1 Veigauna 27 - Vakavakadewa Makawa

O iratou na turaga ni valu, 1-15. O ira na turaga ni veimataqali, 16-22. Sa tarovi na wili tamata, 23,24. O ira na tamata turaga nei Tevita, 25-34.

¹ Ia oqo na kedrai wiliwili na Isireli, ko ira na qase turaga, kei ira na turaga ni yayaudolu kei na yayadrau, kei ira na matanivanua era sa veitaravi ni ra qarava na tui, ko ira era sa lako mai ka lako yani vakavula, e na veivula kecega ni yabaki, sa yaruasagavulu ka va na udolu.

² Sa turaga vei ira na mataivalu e nai mata ni vula, ko Jasopiami na luve i Sapitieli ka tagane: ka sa lewe ruasagavulu ka va na udolu e na nona mataivalu.

³ O koya sa liu vei ira kece na kapiteni ni veimataivalu e nai matai ni vula sa maivei ira na luve i Feresi.

⁴ A sa turaga ko Totei na luve i Eoi e na mataivalu sa lako e nai karua ni vula, sa lewa talega e na nona mataivalu ko Mikiloci: a sa lewe ruasagavulu ka va na udolu e na nona mataivalu.

⁵ Ai katolu ni turaga ni mataivalu, sa lako e nai katolu ni vula, ko Pinaia na luve i Jioiata ka tagane, sa tamata turaga: a sa lewe ruasagavulu ka va na udolu e na nona mataivalu.

⁶ Ko Pinaia oqo sa dua vei ira na lewe tolusagavulu na qaqa, a sa uasivi cake vei ira na lewe tolusagavulu, ka sa tiko e na nona mataivalu ko Amisapati na luvena tagane.

⁷ Ai kava, sa lako e nai kava ni vula, ko Asaeli na taci i Joapi, a sa taravi koya ko Sepataia na luvena tagane: a sa lewe ruasagavulu ka va na udolu e na nona mataivalu.

⁸ Ai kalima ni turaga ni valu, sa lako e nai kalima ni vula, ko Samuci na Isira: a sa lewe ruasagavulu ka va na udolu e na nona mataivalu.

⁹ Ai kaono, sa lako e nai kaono ni vula, ko Ira, na tagane na luve i Ikesi na kai Tikoa: a sa lewe ruasagavulu ka va na udolu e na nona mataivalu.

¹⁰ Ai kavitu, sa lako e nai kavitu ni vula, ko Elesi na kai Piloni, maivei ira na mataqali i Ifireimi: sa lewe ruasagavulu ka va na udolu e na nona mataivalu.

¹¹ Ai kawalu, sa lako e nai kawalu ni vula, ko Sipikei na luve i Usa, maivei ira na luve i Sera: a sa le ruasagavulu ka va na udolu e na nona mataivalu.

¹² Ai kaciwa, sa lako e nai kaciwa ni vula, ko Epieseri na kai Anacoci, maivei ira na mataqali i Penijamini: a sa lewe ruasagavulu ka va na udolu e na nona mataivalu.

¹³ Ai katini, sa lako e nai katini ni vula, ko Meerei na kai Nitofa, maivei ira na luve i Sera: a sa lewe ruasagavulu ka va na udolu e na nona mataivalu.

¹⁴ Ai katinikadua, sa lako e nai katinikadua ni vula, ko Pinaia na kai Piraconi, maivei ira na mataqali i Ifireimi: a sa lewe ruasagavulu ka va na udolu e na nona mataivalu.

¹⁵ Ai katinikarua, sa lako e nai katinikarua ni vula, ko Elitai na kai Nitofa, maivei Ocinieli: a sa lewe ruasagavulu ka va na udolu e na nona mataivalu.

¹⁶ A nodra turaga talega na veimataqali i Isireli: sa lewai ira na Rupeni ko Eliesa na luve i Sikiri ka tagane; vei ira na Simioni, ko Sefataia na luve i Meeka ka tagane:

¹⁷ vei ira na Livai, ko Asapaia na luve i Kemueli ka tagane: vei ira na luve i Eroni, ko Setoki:

¹⁸ vei ira na Juta, ko Ilaiu, vei ira na tuaka i Tevita: vei ira na Isakari, ko Omirai na luve i Maikeli ka tagane:

¹⁹ vei ira na Sepuloni, ko Isimaia na luve i Opetaia ka tagane: vei ira na Nafitalai, ko Jirimoci na luve i Asirieli ka tagane:

²⁰ vei ira na Ifireimi, ko Osea na luve i Asasaia ka tagane: vei ira e dua na wase ni mataqali i Manasa, ko Joeli na luve i Pitaia ka tagane:

²¹ vei ira na wase kadua i Manasa mai Kiliati, ko Ito na luve i Sakaraia ka tagane: vei ira na Penijamini, ko Jeesieli na luve i Apineri ka tagane:

²² vei ira na Tani, ko Esareli na luve i Jiroame ka tagane. O ira oqo era sa turaga ni nodra veimataqali na Isireli.

²³ A sa sega ni wiliki ira ko Tevita sa ruasagavulu na nodra yabaki ka toro sobu, ni sa kaya oti ko Jiova ena vakalewevuqataki ira na Isireli, me vaka na veikalokalo mai na lomalagi.

²⁴ Sa vakatekivu ko Joapi na luve i Seruaia me wiliki ira, ka sa sega ni vakaotia, ni sa lutu vei ira na Isireli na cudru, e na vuku ni ka oqo: ka sa sega ni volai na kenai wiliwili e nai vola ni tukutuku i Tevita na tui.

²⁵ A sa nona dau-ni-yau na tui ko Asimavece na luve i Etieli ka tagane: ka sa lewa na lololo e na veiwere, kei na veikoro, kei na veikoro lalai, kei na vei vale-ni-valu, ko Jionacani na luve i Usaia ka tagane:

²⁶ a sa lewai ira era sa cakacaka e na veiwere me cukiraka, ko Esirai na luve i Kilupi ka tagane:

²⁷ ka sai vakatau ni were-ni-vaini ko Semeai na kai Rama: a sa lewa na vua ni veiwere-ni-vaini, kei na veivale ni waini, ko Sapiti na kai Safani:

²⁸ a sa lewa na veiolive, kei na veilolo, e na veibuca, ko Peali-anani na kai Kiteri: ka sa lewa na veivale ni waiwai ko Joasi:

²⁹ a sa lewa na qele ni manumanu sa kana voli mai Seroni, ko Sitirei na kai Seroni: ka sa lewa na qele ni manumanu era sa tiko e na veibuca, ko Safati na luve i Atilai ka tagane:

³⁰ sa lewa na qele ni kameli ko Opili na Isimelaiti: a sa lewa na qele ni asa ko Jetaia na Meronotaiti:

³¹ a sa lewa na qele ni sipi ko Jasisi na Akiraiti. O iratou oqo eratou sa lewa nai yau kecega i Tevita na tui.

³² A sa lewe ni bose ko Jonacani na tamana lailai i Tevita, sa tamata vuku, ka vunivola: ka sa tiko vata kei iratou na luvena tagane na tui ko Jieli na luve i Akimoni ka tagane:

³³ ia sa lewe ni bose ni tui ko Eitofeli: ka sa lewe ni sala ni tui ko Usai na Arikaiti:

³⁴ ai karua kei Eitofeli ko Jioiata na luve i Pinaia ka tagane, kei Epaiaca: a sa turaga levu ni valu ko Joapi e na nonai valu na tui.