a sa tagicaki koya ko Tevita.

¹ A sa wilika na tamata era tiko vata kaya ko Tevita, ka lesia eso me nodra turaga na veiyayaudolu, ka so na nodra turaga na veiyayadrau.

² A sa talai ira na tamata ko Tevita, e dua na kena wase me lewai ira ko Joapi, kei na kenai karua ni kena wase me lewai ira ko Apisai na luve i Seruaia, na taci i Joapi, kei na kenai katolu ni kena wase me lewai ira ko Itei na kai Kaca. A sa kaya vei ira na tamata ko koya na tui, E dina au na lako vata talega kei kemuni.

³ A ra sa kaya na tamata, Mo ni kakua ni lako yani; ni na ka walega vei ira kevaka keimami sa dro; ena ka wale talega vei ira kevaka sa mate e dua na kena wase vei keimami ni keimami wase rua; ia koi kemuni, ko ni sa tautauvata kei na le tini na udolu vei keimami; ia sa vinaka cake mo ni vukei keimami mai na koro.

⁴ A sa kaya vei ira na tui, A ka ga e vinaka vei kemuni, ka'u na cakava. A sa tu voleka ki na matamata-ni-koro na tui, a ra sa curu yani vakayayadrau ka vakayayaudolu ko ira na tamata kecega.

⁵ A sa vakaroti Joapi kei Apisai kei Itei ko koya na tui, ka kaya, Mo ni lewa vakamalua vua na cauravou io vei Apisalomi e na vukuqu. A ra sa rogoca ko ira na tamata kecega, ni sa vakaroti iratou kecega na kapiteni ni valu ko koya na tui e na vuku i Apisalomi.

⁶ A ra sa curu yani na tamata ki vanua me ra vala kei ira na Isireli: a sa ia nai valu mai na veikau mai Ifireimi;

⁷ a ra sa moku maikea ko ira na Isireli ni ra mokuta ko ira na tamata i Tevita, a sa dua kina na moku levu e na siga ko ya, io sa le rua na oba:

⁸ ni sa veiseyaki nai valu e na vanua taucoko ko ya; a ra sa lewe vuqa sa mate e na veikau e na siga ko ya, a ra sa lewe lailai sa mate e nai seleiwau.

⁹ A sa sota kei ira na tamata i Tevita ko Apisalomi. A sa vodo lako ko Apisalomi e na meule, a sa lako na meule e na ruku ni dua na vu ni oki levu ka sa levu na tabana, a sa tao na drau ni uluna e na taba ni oki, a sa lili toka ko koya e na macawa ni lomalagi kei vuravura; a sa lako ga na meule ka vodo kina ko koya.

¹⁰ A sa raica e dua na tamata, ka tukuna vei Joapi, ka kaya, Raica, ka'u a kunei Apisalomi ni sa lili toka e na dua na vu ni oki.

¹¹ A sa kaya ko Joapi vua na tamata ka tukuna vua, Oi, ko a kunea, ka cava ko a sega kina ni mokuti koya maikea ki na qele? ka'u a qai solia vei iko e tini na siliva, ka dua nai vau ni tolo.

¹² A sa kaya vei Joapi na tamata, Kevaka ka'u sa rawata e na ligaqu e dua na udolu na siliva, au na sega ni dodoka na ligaqu vua na luvena na tui; ni sa vakaroti iko, kei Apisai, kei Itei, ko koya na tui, ni keimami a rogoca tiko, a sa kaya, Dou dui maroroya vinaka na cauravou ko Apisalomi.

¹³ Ia, kevaka ka'u a cakava na ka ca ka vakamatei koya: (a sa sega e dua na ka me vuni vua na tui:) ia ko iko ko na qai sega talega ni totaki au.

¹⁴ A sa kaya ko Joapi, Me'u kakua ni wawa tiko vakaoqo kei iko. A sa kauta e ligana ko koya e tolu na moto leleka, ka cokataka ki na uto i Apisalomi, ni sa bula tiko e na loma ni oki.

¹⁵ A sa le tini na cauravou eratou colata nai yaragi i Joapi, eratou sa vakavolivoliti Apisalomi, ka mokuta, ka vakamatea.

¹⁶ A sa uvuca na davui ko Joapi, a ra sa lesu tale mai na tamata me ra kakua ni muri ira na Isireli; ni sa tarovi ira na tamata ko Joapi.

¹⁷ A ra sa kauti Apisalomi, ka biuti koya ki loma ni dua nai keli levu e na veikau ko ya, a ra sa binia kina e dua nai binibini vatu levu sara: a ra sa dui dro ko ira kecega na Isireli, ki na nona vale laca.

