2 Samuela 15 - Vakavakadewa Makawa

Sai valavala vaqaseqase ko Apisalomi, ka rawa na yalodra na Isireli, 1-12. A sa dro yani mai Jerusalemi ko Tevita, ka veilakoyaki voli, 13-37.

¹ Sa oti na ka oqo, sa qai vakarautaka vua ko Apisalomi eso na qiqi-ni-turaga ka so na ose, kei na tamata daucici e lewe limasagavulu me liu tiko vua.

² A sa dausou e na veimataka ko Apisalomi, ka la'ki tu e na bati ni sala mai na matamata-ni-koro: ia ni sa lako mai vua na tui e dua na tamata me lewa e na vuku ni dua na ka sa veiletitaki, sa qai kacivi koya ko Apisalomi, ka kaya, O cei na koro ko sa lako maikina? Ia sa kaya, Mai na dua na nodra mataqali na Isireli na nomuni tamata.

³ Sa qai kaya vua ko Apisalomi, Raica, sa vinaka ka dodonu na ka ko lako mai kina; a sa sega ni lesia e dua ko koya na tui me rogoci iko.

⁴ A sa kaya tale ko Apisalomi, Me'u lesi mada me'u turaga ni lewa e na vanua, me lako mai kina vei au na tamata yadua sa dua na nona ka sa veiletitaki se dua na ka me lewai, ia ka'u na lewa vakadodonu vua.

⁵ Ia ni sa toro mai e dua na tamata me vakarokoroko vua, sa dodoka na ligana ko koya, ka tauri koya, ka reguca.

⁶ A sa cakava vakaoqo ko Apisalomi vei ira kecega na Isireli era sa lako mai vua na tui me ia na veilewai: sa qai rawa na yalodra na Isireli ko Apisalomi.

⁷ Sa oti e vasagavulu na yabaki, sa qai kaya vua na tui ko Apisalomi, Me'u lako mada me'u vakayacora na noqu bubului ka'u a cavuta vei Jiova mai Epironi:

⁸ Ni sa cavuta na bubului na nomuni tamata, ni'u a tiko mai Kesuri mai Siria, ka kaya, Kevaka sa na vakalesui au tale ki Jerusalemi ko Jiova, au na qai qaravi Jiova.

⁹ A sa kaya vua ko koya na tui, Mo lako e na vakacegu. A sa ia ko koya, ka lako ki Epironi.

¹⁰ A sa tala eso ko Apisalomi me ra lako lo ki na nodra mataqali kecega na Isireli, me ra kaya, Ni dou sa rogoca ni uvu na davui, dou qai kaya, Sa tui mai Epironi ko Apisalomi.

¹¹ A ra sa lako vata kei Apisalomi e le rua na drau na tamata mai Jerusalemi, era sa kacivi; a ra sa lako vakailoa ga, era sa sega ni kila e dua na ka.

¹² A sa talatala ko Apisalomi, me lako mai na nona koro mai Kilo, ko Eitofeli na kai Kilo, na tamata erau daubose kei Tevita, ka ni sa vakacabora tiko nai soro ko koya. A sa ka tani sara na vere; ni ra sa lewe levu cake tikoga na tamata era sa vuki vei Apisalomi.

¹³ A sa lako mai vei Tevita e dua na tamata daukauitukutuku, ka kaya, Sa golevi Apisalomi na yalodra na Isireli.

¹⁴ A sa kaya ko Tevita vei ira kecega na nona tamata era tiko vata kaya mai Jerusalemi, Tou mai ia, me da dro; ni da na sega ni vakabulai rawa mai vei Apisalomi: tei kusarawa me da lako, de vauci keda vakasauri ko koya, ka vakacacani keda, ka samuta na koro e nai seleiwau.

¹⁵ A ra sa kaya vua na tui ko ira na nona tamata, Ni raica, na noqu turaga na tui, koi keitou na nomuni tamata keitou na kitaka na ka kecega ko ni sa vinakata.

¹⁶ A sa lako yani na tui, a sa muri koya ko ira kecega na nona lewe-ni-vale. A sa laiva na tui e lewe tini na yalewa, eratou watina lalai, me vakatawa na vale.

¹⁷ A sa lako yani na tui, a ra sa muri koya ko ira kecega na tamata; a sa la'ki tiko mai Peci-meraki.

¹⁸ A ra sa lako vata kaya ko ira kecega na nona tamata; kei ira kecega na Kireci, kei ira kecega na Pileci, kei ira kecega na kai Kaca, era le ono na drau na tamata era sa muri koya mai Kaca, era sa liutaki koya na tui.

