2 Samuela 12 - Vakavakadewa Makawa

Sa vunauci Tevita ko Necani na parofita, a sa veivutuni kina ko Tevita, 1-14; a sa mate na luve i Paci-sepa, 15-23. Sa sucu ko Solomoni, 24,25. Sa kabai ko Rapa, a sa vakararawataki ira vakalevu nai taukei ko Tevita, 26-31.

¹ A sa talai Necani vei Tevita ko Jiova. A sa lako vua ko koya, ka kaya vua, Sa tiko e na dua na koro e lewe rua na tamata, e dua sa vutuniyau, ka dua sa dravudravua.

² Na tamata vutuniyau sa levu sara na nona qele ni sipi, kei na nona qele ni pulumokau;

³ ia sa sega vua na tamata dravudravua e dua na ka, e dua walega na lami yalewa lailai, ka volia ko koya, ka dauvakania: a sa tubu cake kaya kei iratou talega na luvena; sa kania eso na tiki ni kena, a sa gunu mai na mena bilo, a sa koto e lomaserena, a sa tautauvata vua kei na dua na luvena yalewa.

⁴ A sa lako vua na tamata vutuniyau e dua na tamata sa lako tu, ia sa sega ni taura ko koya e dua na nona sipi se na nona pulumokau, me vakarau vua sa taubale voli ka sa lako mai vua; ia sa taura na nona lami na tamata dravudravua, ka vakarautaka me kena na tamata sa lako mai vua.

⁵ A sa waqa vakalevu mai na cudru i Tevita vua na tamata; a sa kaya vei Necani, Me vaka sa bula ko Jiova, sa dodonu me mate na tamata sa cakava na ka oqo:

⁶ ia ena sauma vakava na lami, ni sa cakava na ka oqo, ka ni sa sega vua na loloma.

⁷ A sa kaya vei Tevita ko Necani, Sai kemuni ga na tamata ko ya. Sa vosa vakaoqo ko Jiova na nodra Kalou na Isireli, Ka'u a lumuti iko mo nodra tui na Isireli, ia ka'u a vakabulai iko mai na liga i Saula;

⁸ au a solia talega vei iko na nona vale na nomu turaga, kei iratou na wati ni nomu turaga ki na lomaseremu, au a solia talega vei iko na nodra mataqali na Isireli kei ira na Juta; ia kevaka sa lailai ko ya, ka'u na vakaikuritaka vei iko na ka vaka kei na ka vaka.

⁹ A cava ko sa beca kina na vosa i Jiova, mo cakava na ka ca e matana? ko a vakamatei Uraia na Itaiti e nai seleiwau, ka kauta na watina me watimu, ka vakamatei koya e na nodra i seleiwau na luve i Amoni.

¹⁰ Ia oqo, ena sega kina ni yali mai na nomu vale nai seleiwau, ka sega ni mudu; ni ko sa beci au, ka kauta na wati i Uraia na Itaiti me watimu:

¹¹ sa vosa vakaoqo ko Jiova, Raica, ka'u na vakatubura vei iko na ca mai na nomu vale, ia ka'u na kauti iratou na watimu e matamu, ka solia vua na wekamu, ia ena moce vata kei iratou na watimu ko koya e na mata ni siga oqo.

¹² Ko a cakava vakavuni ko iko ia ka'u na cakava na ka oqo e matadra kecega na Isireli, kei na mata ni siga.

¹³ A sa kaya vei Necani ko Tevita, Au sa cala vei Jiova. A sa kaya vei Tevita ko Necani, Sa kauta tani na nomuni valavala ca ko Jiova; ko ni na sega ni mate:

¹⁴ Ia ni kemuni sa vakavuna me ra vosavakacaca ko ira na meca i Jiova e na vuku ni ka oqo, sa na mate vakaidina talega na luvemuni sa sucu.

¹⁵ A sa lako yani ko Necani ki na nona vale. A sa vakayaco mate ko Jiova vua na luve i Tevita ka vakasucuma na wati i Uraia, a sa malumalumu sara.

