2 Samuela 13 - Vakavakadewa Makawa

Sa vakasaurarataki Tema, na ganena, ko Aminoni, a sa qai cata, 1-18. Sa vakacegui Tema, na ganena ko Apisalomi, ka qai vakamatei Aminoni emuri, 19-37. A sa dro ko Apisalomi, 38,39.

¹ Sa oti oqo, sa dua na gane i Apisalomi na luve i Tevita, sa matavinaka, na yacana ko Tema: a sa domoni koya ko Aminoni na luve i Tevita.

² A sa rarawa ko Aminoni, ka tauvi mate kina e na vuku i Tema na ganena; ni sa goneyalewa ko koya; ka sa nanuma ko Aminoni ni sa dredre me cakava vua e dua na ka.

³ A sa dua nai tau i Aminoni, na yacana ko Jonatapi, na luve i Semea na tuaka i Tevita; ia sa tamata qaseqase ko Jonatapi.

⁴ A sa kaya vua, A cava ko sa yago ca kina vakaoqo e na veisiga, o iko na luvena na tui? o na sega beka ni tukuna mai vei au? A sa kaya vua ko Aminoni, Au sa domoni Tema na gane i Apisalomi na taciqu.

⁵ A sa kaya vua ko Jonatapi, Mo davo sobu e na nomu i mocemoce, ka vaka ko sa tauvi mate: ia ni sa lako mai me raici iko ko tamamu, mo kaya vua, Me lako mada mai ko Tema na ganequ, ka vakani au, ka cakava na kakana, ni'u raica tiko, ka me'u kania mai na ligana.

⁶ A sa koto sobu ko Aminoni, ka vaka ni sa tauvi mate: a sa lako mai me raica ko koya na tui, a sa kaya vua na tui ko Aminoni, Me lako mada mai ko Tema na ganequ, ka bulia e mataqu e rua na keki, me'u kania mai na ligana.

⁷ A sa talaki ki vale vei Tema ko Tevita, ka kaya, Mo lako mada ki na vale i Aminoni na ganemu, ka caka kena.

⁸ A sa lako ko Tema ki na vale i Aminoni na ganena; ia sa davo koto ko koya. A sa kauta na madrai droka ko koya, ka natuka, ka bulia e matana eso na keki, a sa tavuna na keki.

⁹ A sa kauta na tavuteke, ka sovara e matana; a sa bese ni kana ko koya. A sa kaya ko Aminoni, Me lako tani vei au ki tautuba na tamata kecega. A ra sa lako tani ki tautuba na tamata kecega.

¹⁰ A sa kaya vei Tema ko Aminoni, Mo kauta mai ki loqi na kakana, me'u kania mai na ligamu. A sa taura ko Tema na keki sa cakava ko koya, ka kauta ki loqi vei Aminoni na ganena.

¹¹ Ia ni sa kauta vua ko koya me kania, sa tauri koya ko koya, a sa kaya vua, Me daru moce vata, na ganequ.

¹² A sa kaya vua ko koya, Me kakua, na ganequ, mo kakua ni vakacacani au; ni sa sega ni daucaka vakaoqo e Isireli: mo kakua ni kitaka na ka lialia oqo:

¹³ ia koi au, ka'u na biuta kivei na qau i rogo ca? ia ko iko, ko na vaka e dua vei ira na lialia e Isireli: ia oqo, mo vosa mada vua na tui; ni na sega ni bureitaki au vei iko ko koya.

¹⁴ Ia sa sega ni via vakarorogo vua ko koya; ka ni sa kaukauwa, ka malumalumu ko koya, sa rawai koya, ka vakacacana.

¹⁵ A sa qai cati koya vakalevu sara ko Aminoni; ka sa levu cake na nona cati koya, ka lailai na nona domoni koya eliu. A sa kaya vua ko Aminoni, Tu cake, mo lako yani.

¹⁶ A sa kaya vua ko koya, Me kakua; sa levu na kena ca na ka oqo ni ko sa talai au yani, ka lailai na ka tani ko ya ko a cakava vei au. Ia sa bese ko koya ni rogoci koya.

¹⁷ Sa qai kaciva na nona tamata, ka dauqaravi koya ka kaya vua, Mo kauta tani na yalewa oqo ki tautuba, ka vakitaka vua nai sogo ni katuba.

¹⁸ A sa vakaisulu ko koya e nai sulu veivolavolai: ni ra sa dauvakaisulu vakakina na luve ni tui era sa goneyalewa. A sa kauti koya tani ki tautuba ko koya na nona tamata, ka vakitaka vua nai sogo ni katuba.

¹⁹ A sa kaburaka ki uluna na dravusa ko Tema, ka dresulaka na nonai sulu veivolavolai sa vakaisulu kina, a sa tabaka na uluna e na ligana, ka lako voli, a tagi tiko.