¹⁹ Sa qai kaya na tui vei Itei na kai Kaca, A cava ko sa lako talega kina kei keda? mo lesu, ka tiko kei koya na tui; ni ko sa kai tani ko iko, ka sa tiko vulagi walega:

²⁰ O a lako walega mai e na noa, ia me'u vakavuna li edaidai na nomu veilakoyaki kei keimami? ia koi au, au sa lako ki na vanua ka'u na lako rawa kina; mo lesu tale, ka kauti ira vata tale kei iko na wekamu e na loloma kei na dina.

²¹ A sa vosa vua na tui ko Itei, ka kaya, Me vaka sa bula ko Jiova, a sa bula na noqu turaga na tui, ena tiko na nomuni tamata e na tikina sa tiko kina na noqu turaga na tui, se na bula se na mate.

²² A sa kaya vei Itei ko Tevita, Mo lako tu yani. A sa lako ki tai kadua ko Itei na kai Kaca, kei ira kecega na nona tamata, kei ira kecega na lalai era tiko vata kaya.

²³ A ra sa tagi vakadomoilevu kecega na lewe ni vanua, a ra sa lako ki tai kadua na tamata kecega: a sa lako talega na tui ki tai kadua ni soniwai ko Kitironi, a ra sa lako ki tai kadua na tamata kecega vaka ki na sala ki veikau.

²⁴ Ia raica, ko Setoki talega, kei ira kecega na Livai era tiko vata kaya, era sa colata tiko na kato ni veiyalayalati ni Kalou, a ra sa tauca sobu na kato ni Kalou; a sa lako cake ko Epaiaca, ka me ra lako tani mada e na koro ko ira kecega na tamata.

²⁵ A sa kaya vei Setoki na tui, Mo kauta tale yani ki na koro na kato ni Kalou: ke sa lomani au ko Jiova, ena vakalesui au tale ko koya me'u raica na ka oqo kei na nona vale talega:

²⁶ Ia kevaka sa kaya vakaoqo, Au sa sega ni vinakati iko, raica, au sa vakarorogo, me kitaka vei au ko koya na ka e vinaka vua.

²⁷ Sa kaya talega vei Setoki na bete, ko koya na tui Sa tamata daurai beka ko iko? mo lesu vakacegu tale ki na koro, kei rau talega na luvemudrau, ko Eiimaasi na luvemu, kei Jonacani na luve i Epaiaca.

²⁸ Dou raica, ka'u na wawa e na buca ni veikau, ka me kau mada maivei kemudou e dua nai tukutuku vei au:

²⁹ A sa kauta tale na kato ni Kalou ki Jerusalemi ko Setoki kei Epaiaca: a rau sa tiko maikea.

³⁰ A sa cabe cake ko Tevita e nai cabecabe ni veiolive, a sa tagi tiko ni sa lako tu, a sa puloutaki tu na uluna, a sa sega ni vakaivava na yavana: a ra sa puloutaka na uludra na tamata kecega era lako vata kaya, a ra sa lako cake, ka tagi lako ga.

³¹ A sa tukuni vei Tevita, ka vaka, Ko Eitofeli, sa tiko vata kei ira era buki vere vata kei Apisalomi. A sa kaya ko Tevita, I Jiova, mo vakalialia mada na ka sa bosea ko Eitofeli.

³² Ia ni sa yaco ki delana ko Tevita, na vanua sa daulotu kina vua na Kalou, raica, sa tavaki koya ko Usai na Ariki, sa kadresu na nona kote, ka kaburaki tu e uluna na qele:

³³ a sa kaya vua ko Tevita, Kevaka ko sa lako vata kei au, ko na bitaki au,

³⁴ ia kevaka ko sa lesu yani ki na koro, ka kaya vei Apisalomi, Ka'u na nomuni tamata, koi kemuni na tui; au sa nona tamata na tamamuni eliu, ia ka'u na qai nomuni tamata talega: ko na qai vakawaletaka na ka e bosea ko Eitofeli e na vukuqu:

³⁵ Ia sa sega li ni tiko vata kei iko maikea koi rau na bete, ko Setoki kei Epaiaca? ia na ka kecega ko na rogoca mai na nona vale na tui, mo tukuna vei rau na bete, ko Setoki kei Epaiaca:

³⁶ raica, sa tiko vata kei rau maikea na luvedrau, ko Eiimaasi, na luve i Setoki ka tagane, kei Jonacani, na luve i Epaiaca ka tagane; ia mo dou talai rau vei au me tukuna na ka kecega dou na rogoca.

³⁷ A sa lako ki na koro ko Usai nai tau i Tevita, a sa lako ki Jerusalemi ko Apisalomi.