1 Veigauna 23 - Vakavakadewa Makawa

Ko ira na Livai.

¹ Ia ni sa qase mai ko Tevita, ka vuqa na nona yabaki, sa buli Solomoni na luvena me tui vei ira na Isireli.

² A sa vakasoqoni ira vata kecega na nodra turaga na Isireli ko koya, kei ira na bete, kei ira na Livai.

³ A sa wili ko ira na Livai sa tolusagavulu na nodra yabaki ka toro cake; ia na kedrai wiliwili, ni ra sa volai na tamata yadua, sa le tolusagavulu ka walu na udolu.

⁴ Sa nodra i tavi na lewe ruasagavulu ka va na udolu vei ira, me vakaraica na cakacaka ki na vale i Jiova; ka sa le ono na udolu era sa turaga ni lewa ka ovisa:

⁵ a sa le va na udolu era sai vakatawa ni matamata-ni-koro: ka le va na udolu era sa vakavinavinaka tiko kivei Jiova, e na ka domo vinaka ka'u a cakava me ia kina na vakavinavinaka.

⁶ A sa wasei ira ko Tevita me ra vakailawalawa e veitaravi, ka me lewai ira ko ira na Livai: ko Kerisoni, ko Koaca, kei Mirari.

⁷ Maivei ira na luve i Kerisoni: ko Latani, kei Semeai.

⁸ O iratou na luve i Latani eratou tagane: ko Jieli sa liu, kei Secami, kei Joeli, sa lewe tolu.

⁹ O iratou na tagane na luve i Semeai: ko Silomeci, kei Esieli, kei Arani, sa lewe tolu. Sa nodra qase turaga na Latani ko iratou oqo.

¹⁰ Ia ko iratou na tagane na luve i Semeai: ko Jeaci, ko Sina, kei Jiusi, kei Piria. O iratou na lewe va oqo eratou sa luve i Semeai.

¹¹ A sa kenai matai ko Jeaci, ia nai karua ko Sisa: ia ko Jiusi kei Piria sa sega ni lewe vuqa na luvedrau tagane; ia era sa wili vata kina me mataqali.

¹² O iratou na luve i Koaca ka tagane: ko Amirami, ko Isari, ko Epironi, kei Usieli, sa lewe va.

¹³ Oi rau na luve i Amirami ka tagane: ko Eroni, kei Mosese: ka sa tawase ko Eroni, me vakasavasavataka na veika sa tabu sara, ko koya kei ira na luvena tagane ka sega ni mudu, me ra vakama e na mata i Jiova na ka boi vinaka, me ra qaravi koya, ka ia na vosa ni veivakalougatataki e na yacana, ka sega ni mudu.

¹⁴ A sa vakayacani vata kei ira na mataqali i Livai koi rau na luve i Mosese na tamata ni Kalou.

¹⁵ Oi rau na luve i Mosese ka tagane: ko Kerisomi, kei Eliesa.

¹⁶ Maivei ira na luve i Kerisomi ka tagane: sa liu ko Sipueli.

¹⁷ Ia na luve i Eliesa ka tagane: ko Riapaia sa liu. Ka sega tale na luve i Eliesa ka tagane; ia sa lewe vuqa sara na tagane na luve i Riapaia.

¹⁸ Maivei iratou na luve i Isari ka tagane: sa liu ko Silomeci.

¹⁹ Maivei iratou na luve i Epironi ka tagane: sa liu ko Jiraija, ai karua ko Amaraia, ai katolu ko Jeesieli, ia nai kava ko Jikamiami.

²⁰ Maivei rau na luve i Usieli ka tagane: sa liu ko Maika, ia nai karua ko Jisia.

²¹ Oi rau na luve i Mirari ka tagane: ko Mali, kei Musi. Oi rau na luve i Mali ka tagane: ko Eliesa, kei Kisi.

²² A sa mate ko Eliesa, ka sega na luvena tagane, a luvena yalewa ga: a ra sa vakawati kei iratou na wekadratou na luve i Kisi.

²³ O iratou na luve i Musi ka tagane: ko Mali, kei Eteri, kei Jirimoci, sa lewe tolu.

²⁴ O ira oqo na Livai, me vaka na mataveivuvale ni nodra qase; ia ko ira na qase turaga, me vaka nai wiliwili ni yacadra ni ra sa volai, ko ira sa cakava na cakacaka ni veiqaravi e na vale i Jiova, ko ira na ruasagavulu na nodra yabaki ka toro cake.

²⁵ Ni sa kaya ko Tevita, Sa vakasaututaki ira na nona tamata ko Jiova na nodra Kalou na Isireli, ka me tiko e Jerusalemi ka tawa mudu:

²⁶ ko ira talega na Livai: era na sega tale ni colata na vale ni Kalou, se dua na kenai yaya ni kena cakacaka.

²⁷ Ni sa wili ko ira na Livai sa ruasagavulu na nodra yabaki ka toro cake, me vaka nai tinitini ni vosa i Tevita.

²⁸ Ni sa nodra i tavi me ra qaravi ira na luve i Eroni e na veiqaravi e na vale i Jiova, e na kena lomanibai, kei na kena taba-ni-vale e cake, kei na vakasavasavataka na ka tabu kecega, kei na cakacaka sa caka tiko e na vale ni Kalou;

²⁹ me ra vakarautaka na madrai dauyatuni, kei na madrai droka vinaka ni madrali laukana kei na keki mamare sa sega ni vakaleveni, kei na ka sa tavuteke, kei na ka sa tavu e na waiwai, ka me ra vakaraica nai vakarau kei na bibi ni ka kece;

³⁰ me ra tu talega e na mataka kecega me ia na vakavinavinaka kei na sere vei Jiova, ka vaka talega kina e na yakavi;

³¹ me ra vakacabora talega nai soro kama kecega kivei Jiova, e na veisiga ni vakacecegu, e na vula vou, kei na so levu sa lokuci, me vaka nai wiliwili, ka me vaka nai vakaro sa bale kina, me ia tikoga e na mata i Jiova:

³² ia me ra vakabauta nai vakaro sa bale ki na vale ni veitavaki, kei na tikina tabu, kei na nodra i tavi na wekadra, na luve i Eroni, e na cakacaka ni vale i Jiova.