2 Samuela 1 - Vakavakadewa Makawa

Sa mai tukuna na mate i Saula vei Tevita e dua na Amalekaiti, ka kauta vei Tevita na nonai sala vakaturaga, 1-10. Sa tagi ko Tevita, ka sa mokuta na Amalekaiti, ni sa kaya sa vakamatei Saula, 11-16. Sa lelevaki Saula kei Jonacani ko Tevita, 17-27.

¹ Ia ni sa mate ko Saula, ka sa lesu mai ko Tevita ni sa mokuti ira oti na Amalekaiti, ka sa tiko bogi rua mai Sikilaki ko Tevita;

² e nai katolu ni siga, raica, sa lako mai e dua na tamata mai nai tikotiko ni valu nei Saula, a sa kadresu na nonai sulu, a sa kaburaki ki na uluna na qele: ia ni sa lako mai vei Tevita, sa cuva ki na qele ko koya, ka vakarokoroko.

³ A sa kaya vua ko Tevita, O sa lako maivei? A sa kaya vua ko koya, Au sa dro bula mai na nodra i tikotiko na Isireli.

⁴ A sa kaya vua ko Tevita, A cava na ka sa caka? Mo tukuna mada mai vei au. A sa kaya ko koya, Era sa dro mai nai valu ko ira na tamata, a sa lewe vuqa vei ira na tamata sa bale mate; a sa mate talega ko Saula kei Jonacani na luvena.

⁵ A sa kaya ko Tevita vua na cauravou ka mai tukuna vua, O sa kila vakaevei ni sa mate ko Saula kei Jonacani na luvena?

⁶ A sa kaya ko koya na cauravou sa tukutuku tiko vua, Ni'u a lako loa mai na ulu-ni-vanua ko Kilipoa, raica, sa tokoni koya e na nona moto ko Saula, ka raica, sa cici muri koya voleka na qiqi-ni-valu kei ira na tamata sa vodo ose:

⁷ ia ni sa rai ki muri ko koya, sa kunei au, a sa kacivi au, ka'u a kaya, Oi au saka.

⁸ A sa kaya vei au, O cei ko iko? ka'u a kaya vua, Koi au saka e dua vei ira na Amalekaiti.

⁹ A sa kaya vei au, Mo mai tu mada e tikiqu, ka vakamatei au: ni sa kani au na rarawa levu, ni sa vo tiko vei au na noqu bula.

¹⁰ Ia ka'u a tu e tikina, ka vakamatei koya, ni'u a kila ena sega ni bula rawa ni sa bale tu: ia ka'u a taura nai sala vakaturaga sa vakaisala kina, kei na qato sa vaqato kina na ligana, ia ka'u a kauta mai ki ke vei kemuni na noqu turaga.

¹¹ A sa taura na nonai sulu ko Tevita, ka dresulaka, ka ra kitaka vaka talega kina na tamata kece era tiko vata kaya:

¹² a ra sa tagi ka yaso, ka lolo ka yakavi mada, e na vuku i Saula, e na vuku talega i Jonacani na luvena, e na vukudra talega na tamata i Jiova, e na vukudra talega na mataqali i Isireli; ni ra a bale e nai seleiwau.

¹³ A sa kaya ko Tevita vua na cauravou ka mai tukutuku vua, A kai vei ko iko? A sa kaya ko koya, Koi au saka na luve ni dua na kai tani, na Amalekaiti.

¹⁴ A sa kaya vua ko Tevita, E vakaevei ni ko a sega ni rere ni dodoka yani na ligamu mo vakamatei koya ka lumuta ko Jiova?

¹⁵ A sa kaciva e dua vei ira na cauravou ko Tevita, ka kaya, Mo toro mada vua mo yaviti koya. A sa mokuta mate ko koya.

¹⁶ A sa kaya vua ko Tevita, Sa baleti iko ga na nomu mate; ni sa beitaki iko na gusumu, ni ko sa kaya, Au sa vakamatei koya ka lumuta ko Jiova.

¹⁷ A sa lelevaki Saula, kei Jonacani na luvena, ko Tevita e na lele oqo:

¹⁸ a sa vakarota me vakatavulici vei ira na Juta Na sere ni dakai: raica, sa volai e nai vola i Jeseri:

¹⁹ Sa vuetaki na nodra i ukuuku na Isireli e na nomu veitikina cecere! Ulei! sa bale ko ira na kaukauwa!

²⁰ Dou kakua ni tukuna mai Kaca, Dou kakua ni vakarogoya e na veisalatu mai Asikiloni: De ra reki na nodra goneyalewa na kai Filisitia, De ra wate na nodra goneyalewa na tamata sa sega ni cili.

²¹ Oi kemudou na ulu-ni-vanua ko Kilipoa, Me kakua na tegu me kakua na uca e tauci kemudou, me kakua na veiwere ni veimadrali; Ni sa biu tani maikina vakavelavela na nodra i sasabai na qaqa; Nai sasabai i Saula, me vaka sa sega ni lumuti tu e na waiwai.

²² Mai na nodra dra era sa moku, mai na nodra uro na qaqa, Sa sega ni gole tani na dakai i Jonacani, Ka sega ni lesu wale nai seleiwau i Saula

²³ Ko Saula kei Jonacani, erau sa veilomani ka dauveivinakati ni rau sa bula, Ka rau sa sega ni tawase ni rau sa mate: Erau a vakatotolo, ka berabera na ikeli, Erau a kaukauwa, ka malumalumu na laioni.

²⁴ Oi kemudou na goneyalewa ni Isireli, dou tagicaki Saula, O koya ka vakaisulutaki kemudou e nai sulu kulakula ka uasivi, O koya ka vakaiukuukutaka na nomudou i sulu e na koula.

²⁵ Ulei! era sa bale na kaukauwa e na kedra maliwa nai valu! Sa vakabalei ko Jonacani e na nomu veitikina cecere!

²⁶ Au sa rarawa vakalevu e na vukumu, na wekaqu Jonacani: O sa vinaka sara vei au: Sa ka veivakurabuitaki na nomu loloma vei au, Sa ka lailai na nodra loloma na yalewa.

²⁷ Ulei, era sa bale na kaukauwa, Ka rusa nai yaragi ni valu.