¹⁶ A sa vakamasuta na Kalou ko Tevita e na vuku ni gone; a sa lolo ko Tevita, ka curu, ka koto e na qele ka siga mai.

¹⁷ A sa ia ko iratou na qase ni nona vale ka la'ki tu vua me ra vakaduria cake mai na qele; a sa bese ko koya, ka sega ni kana vata kei ira.

¹⁸ Ia e na kenai kavitu ni siga sa ciba na gone. A ratou sa rere ni tukuna vei Tevita ko ira na nona tamata ni sa mate na gone; ni ratou sa kaya, Raica, ni sa bula tiko na gone, edatou a vosa vua, ka sega ni vakarogoca na nodatou vosa ko koya: ena vakaevei na nona rarawa, ni datou sa tukuna vua ni sa mate na gone?

¹⁹ Ia ni sa raica ko Tevita eratou sa vakasolokakana ko iratou na nona tamata, sa qai kila ko Tevita sa mate na gone: a sa taroga vei iratou na nona tamata ko Tevita, Sa mate na gone, ne? A ratou sa kaya, Sa mate.

²⁰ Sa qai tu cake mai na qele ko Tevita, ka sili, ka lumu, ka vakaisulutaki koya e nai sulu tani; ka la'ki curu ki na vale i Jiova, ka lotu: sa qai lako ki na nona vale; ia ni sa vaka me kana, sa kau vua na kakana, a sa kana ko koya.

²¹ Eratou sa qai taroga vua ko iratou na nona tamata, A cava na ka oqo ko ni sa cakava? ni sa bula tiko na gone, ko ni a lolo ka tagi e na vukuna; ia ni sa qai mate na gone, ko ni a tu cake ka kana.

²² A sa kaya ko koya, Ni sa bula tiko na gone, ka'u a lolo ka tagi; ni'u a kaya, O cei e kila se na lomani au ko Jiova, se segai, me bula na gone?

²³ ia ni sa qai mate ko koya, me'u qai lolo e na vuku ni cava? au sa rawata li me'u kauti koya tale mai? Au na lako ga vua, ia ko koya ena sega ni lesu mai vei au.

²⁴ A sa vakacegui Paci-sepa na watina ko Tevita, ka curu vua ka moce kaya; a sa vakasucuma ko koya e dua na gonetagane, a sa vakayacani koya, ko Solomoni: a sa lomani koya ko Jiova:

²⁵ a sa talai Necani na parofita ko koya, ka vakatoka na yacana ko Jititia [Ko sa lomani vei Jiova], e na vuku i Jiova.

²⁶ Ia sa vala tiko ko Joapi kei Rapa, ka nodra na luve i Amoni, a sa rawa na koro turaga ko ya.

²⁷ A sa tala eso na tamata vei Tevita ko Joapi, ka kaya, Au sa kabai Rapa, ka rawa na koro ni veiwai:

²⁸ ia mo ni vakasoqoni ira vata na tamata sa vo, ka me buku na druadrua ni koro, ka rawa; de'u sa rawa na koro koi au, a sa vakatokai e na yacaqu.

²⁹ A sa vakasoqoni ira vata na tamata kecega ko Tevita, ka lako ki Rapa, ka ia kina nai valu, ka rawa.

³⁰ Sa luvata na nonai sala vakaturaga mai vua na nodra tui, a kena bibi e dua na taledi koula, ka tu kina na veivatu talei eso; a sa vakaisalataki kina ko Tevita. A sa kauta yani nai toki ni valu mai na koro, e dua na ka levu sara.

³¹ A sa kauti ira yani na tamata sa tiko kina, ka cudruvi ira e nai varo, kei nai kadrukadru aironi ni were, kei na matau aironi, ka lesi ira ki na cakacaka ni vatu-buli: a sa cakava vakakina ki na nodra koro kecega na luve i Amoni. A sa lesu tale ki Jerusalemi ko Tevita kei ira kecega na tamata.