¹⁸ Ia ni sa bula tiko ko Apisalomi, sa vakaduria cake vua e dua na duru, mai na buca ni tui: ni sa kaya ko koya, Sa sega na luvequ tagane me nanumi kina na yacaqu: a sa vakatoka na duru e na yacana: a sa vakatokai, Nai vakananumi kei Apisalomi, ka yacova na siga oqo.

¹⁹ A sa kaya ko Eiimaasi na luve i Setoki, Me'u cici mada ka tukuna vua na tui ni sa cudruvaki koya ko Jiova vei ira na nona meca.

²⁰ A sa kaya vua ko Joapi, Mo kakua ni la'ki tukutuku edaidai, ia ko na la'ki tukutuku e na dua tani na siga: ia mo kakua ni la'ki tukutuku edaidai, ni sa mate tu na luvena na tui.

²¹ A sa kaya vei Kusi ko Joapi, Mo la'ki tukuna vua na tui na ka ko a raica. A sa cuva sobu vei Joapi ko Kusi, a sa cici yani.

²² A sa kaya tale vei Joapi ko Eiimaasi na luve i Setoki, veitalia ga, ia me'u cici muri Kusi mada talega, koi au, A sa kaya ko Joapi, A cava ko na cici kina, na luvequ? ni sa sega vei iko nai tukutuku e yaga.

²³ Ia sa kaya ko koya, veitalia ga, me'u cici mada. A sa kaya vua ko koya, Mo cici ga. A sa cici ko Eiimaasi vaka ki na buca, a sa sivi Kusi.

²⁴ A sa tiko ko Tevita e na macawa ni matamata-ni-koro ruarua: a sa cabe cake nai vakatawa ki na bai, ki dela ni matamata-ni-koro, a sa ta cake, ka rai yani, ka raica e dua na tamata sa cici duaduaga mai.

²⁵ A sa kaci nai vakatawa, ka tukuna vua na tui. A sa kaya na tui, Kevaka sa lako duaduaga mai ko koya, sa na dua nai tukutuku vua. A sa lako vakatotolo ko koya, ka toro voleka.

²⁶ A sa kunea nai vakatawa ni sa cici mai e dua tani tale na tamata: a sa kaci nai vakatawa vei koya nai vakatawa sa qarava na matamata-ni-koro, ka kaya, Raica, e dua tale na tamata sa cici duaduaga. A sa kaya na tui, Sa kauta talega mai nai tukutuku ko koya.

²⁷ A sa kaya ko koya nai vakatawa, Au sa raica na nona cici sa liu mai ni sa vaka na cici i Eiimaasi na luve i Setoki. A sa kaya na tui, A tamata vinaka ko koya, a sa kauta mai nai tukutuku vinaka.

²⁸ A sa kaci ko Eiimaasi, ka kaya vua na tui, Sa vinaka tu. A sa cuva vakatoboicu ki na qele e na mata ni tui, ka kaya, Me vakarokorokotaki ko Jiova na nomuni Kalou, o koya ka soli ira mai na tamata era a dodoka na ligadra vei kemuni na noqu turaga na tui.

²⁹ A sa taroga na tui, Sa vinaka tiko na cauravou ko Apisalomi, se segai? A sa kaya ko Eiimaasi, Ni sa tala ko Joapi na nona tamata na tui, kei au na nomuni tamata, au a raica e dua na ue levu, ia ka'u a sega ni kila na kenai balebale.

³⁰ A sa kaya na tui, Mo vakatikitiki mada, ka mo tu ki ke. A sa lako vakatikitiki ko koya, ka tu vakadua.

³¹ Ka raica, sa lako mai ko Kusi; a sa kaya ko Kusi, Sa dua nai tukutuku na noqu turaga na tui; sa cudruvaki kemuni edaidai ko Jiova vei ira kecega era a tu cake me ra vala kei kemuni.

³² A sa taroga vei Kusi na tui, Sa vinaka tiko na cauravou ko Apisalomi, se segai? A sa kaya ko Kusi, Me ra tautauvata ga kei na cauravou ko ya ko ira na nomuni meca na noqu turaga na tui, kei ira kecega era tu cake me vakacacani kemuni.

³³ A sa rarawa vakalevu sara na tui, a sa cabe cake ki na vale ki dela ni matamata-ni-koro, ka tagi; a sa kaya vakaoqo ni sa lako tu, Isa lei, na luvequ Apisalomi, Isa, na luvequ, na luvequ Apisalomi! ke'u a mate me kemui sosomi ke sa vinaka, Isa Apisalomi, na luvequ, na luvequ!