1 Veigauna 22 - Vakavakadewa Makawa

Sa vakarautaka na ka levu ko Tevita, me tara kina na vale ni soro, 2-5. Ai vakaro i Tevita vei Solomoni kei ira na turaga, 6-19.

¹ Sa qai kaya ko Tevita, Oqo na vale i Jiova na Kalou, oqo talega nai cabocabo-ni-soro kama nei Isireli.

² A sa vakarota ko Tevita me ra sa vakasoqoni vata ko ira na vulagi sa tiko e na nodra vanua na Isireli, a sa lesia eso na matai ni vatu, me taya na veivatu sa vakarautaki me tara kina na vale ni Kalou.

³ A sa vakarautaka vakalevu ko Tevita na kaukamea mei vako ni sogo ni matamata-ni-koro kei nai sema; sa ka levu talega na parasa, sa sega ni vakatovolei na kena bibi;

⁴ na vu ni sitari talega sa sega ni wili na kena levu: ni sa ka levu na vu ni sitari era sa kauta tiko mai kivei Tevita ko ira na kai Saitoni kei ira na kai Taia.

⁵ A sa kaya ko Tevita, Sa gone ga ka malumalumu ko Solomoni na luvequ tagane, ia na vale ena caka me nei Jiova, ena vakaiukuukutaki vakaidina, me rogo ka lagilagi e na veivanua kecega: au na vakarautaka na ka me yaga kina. A sa vakarautaka vakalevu kina ko Tevita ni sa bera na nona mate.

⁶ Sa qai kacivi Solomoni na luvena, ka vakaroti koya me tara e dua na vale me nei Jiova na nodra Kalou na Isireli.

⁷ A sa kaya vei Solomoni ko Tevita, Na luvequ, sa tu e lomaqu me'u tara e dua na vale ki na yaca i Jiova na noqu Kalou.

⁸ Ia sa yaco mai vei au na vosa i Jiova, ka vaka, Ko a vakadavea vakalevu na dra, ka dauia nai valu levu: ko na sega ni tara na vale ki na yacaqu, ni sa levu na dra ko sa vakadavea ki na soso e mataqu:

⁹ raica, ena sucu mai e dua na luvemu tagane, ena tiko vinaka ko koya; ia ka'u na solia vua na vakacegu maivei ira kecega na nona meca e vakavolivolita; ia ena yacana ko Solomoni, ia ka'u na solia na tiko vakacegu kei na sautu kivei ira na Isireli e na nona gauna:

¹⁰ ena tara na vale ki na yacaqu ko koya; ena luvequ talega ko koya, ia ka'u na tamana koi au; au na vakataudeitaka talega nai tikotiko vakaturaga ni nona matanitu vei ira na Isireli ka me tawa mudu.

¹¹ Ia, na luvequ, me tiko vata kei iko ko Jiova; ia mo cakacaka yaco, ka mo tara na nona vale ko Jiova na nomu Kalou, me vaka na nona vosataki iko.

¹² Me solia ga vei iko ko Jiova na vuku kei na yalomatua, ka vakaroti iko e na vukudra na Isireli, mo muria rawa na vunau i Jiova na nomu Kalou.

¹³ O na qai tamata yaco, kevaka ko sa vakananuma ka cakava nai lesilesi kei na lewa sa vakarota ko Jiova kivei Mosese e na vukudra na Isireli: mo kaukauwa ga, ka yalodoudou; kakua ni rere, se taqaya.

¹⁴ Ia, raica, au sa vakarautaka ni'u sa rarawa tiko, me yaga ki na nona vale ko Jiova, na koula e dua na drau na udolu na taledi, kei na siliva sa udolu vakaudolu na taledi; kei na parasa kei na kaukamea sa sega ni kilai na kena bibi; ni sa ka levu sara: na kau talega, kei na vatu, au sa vakarautaka; ia mo kuria ga oqori.

¹⁵ Sa lewe vuqa talega na tamata cakacaka sa tiko kei iko, ko ira na dautata, kei ira na matai ni vatu kei na kau, kei na tamata vuku e na cakacaka kecega.

¹⁶ Sa sega ni wili na koula, na siliva, kei na parasa, kei na kaukamea. Mo ia ga, ka cakacaka, ka me tiko vata kei iko ko Jiova.

¹⁷ Sa vakarota talega ko Tevita vei ira kecega na nodra turaga na Isireli, me ra vukei Solomoni na luvena, ka vaka,

¹⁸ Sa sega li ni tiko vata kei kemudou ko Jiova na nomudou Kalou? ka sa sega li ni vakasaututaki kemudou e na veiyasana kecega? ni sa soli ira oti na lewe ni vanua ki na ligaqu; ka sa vakamalumalumutaki na vanua e na mata i Jiova, kei na matadra na nona tamata.

¹⁹ Dou qai vagolea na lomamudou kei na yalomudou me vakasaqarai Jiova na nomudou Kalou, ka mo dou ia, ka tara na nona vale tabu ko Jiova na Kalou, me kau rawa mai kina na kato ni veiyalayalati i Jiova, kei nai yaya tabu ni Kalou, ki loma ni vale ena tara ki na yaca i Jiova.