2 Samuela 16 - Vakavakadewa Makawa

Sa solia vei Sipa ko Tevita na ka ka nei Mefiposece, 1-4. Sa rukaki Tevita ko Semeai, 5-14. Sa la'ki tiko kei Apisalomi ko Usai, 15-19. Ai vakavuvuli i Eitofeli vei Apisalomi, 20-23.

¹ Ia ni sa sivia vakalailai na ulu-ni-vanua ko Tevita, raica, sa mai tavaki koya ko Sipa na tamata i Mefiposece a sa rua na asa sa vakaivodovodo, a rau sa kauta e rua na drau nai buli madrai, ka dua na drau nai soso vua ni vaini, ka dua na drau na vua ni kau e laukana e na vula i katakata, ka dua na tavaya waini.

² A sa kaya vei Sipa na tui, A cava ko sa kauta maikina na ka oqo? A sa kaya ko Sipa, Oi rau na asa, me vodo kina na nona lewe-ni-vale na tui; kei na madrai, kei na vua ni kau e laukana e na vula i katakata, me ra kania na cauravou; kei na waini, me gunu kina ko koya sa malumalumu mai veikau.

³ A sa kaya na tui, Evei na luvena na nomu turaga? A sa kaya vua na tui ko Sipa, Raica, sa tiko mai Jerusalemi, ni sa kaya, Ena vakasuka mai vei au edaidai na matanitu i tamaqu ko ira na mataqali i Isireli.

⁴ A sa kaya vei Sipa na tui, Raica, sa nomu na ka kecega ka nei Mefiposece. A sa kaya ko Sipa, Au sa vakarokoroko; me'u kune loloma e matamuni, noqu turaga na tui.

⁵ Ia ni sa yaco ki Peurimi ko Tevita na tui, raica, sa curu yani maikina e dua na tamata ni dua na vuvale e na mataqali i Saula, na yacana ko Semeai, na luve i Kira: sa curu yani ka ruru lako ga:

⁶ a sa vakaviriki Tevita e na vatu, kei ira kecega na tamata i Tevita na tui: a ra sa tiko kecega na tamata kei ira kece na tamata qaqa e na ligana i matau kei na ligana i mawi.

⁷ A sa vakarukaka tiko ko Semeai ka kaya, Mo lako tani, mo lako tani, o iko na tamata dauveivakamatei, na tamata ni vu-ni-ca.

⁸ Sa sauma vei iko ko Jiova na dra kecega ni mataqali i Saula, o koya ko sa kenai sosomi; a sa solia ko Jiova na matanitu ki na liga i Apisalomi na luvemu: ka raica, ko sa vauci e na nomu ca, ni ko sa tamata dauveivakamatei ko iko.

⁹ A sa kaya vua na tui ko Apisai na luve i Seruaia, A cava me rukaka kina na noqu turaga na tui na koli mate oqo? me'u lako mada, ka taya cavuka na uluna.

¹⁰ A sa kaya na tui, A cava vei kedatou, oi kemudrau na luve i Seruaia? me ruru ga vakaoqo ko koya, ni sa kaya vua ko Jiova, Mo rukaki Tevita: ko cei me na kaya, A cava ko sa cakava kina na ka oqo?

¹¹ Sa kaya talega ko Tevita vei Apisai kei ira kecega na nona tamata, Raica, na luvequ, o koya ka lako mai na yagoqu, sa qarai au me'u mate: sa dodonu vakalevu cake vei koya na Penijamini oqo: dou laivi koya ga, me ruru tiko; ni sa kaya vua ko Jiova:

¹² Ena raica beka na noqu rarawa ko Jiova, ka caka vinaka vei au ko Jiova, e na vuku ni nona ruru edaidai oqo.

¹³ A sa lako tiko e na sala ko Tevita kei ira na nona tamata, a sa lako tu me donui koya tiko ko Semeai e na yasa ni ulu-ni-vanua, a sa ruru lako ga, ka vakavirika e na vatu, ka kaburaka na kuvu-ni-qele.

¹⁴ A sa yaco yani na tui, kei ira kecega na tamata, era lako vata kaya, ka ra ceguoca; a ra sa vakacegu maikea.

¹⁵ A sa lako ki Jerusalemi ko Apisalomi, kei ira kecega na Isireli, a sa lako vata kaya ko Eitofeli.

¹⁶ Ia ni sa lako mai vei Apisalomi ko Usai na Ariki, a nonai tau ko Tevita, sa kaya vei Apisalomi ko Usai, Me bula na tui, me bula na tui.

¹⁷ A sa kaya vei Usai ko Apisalomi, Oqo na nomu loloma vua na nomu i tau, oi? a cava ko a sega kina ni lako kei na nomu i tau?

¹⁸ A sa kaya vei Apisalomi ko Usai, E segai: o koya sa digitaka ko Jiova, kei ira na tamata oqo, kei ira kecega na Isireli, au na totaka koi au, ka'u na tiko talega kaya.

¹⁹ Ia ko cei tale me'u qarava? sa sega li ni koya na luvena? me vaka ka'u a qaravi koya na tamamuni, ka'u na vaka talega kina vei kemuni.

²⁰ A sa kaya vei Eitofeli ko Apisalomi, Mo tukuna mada, se cava me da kitaka.

²¹ A sa kaya vei Apisalomi ko Eitofeli, Mo curu mada vei iratou na watina lalai na tamamuni, o iratou ka laiva ko koya me vakatawa na vale, a ra na rogoca kecega na Isireli ni ko sa velavela vei tamamuni; ena qai vakaukauwataki na ligadra kecega era tiko vata kei kemuni.

²² A sa biriki vei Apisalomi e dua na vale laca e dela ni vale dina; a sa curu ko Apisalomi vei iratou na watina lalai na tamana, e matadra kecega na Isireli.

²³ Ia nai vakavuvuli ca i Eitofeli, ka dauvakatavuvulitaka e na veisiga ko ya, sa dauvaka ni sa dua sa taroga na vosa ni Kalou; sa vakaoqo na ka kecega sa vakatavulica ko Eitofeli vei Tevita, kei Apisalomi talega.