²⁰ A sa kaya vua ko Apisalomi na ganena, Sa tiko vata kei iko ko Aminoni na ganemu, se segai? Ia mo kakua ga ni tukuna, na ganequ; a ganemu ga ko koya; mo kakua ni rarawa e na ka oqo. A sa tiko vakadawai ko Tema e na vale i Apisalomi na ganena.

²¹ Ia ni sa rogoca na ka kecega oqo ko Tevita na tui, sa cudru vakalevu.

²² Ia ko Apisalomi sa sega ni vosataka na ka vinaka se na ka ca vei Aminoni: ni sa cati Aminoni ko Apisalomi, ni sa vakacacani Tema na ganena.

²³ Ia sa oti e rua na yabaki, sa qai tiko vei Apisalomi eso na tamata dauveikoti sipi mai Peali-asori, ko ya sa voleka ki Ifireimi: a sa soqoni iratou vata kecega na luvena tagane na tui ko Apisalomi.

²⁴ A sa lako vua na tui ko Apisalomi, ka kaya, Raica, sa tiko vei au na nomuni tamata eso na tamata dauveikoti sipi; mo ni lako vata kei au na nomuni tamata koi kemuni na tui, kei ira talega na nona tamata.

²⁵ A sa kaya vei Apisalomi na tui, Me kakua ga, na luvequ, me keitou kakua mada ni lako koi keitou kecega, de keitou sa rui vakaocataki iko. A sa cikevi koya; ia sa sega ni via lako, ia sa vosavakalougatataki koya ga.

²⁶ A sa kaya ko Apisalomi, Ia kevaka e segai, me lako mada kei keitou ko Aminoni na tuakaqu. A sa kaya vua na tui, A cava me lako kina kei iko ko koya?

²⁷ A sa cikevi koya ko Apisalomi, a sa soli Aminoni kina na tui kei iratou kecega na luvena, me ratou lako vata kaya.

²⁸ A sa vakarota ko Apisalomi vei ira na nona cauravou, ka kaya, Dou raica mada ni sa marau na yalo i Aminoni e na waini, ka ni'u sa kaya vei kemudou, Dou mokuti Aminoni, dou qai vakamatei koya, kakua ni rere: ni'u sa vakarota vei kemudou: mo dou yalo doudou, ka qaqa.

²⁹ A ra sa kitaka vei Aminoni ko ira na tamata i Apisalomi, me vaka sa vakarota ko Apisalomi. Eratou sa qai cavu tu ko ira kecega na luvena na tui, ka ra vodoka na nona meule na tamata yadua, ka dro.

³⁰ Ia ni ratou sa lako tiko e na sala, sa yaco vei Tevita nai rogorogo, ka vaka, Sa mokuti iratou kecega na luvena na tui ko Apisalomi, a sa sega ni vo e dua vei iratou.

³¹ Sa qai tu na tui, ka dresulaka na nonai sulu, ka davo e na qele; a ra sa tu kecega na nona tamata, ka sa dresulaki tu na nodra i sulu.

³² A sa vosa ko Jonatapi, na luve i Semea na tuaka i Tevita, ka kaya, Me kakua ni nanuma ko koya na noqu turaga, ni sa vakamatei ko iratou kecega na cauravou na luve ni tui; ko Aminoni duaduaga sa mate: ni sa nakita na ka oqo ko Apisalomi mai na siga ka vakacacani Tema kina na ganena ko koya:

³³ ia oqo, me kakua ni rarawa kina ko koya na noqu turaga na tui, ka vaka, eratou sa mate tu ko iratou kecega na luvemuni na tui: ni sa mate duaduaga ko Aminoni.

³⁴ A sa dro ko Apisalomi. Ia sa ta cake na cauravou sa vakatawa, ka rai voli, ka raica, sa lewe vuqa na tamata era sa lako tiko mai e na sala e na yasa ni ulu-ni-vanua ki dakuna.

³⁵ A sa kaya vua na tui ko Jonatapi, Raica, eratou sa lako mai na luvena na tui: me vaka ka'u a kaya na nomuni tamata, sai koya ga.

³⁶ Ia ni sa vosa oti, raica, eratou sa tadu mai na luvena na tui, a ratou sa tagi yaso: ia na tui talega kei ira kece na nona tamata, era sa tagi e na tagi levu sara.

³⁷ A sa dro ko Apisalomi, ka lako vei Talimei, na luve i Amiute, na tui Kesuri. A sa tagicaka na luvena e na veisiga ko Tevita.

³⁸ A sa dro ga ko Apisalomi, ka lako ki Kesuri, a sa tiko maikea ka yabaki tolu.

³⁹ A sa gadreva ko Tevita na tui me lako yani vei Apisalomi, ni sa vakacegui e na vuku i Aminoni, ni sa mate ko koya.