2 Korinica 3 - Vakavakadewa Makawa

Sa vakatakila ko koya ni sa sega ni dokai koya ni sa tubu na lotu e na vukuna, sa vakamolimoli ga kina vua na Kalou, 16. Sa qai vakatakila ni sa uasivi cake e na vunau i Mosese nai tukutuku-vinaka kei Jisu, 718.

¹ Keitou sa vakatekivu tale beka me tukuni keitou? se sa yaga beka vei keitou me keitou tukuni vei kemudou e nai vola eso, me vakataki ira eso, se me keitou tukuni vakakina maivei kemudou?

² Oi kemudou ga na neitou i vola sa volai e na loma i keitou, era sa kila ka wilika ko ira na tamata kecega;

³ sa vakaraitaki ga ni dou sai vola i Karisito keitou sa cakava, sa sega ni volai e na wai ni volavola, sa volai ga e na Yalo ni Kalou bula; sa sega ga e na dela ni vatu, ia e na dela ni yalomudou sa malumu.

⁴ Ia sa vakaoqo na neitou vakararavi vua na Kalou e na vuku i Karisito:

⁵ ni keitou sa sega ni rawata vakai keitou me vakasamataka ni rawa vakai keitou e dua na ka; ia sa vu mai vua na Kalou ga na neitou kaukauwa;

⁶ o koya sa vakarautaki keitou me keitou sai talatala ni veiyalayalati vou: a sa sega ni vaka sa volai, a ka vakayalo ga; ni sa ia na veivakamatei na ka sa volai, ka sa ia na veivakabulai na ka vakayalo.

⁷ Ia kevaka sa yaco vata kei na serau na cakacaka sa ia kina na veivakamatei, sa volai ka ceuti e na vatu, a ra sa sega ni vakaraica rawa kina na mata i Mosese ko ira na luve i Isireli e na vuku ni serau ni matana, ia sa qai lako tani oqo:

⁸ ena sega beka ni uasivi cake kina na serau ni cakacaka vakayalo?

⁹ Io, kevaka sa dua na serau ni cakacaka ni cudruvi, ena uasivi cake vakalevu na serau ni cakacaka ni veivakadonui.

¹⁰ Ia na ka ka serau, sa qai sega so na kena serau ni sa vakatauvatani kei na serau sa uasivi cake.

¹¹ Io, kevaka ka serau na ka sa biu tiko yani, ena dina vakalevu cake ni sa serau tiko na ka sa tu vakadua.

¹² Ia ni sa tu vei keitou nai nuinui vakaoqo, keitou sa qai vosa vakamacala sara:

¹³ ia keitou sa sega ni vakataki Mosese ni sa ubia na matana e na pulou, me ra kakua ni vakaraica matua ko ira na luve i Isireli ki nai otioti ni ka sa biu tiko yani:

¹⁴ ia ka sa vakalomaqataki na lomadra: ni sa tu ga na pulou ko ya ka yacova na siga oqo ni sa wili na veiyalayalati makawa, sa sega ga ni kau tani; ni sai Karisito sa kau tani kina na pulou oqo.

¹⁵ Ia ka sa yacova na siga oqo, ni sa wili ko Mosese, sa tu ga e na lomadra na pulou.

¹⁶ Ia ni na saumaki oqo vua na Turaga, ena qai kau tani na pulou.

¹⁷ Ia na Turaga sai koya ga na Yalo Tabu; ia sa sereki ko koya, sa tu vua na Yalo ni Turaga.

¹⁸ Ia koi keda kecega, ni sa sega ni tabonaki tiko na matada, eda sa raica na serau ni Turaga me vaka e nai iloilo, ka sa vakamataliataki me da vakataki koya, ni sa tubu cake tiko na serau me uasivi, me vaka e na Turaga o koya na Yalo Tabu.