2 Korinica 2 - Vakavakadewa Makawa

Sa kaya ko koya me ra lomani koya tale na tamata ka cala ka sa qai veivutuni, ni sa vakakina ko koya, 111. Sa qai tukuna na ka sa lako kina ki Masitonia, a sa tukuna ni sa vakarokorokotaki na Kalou e nai tukutuku-vinaka, 1217.

¹ Ia kau sa lewa vakaoqo e na lomaqu, meu kakua ni lako tale vei kemudou e na veivakararawataki.

² Io, kevaka kau sa vakararawataka na lomamudou, o cei sa vakamarautaki au, o koya duaduaga kau sa vakararawataka?

³ Ia kau a vola vakakina vei kemudou, de vakararawataki na lomaqu, niu lako yani, e na vukudra sa dodonu meu reki kina; kau sa vakararavi ga vei kemudou kecega ni sa nomudou kecega na noqu reki.

⁴ Ni sa rarawa vakalevu ka yaluma na lomaqu niu a vola vei kemudou, a sa vakawai vakalevu na mataqu; sa segai mo dou rarawa kina, ia mo dou kila ga ni sa levu sara na noqu loloma vei kemudou.

⁵ Ia kevaka e dua sa ia na veivakararawataki, sa sega ni vakararawataki au ga ko koya, ia (meu kakua ni bitaka vakalevu) koi kemudou kece talega.

⁶ Sa rauti koya sa vakakina na kenai sau oqo, sa yaco vua maivei ira na lewe vuqa:

⁷ ka sa kilikili cake kina mo dou kua soti ni cudruva, ka mo dou vakaceguya, de luvuci koya sa vakaoqo na nona rarawa levu sara.

⁸ O koya oqo kau sa masuti kemudou kina, mo dou vakadinadinataka na nomudou loloma vei koya.

⁹ Ni sa ka talega oqo kau a vola yani kina, meu kilai kemudou kina, se dou sa talairawarawa e na ka kecega, se segai.

¹⁰ Ia kevaka dou sa sega ni cudruva e dua e na dua na ka, au sa vaka talega kina koi au; ia kevaka kau sa sega ni cudrutaka e dua na ka, sai kemudou ga kau sa sega ni cudrutaka e dua na ka, sai kemudou ga kau sa sega ni cudrutaka kina, e na mata i Karisito;

¹¹ me kakua ni rawai keda ko Setani: ni da sa sega ni lecava na nona daulawaki.

¹² IA niu a lako ki Tiroa e na vuku ni tukutuku-vinaka kei Karisito, a sa dolava vei au na katuba na Turaga,

¹³ sa sega ni cegu na yaloqu, niu sa sega ni kunei Taito na wekaqu: au sa qai tatau vei ira, ka lako tani ki Masitonia.

¹⁴ Me ia na vakavinavinaka vua na Kalou, o koya sa tuberi keitou tikoga e na reki e na yaca i Karisito, ka sa vakatakila vata kei keitou e na yasana kecega ni sa boi vinaka na kilai koya.

¹⁵ Ni sai Karisito keitou sa boi vinaka kina e na mata ni Kalou, vei ira era sa vakabulai tiko, vei ira talega era sa vakarusai tiko:

¹⁶ vei ira oqo sa boiboi veivakamatei me ra mate kina; vei ira oqori sa boiboi veivakabulai me ra bula kina. Ia ko cei sa rawata na veika oqo?

¹⁷ Ni keitou sa sega ni dauvakatanitaka na vosa ni Kalou, me vakataki ira na lewe vuqa; ia keitou sa vakataki ira era sa dina sara, me vaka sa mai vua na Kalou, e na mata ni Kalou, keitou sa vosa e na yaca i Karisito.