2 Cesalonaika 2 - Vakavakadewa Makawa

Sa vakarota vei ira ko koya me ra tu dei e na vakabauta, 112. Sa qai vakacegui ira tale, ka vakaroti ira, ka masulaki ira, 1317.

¹ Ia keitou sa qai vakamasuti kemudou, na veiwekani, e na vuku ni nona lako tale mai na noda Turaga ko Jisu Karisito, kei na noda soqoni vata vei koya,

² mo dou kakua ni veitosoyaki vakasauri mai na lomadei, se vakataqayataki, me kakua e na vuku ni vosa ni yalo, se nai tukutuku, se nai vola, me vaka sa vu vei keitou, me vaka sa voleka dina mai na siga i Karisito.

³ Me kakua sara e dua na ka me vakaisini kemudou kina e dua; ni na yaco mada eliu na vuki tani, ka na vakaraitaki mada na tamata ni valavala ca, a luve ni veivakarusai;

⁴ o koya sa dauvorata, a sa vakalevui koya me uasivi cake e na ka kecega sa vakatokai me kalou, se dauqaravi; a sa tiko kina ko koya e na vale ni Kalou, a sa vakaraitaki koya me kalou.

⁵ Dou sa sega beka ni nanuma, niu a tukuna vei kemudou na veika oqo, niu a tiko vata kei kemudou?

⁶ Ia dou sa qai kila na ka sa tarova, me vakaraitaki mai kina ko koya e na kena gauna.

⁷ Ni sa cakacaka vakavuni edaidai na ca: ia sa dua e tarova tikoga, ka malua me kau tani yani ko koya.

⁸ Ena qai vakaraitaki na Vu-ni-ca ko ya, o koya ena vakarusa na Turaga e nai cegu ni gusuna, ka vakaotia e na nona lako vakarairai mai:

⁹ sa vaka na cakacaka i Setani na nona lako mai, sa ia e na kaukauwa levu kei na veivakatakilakila kei na veika vakailasu e veivakurabuitaki,

¹⁰ kei na ka e sega ni dodonu sa veivakacalai vei ira era sa rusa; ni ra sa bese ni lomana na ka dina, me ra bula kina.

¹¹ Ia e na vuku ni ka oqo, sa tala tiko na veivakacalai mana vei ira na Kalou, me ra vakadinata kina na ka lasu;

¹² me cudruvi kina ko ira kecega era sa sega ni vakabauta na ka dina, a ra sa vinakata ga na ka e sega ni dodonu.

¹³ Ia sa kilikili kei keitou me keitou ia tikoga na vakavinavinaka vua na Kalou e na vukumudou, na veiwekani, oi kemudou sa lomana na Turaga, ni sa digitaki kemudou na Kalou mai nai vakatekivu mo dou bula ni dou sa vakasavasavataki e na Yalo Tabu, ka dou sa vakabauta na ka dina:

¹⁴ a ka sa kacivi kemudou kina ko koya e na neitou i tukutuku-vinaka, mo dou rawata kina na kena kalougata ni noda Turaga ko Jisu Karisito.

¹⁵ O koya mo dou tu dei na veiwekani, ka taura tiko nai tukutuku dou sa vakatavulici kina maivei keitou, e na vosa, se e nai vola.

¹⁶ Ia na noda Turaga ko Jisu Karisito, kei na Kalou ko Tamada, o koya ka lomani keda, ka solia vei keda e na loloma na vakacegu sa sega ni mudu kei nai nuinui vinaka,

¹⁷ me vakaceguya mada na yalomudou, ka vakataudeitaki kemudou e na vosa kei na cakacaka vinaka kecega.