2 Cesalonaika 3 - Vakavakadewa Makawa

Sa kaya ko koya me ra masulaki koya; a sa vakacegui ira, ka masulaki ira, a sa vakavulici ira me ra kakua ni vucesa, se guca, 115. Sa qai tinia na nonai vola, 1618.

¹ Meu tinia, oi kemudou na veiwekani, dou masulaki keitou, me cici yani na vosa ni Turaga, ka me dokai tiko, me vaka vei kemudou:

² me keitou vakabulai talega maivei ira na tamata era yalo vakatani ka ca: ni sa sega vei ira kecega na vakabauta.

³ Ia sa lomadina na Turaga, o koya ena vakataudeitaki kemudou, ka maroroi kemudou mai na ca.

⁴ Ia keitou sa vakadinata na Turaga e na vukumudou, ni dou sa qai cakava ka dou na cakava emuri na veika keitou sa vakarota vei kemudou.

⁵ Ia me tubera mada na yalomudou na Turaga ki na loloma ni Kalou, kei na dauvosota me vakataki Karisito.

⁶ Ia keitou sa vakarota vei kemudou, na veiwekani, e na yaca ni noda Turaga ko Jisu Karisito, mo dou kakua ni tiko vata kaya e dua vei ira na veiwekani sa dauia nai valavala vakatani, ka sega ni vaka nai vakavuvuli era sa rogoca vei keitou.

⁷ Ni dou sa kila sa kilikili kei kemudou mo dou vakadamurimuri keitou; ni keitou a sega ni valavala vakatani e na kemudou maliwa;

⁸ ka keitou sa sega ni kana walega vua e dua na tamata; ia keitou a oga ka oca e na bogi kei na siga, me keitou kakua kina ni vakabibitaka e dua vei kemudou:

⁹ e segai ni sa sega ni dodonu vei keitou, ia me keitou sa nomudou i vakarau ga mo dou vakadamurimuri keitou.

¹⁰ Io, ni keitou a tiko kei kemudou, sa neitou i vakaro oqo vei kemudou, me kakua ni kana ko koya sa sega ni cakacaka.

¹¹ Ni keitou sa rogoca sa so vei kemudou, era sa ia tiko nai valavala vakatani, era sa sega sara ni cakacaka, a ra sa makutu vakatani.

¹² Ia ko ira era sa vakaoqo keitou sa vakarota ka vakamasuta e na vuku ni noda Turaga ko Jisu Karisito, me ra tiko malua ka daucakacaka, ka kania ga na kedra.

¹³ Ia koi kemudou, na veiwekani, dou kakua ni ceguoca e na cakacaka vinaka.

¹⁴ Ia kevaka e dua sa sega ni talairawarawa ki na neitou vosa e nai vola oqo, dou vakatakilakilataka na tamata ko ya, ka kakua ni tiko vata kaya, me madua kina ko koya.

¹⁵ Ia mo dou kakua ga ni nanumi koya me meca, mo dou vakatavulica ga me vaka sa wekamudou.

¹⁶ Ia na Turaga ni veivakacegui me solia tiko ga vei kemudou na vakacegu e na ka kecega. Me tiko vei kemudou kecega na Turaga.

¹⁷ Au sa loloma yani koi au ko Paula, kau sa vola e na ligaqu dina, o koya na kenai vakadinadina e nai vola kecega: au sa vola vakakina.

¹⁸ Me nomudou kecega na loloma ni noda Turaga ko Jisu Karisito. Emeni.